މިކަން މިއަދު އިއުލާން ކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ސައީދު ވިދާޅުވީ، ދިވެހިންގެ ކެއިންބުއިމުގައި އާންމުކޮށް ބޭނުންކުރާ ހުރިހާ ތަކެއްޗެއްގެ އަގު ބަލައި، އަގުތައް މަތިވެއްޖެނަމަ އެކަން ހައްލުކުރުމަށް އެސްޓީއޯ މެދުވެރިކޮށް ފިޔަވަޅު އަޅާނެ ކަމަށެވެ.
ސަރުކާރުން މިހާރު ވަނީ ރޯދަ މަހަށް ތައްޔާރުވުމުގެ ގޮތުން 24 ބާވަތެއްގެ މުދާ ބާޒާރަށް ނެރުމަށް ނިންމައިފަ އެވެ. މީގެ ތެރޭގައި އަސާސީ ކާބޯތަކެތީގެ ގޮތުގައި ފިޔާ، ބިސް، އަލުވި، ކާށި އަދި ކަދުރު ހިމެނެ އެވެ. މީގެ އިތުރުން ތަރުކާރީ އާއި މޭވާގެ ބާވަތްތަކާއި، ޕްރޮސެސްޑް ކާނާ އަދި ކެއްކުމަށް ބޭނުންކުރާ ތަކެތި ވެސް ހިމެނެ އެވެ.
އިކޮނޮމިކް މިނިސްޓްރީން ބުނީ ކާބޯތަކެތީގެ އަގުތައް ކޮންޓްރޯލް ކުރުމަށް ފިހާރަތަކަށް ގޮސް ބާޒާރުގެ އަގުތައް ގަވާއިދުން ބަލަމުން ގެންދާނެ ކަމަށެވެ. އަދި އެއްވެސް ބާވަތެއްގެ ޝޯޓޭޖެއް އުޅޭނަމަ، އެ ތަކެތި އަވަހަށް ގެނެވޭނެ އިންތިޒާމު ހަމަޖައްސާނެ ކަމަށް ވެސް އެ މިނިސްޓްރީން ބުންޏެވެ.
