މިނިސްޓަރު ޝަހީމް މިހެން ވިދާޅުވީ ރޭ ބޭއްވި އަހާ ފޯރަމްގައި އާންމު ރައްޔިތެއް ކުރި ސުވާލަކަށް ޖަވާބުދެއްވަމުންނެވެ.
ޝަހީމް ވިދާޅުވީ ރާއްޖެއަކީ ސައްތަ އިން ސައްތަ މުސްލިމް ގައުމެއް ކަމަށާއި އަދި އިސްލާމީ ގައުމުތަކަށް ބަލާއިރު ރާއްޖެއަަކީ ވަރަށް ބޮޑަށް އެއްބައިވަންތަކަން އޮންނަ ގައުމެއް ކަމަށެވެ. އަދި އިސްލާމީ ތަސައްވަރާއި އިސްލާމީ މަންހަޖާއި ފިކުރަށް އަލިއަޅުއްވާލަމުން ޝަހީމް ވިދާޅުވީ ރާއްޖޭގެ ހުރިހާ ރައްޔިތުންނަކީވެސް ސުއްނީ މުސްލިމުގެ ގޮތުގައި ބަލާކަމަށެވެ.
އެހެންކަމަށްވުމާއެކު ރާއްޖޭ ތެރޭގައި ދީނީގޮތުން ބައިބައިވުންތަކެއް ނެތް ކަމަށާއި ރައްޔިތުންނަކީ ވަރަށް މެދުމިނެއްގެ އިސްލާމީ އުސޫލުތައް ދަމަހައްޓާ އެއަށް ތަބާވާ ބައެއް ކަމަށް ޝަހީމް ވިދާޅުވި އެވެ.
މިނިސްޓަރު އިތުރަށް ވިދާޅުވީ ދުނިޔޭގެ އެހެން ގައުމުތަކުގައި އެކަން އޮތް މިންވަރަކަށް ރާއްޖޭގައި ނުވެސް ނެތް ކަމަށާއި އިސްލާމީ ގައުމުތަކުގައި އެކަންކަން އޮތް މިންވަރަކަށް ރާއްޖޭގައި އެކަންކަމެއް ނޯންނަކަމަަށެވެ. އޭގެއިތުރުން ރާއްޖޭގައި އެކަންކަމަށް އިލްމީ ގޮތުންނާއި ގާނޫނީ ގޮތުންވެސް ވަަރަށް ރަނގަޅަށް ފަރުވާ ކުރެވެމުން ދާކަމަށް ޝަހީމް ވިދާޅުވި އެވެ.
ރާއްޖެ ނަން ކިލަނބުކޮށްލުމަށްޓަކައި ބައުނަލްއަގްވާމީ މުޖްތަމައުގައި އެކަން އެގޮތައް ކުރާ ފަރާތްތަކަށް ޖެހޭނީ ނަސޭހަތްތެރިވާން ކަަމަށާއި އެކަން އެގޮތައް ނުކުރުމަށާއި ރާއްޖެއާ މެދު ހަގީގަތުގެ މައްޗަށް ބިނާކޮށް ވާހަކަދެއްކުމަށް ނަސޭހަތްތެރިވާން ޖެހޭ ކަމަށް ޝަހީމް ވިދާޅުވިއެވެ.
ރާއްޖެއަކީ ހުރިހާ އެންމެންނަށްވެސް އިހްތިރާމް ކުރާ ސުލްހައަށް ލޯބި ކުރާ އެހެން ދީން ތަކުގެ މީހުންނަށްވެސް އަދުލުވެރިގޮތުގައި އިހުސާންތެރިވާ، އެންމެންނަށް އިހްތިރާމް ކުރާ ގައުމެއް ކަަމަށް މިނިސްޓަރު ވިދާޅުވި އެވެ.
