ހެލްތު އިންޝުއަރެންސްގެ ދަށުން ރާއްޖެ އިން ބޭރުން ފަރުވާ ހޯދުމުގައި ކުރިމަތިވާ ދަތިތަކުގެ ކަންބޮޑުވުން މެމްބަރުން ފާޅުކުރީ މެމްބަރުންނަށް އިންޝުއަރެންސް ދިނުމަށް 2016 ވަނަ އަހަރު އެކުލަވައިލި އުސޫލު އާ ކުރުމުގެ ކުރިން މަޖިލީހުގެ އާންމު ކޮމިޓީގެ ހިޔާލު ހޯދަން ފޮނުވުމުންނެވެ.
ރައްޔިތުން މަޖިލީހުގެ މެމްބަރުންނަށް ހެލްތް އިންޝިއަރެންސް ކަންތައް ފޯރުކޮށްދެމުން އަންނަނީ އެލައިޑް އިންޝުއަރެންސުންނެވެ.
އާއްމު ކޮމެޓީން މިއަދު ބޭއްވި ބައްދަލުވުމުގެ ބޮޑު ބައެއް ގެންދިޔައީ މައިކް އޮފްކޮށްގެން އެބައި އަޑުނިވޭ ގޮތަށް ހަދައިގެންނެވެ.
ރާއްޖެއިން ބޭރުން ހިލޭ ބޭސް ކުރުމުގައި ދަތިތަކެއް ދިމާވާ ކަމަށް ވިދާޅުވެ، އެންމެ ފުރަތަމަ ކަންބޮޑުވުން ފާޅުކުރައްވައި ވާހަކަ ދެއްކެވީ، ފޭދޫ ދެކުނު ދާއިރާގެ ޕީއެންސީ މެންބަރު އިބްރާހިމް ދީދީ (އައިބީ) އެވެ.
މެންބަރުންގެ އެންމެ ބޮޑު ހިތްހަމަނުޖެހުމަކަށްވީ ވަކި ހާއްސަ ޑޮކްޓަރަކަށް ދައްކަން ލިޔުން ހިފައިގެން ރާއްޖެއިން ބޭރުގެ ހޮސްޕިޓަލަކަށް ދިއުމުން، އިތުރު ކަމަކާ ގުޅޭ ޑޮކްޓަރަކަށް ދައްކާނަމަ އެ ލިޔުން ބޭނުން ނުކޮށް އަލުން ލިޔުމެއް ހޯދަން ޖެހުމެވެ.
މެމްބަރުން ވިދާޅުވީ އެހެން ޑޮކްޓަރަކަށް ދައްކަން ޖެހިއްޖެނަމަ ޖެހެނީ އަލުން ލިޔުން ހޯދަން ނުވަތަ ފަހުން ފައިސާ އަނބުރާ ދައްކާގޮތަށް އަމިއްލަ އަތުން ހަރަދު ކުރަންކަމަށެވެ.
އެކަމަށް ތާއީދު ކުރައްވަމުން ތިމަރަފުށީ ދާއިރާގެ މެމްބަރު އަހުމަދު ރިޔާޒު ވިދާޅުވީ، އެކަން ތަޖުރިބާ ކުރައްވާފައިވާ ކަމަށާއި މެމްބަރުންގެ އަތުން ބޮޑު އަދަދެއް ނަގައިގެން ކުރާ ކަމެއްގައި މެމްބަރުންނަށް ތަކުލީފު އުފުލަން ޖެހިގެން ނުވާނެ ކަމަށެވެ.
އިބްރާހިމް ދީދީގެ ވާހަކަތަކަށް ތާއީދު ކުރެއްވި ތިމަރަފުށީ ދާއިރާގެ ޕީއެންސީ މެންބަރު އަހްމަދު ރިޔާޒު ވިދާޅުވީ އޭނާއަށްވެސް ރާއްޖެއިން ބޭރުން ހެލްތު އިންޝުއަރެންސް ލިބުމުގައި ދަތިތަކެއް ކުރިމަތިވި ކަމަށެވެ. އަދި އިންޝުއަރެންސްއަށް މެމްބަރުންގެ އަތުން ވެސް ހޭދަކުރަން ޖެހޭއިރު، އެ ހިދުމަތް ހޯދުމުގައި ތަކުލީފެއް ކުރިމަތިވެގެން ނުވާނެކަމަށް އޭނާ ވިދާޅުވިއެވެ.
ރާއްޖެ އައިސް އެ ފައިސާ ހޯދަން ތަންތަނަށް ހުށައަޅައިގެން ކަންކަން ކުރަން ޖެހުމަކީ ބޮޑު ތަކުލީފެއް ކަމަށާއި އެއީ މެމްބަރުންގެ ވަގުތު ވެސް ބޭކާރުވާ ކަމެއް ކަމަށް ރިޔާޒު ވިދާޅުވިއެވެ. އަދި އޭނާ ފައިސާ ހޯދުމަށް ހުށައެޅުން އެޕްލިކޭޝަން ބަލައި ނުގަންކަންވެސް ރިޔާޒު ފާހަގަކުރެއްވިއެވެ.
ރިޔާޒު ވިދާޅުވީ މަސައްކަތް ކޮށްގެންވެސް ލިބުނީ 3000 ރުފިޔާކަމަށާއި އެކަން އެގޮތަށް ހިގައިގެން ނުވާނެކަމަށެވެ.
މެމްބަރުންގެ މި ކަންބޮޑުވުންތަކާއި ގުޅިގެން މިކަމުގައި ކޮމިޓީން ނިންމި ގޮތެއް ނޭގެއެވެ. ސަބަބަކީ އެކަމާއި މަޝްވަރާތަކުގައި ކޮމޓީގެ މައިކް އޮފްކޮށްފައިވާތީ އެވެ.
