ދުންފަތް ކޮންޓްރޯލް ކުރުމުގެ ގާނޫނުގެ ދަށުން ރާއްޖެއަށް ވޭޕް އެތެރެ ކުރުމާއި ވޭޕް ބޭނުންކުރުން މިދިޔަ ޑިސެމްބަރު މަހުގެ 15 ވަނަ ދުވަހުން ފެށިގެން ވަނީ މަނާކޮށްފައެވެ. އަދި އެ ނިންމިމާއި ހިލާފުވާ ފަރާތްތައް ޖޫރިމަނާކުރުމަށް ވަނީ ކަނޑައަޅާފައެވެ. އެހެންނަމަވެސް ވޭޕް މަނާކުރުމުގެ ކުރިން އެތެރެކޮށްފައިވާ އެއްޗިއްސަށް ހަދާނެ ގޮތެއް ނެތެވެ.
ހެލްތް މިނިސްޓްރީން މިއަދު އާއްމުކުރި ދުންފަތް ކޮންޓްރޯލް ކުރުމާ ބެހޭ އާންމު ގަވައިދުގައިވަނީ ، ވޭޕް ކުރުމަށް ބޭނުންކުރާ އާލާތްތަކާއި އެއާއެކު ބޭނުން ކުރުމަށް އުފައްދާފައިވާ އެއްޗެއް ބޭނުންކޮށްފިނަމަ ނުވަތަ އަތުގައި އޮތްނަމަ އެ އެއްޗެއް އަތުލުމުގެ ފުރިހަމަ ބާރު ފުލުހުންނަށް ދީފައެވެ.
އަދި ފުލުހުން އެއްވެސް ތަނެއް ބަލާ ފާސްކުރުމުގެ ތެރޭގައި ފެންނަ ވޭޕާއި އެއާއި ގުޅުން ހުރި ސާމާނު އަތުލާ ނައްތާލުމުގެ ބާރުވެސް މި ގަވައިދުގެ ދަށުން ފުލުހުންނަށް ލިބެއެވެ.
ދުންފަތް ކޮންޓްރޯލް ކުރުމުގެ ގާނޫނަށް ގެނެވުނު އިސްލާހާ ގުޅިގެން، ވޭޕް ބޭނުންކުރާ މީހުން 5،000 ރުފިޔާއިން ޖޫރިމަނާ ކުރެވޭނެއެވެ. އަދި ވޭޕް ވިއްކާ ފަރާތްތައް 20،000 ރުފިޔާއިން ޖޫރިމަނާ ކުރެވޭނެއެވެ. މީގެ އިތުރުން ވިއްކާ ކޮންމެ ވޭޕަކަށް 10،000 ރުފިޔާއިން ޖޫރިމަނާ ކުރެވޭނެއެވެ.
ދުންފަތް ކޮންޓްރޯލް ކުރުމުގެ ގާނޫނަށް ގެނައި ބަދަލާއި އެކު އަމިއްލަ މީސްމީހުންގެ ގޭގައި ހިންގާ ސަރުކާރުގެ އޮފީސް އިމާރާތްތަކުގައިިވެސް ދުންފަތުގެ އިސްތިއުމާލްކުރުން މަނާވާނެއެވެ. މީގެ އިތުރުން ދުންފަތް ގަނެ ވިއްކޭނެ އެންމެ ދަށް އުމުރަކީ 21 އަހަރަށްވެސް ވަނީ ބަދަލުކޮށްފައެވެ. އެ އުމުރު މިހާތަނަށް އޮތީ 18 އަހަރުން މައްޗަށެވެ.
ދުންފަތުގެ އިސްތިއުމާލު މަދުކުރުމަށް ސަރުކާރުން އެކުލަވާލާފައިވާ މާސްޓާ ޕްލޭންގެ ދަށުން، ސިނގިރެޓުގެ އިމްޕޯޓް ޑިއުޓީ ބޮޑުކޮށް، އަދި ދުންފަތުގެ އިސްތިއުމާލު ހުއްޓާލަން ބޭނުންވާ ފަރާތްތަކަށް އެހީތެރިވުމަށް 1676 ނަންބަރުގެ ހޮޓްލައިނެއް ވަނީ ތައާރަފުކޮށްފައެވެ.
