ޕީޖީ އޮފީހުން ދައުވާ އުފުލާފައިވަނީ އެ މުޒާހަރާއާި ގުޅިގެން އޭރު ހައްޔަރުކުރި ތިން ޑްރައިވަރުންގެ މައްޗަށެވެ. އެއީ މއ. ވިރާހު، މުހައްމަދު ޝާމިން، 39 އަހަރު އާއި މއ. ނަހީދީ މަންޒިލް، މިސްބާހް ޝަރީފް، 31 އަހަރު އަދި ހދ. ކުމުންދޫ، ހޮލިޑޭވިލެޖް، ނުއުމާން އަހްމަދު، 36 އަހަރުއެެވެ. މި އެންމެންގެ މައްޗަށް އުފުލީ އެހެނިހެން މަސައްކަތްތަކަށް ހުރަސް އެޅިކަމުގެ ދައުވާއެވެ.
ޑްރައިވާސް އެސޯސިއޭޝަންގެ އިންތިޒާމް ސެކެޓްރީ މިސްބާހު ޝަރީފް އެކްސްގައި ކުރި ޕޯސްޓެއްގައި ބުނީ އެ ޑްރައިވަރުންނަށް ދައުވާ ކުރިކަން އެންގީ ސަރުކާރުން އިއްޔެ ޓެކްސީ ލައިންގެ ހިދުމަތް ފަށަން އެމްޓީސީސީއާ ހަވާލުކުރިތާ ބައިގަޑިއިރެއްހާއިރު ތެރޭގައި ފުލުހުން ގުޅާފައިކަމަށެވެ.
ޓެކްސީ ޑްރައިވަރުން މުޒާހަރާކުރީ ސަރުކާރުން ޓެކްސީ ލައިނެއް ތައާރަފުކޮށް ޓެކްސީގެ ހިދުމަތް ދޭން މަސައްކަތް ކުރަން ފެށުމާ ގުޅިގެންނެވެ. މުޒާހަރާކުރި ޑްރައިވަރުން އެރޭގެ ނުވަ ޖަހާއިރު ހުޅުމާލެ ނިރޮޅުމަގު ކޮޅުގައި ކާރުތައް ޕާކުކޮށް އެ މަގު ބަންދުކުރި އެވެ. އޭގެ ފަހުން ފުލުހުން އެ ސަރަހައްދު ކޮންޓްރޯލްކޮށް، 20 އަށްވުރެ ގިނަ ޓެކްސީ ޓޯކުރި އެވެ.
