މަސްތުވާތަކެއްޗާއެކު ޓެކްސީއަކުން ހައްޔަރުކޮށްފައިވަނީ، ހއ،. ތުރާކުނު އާހިޔާ، މަރިޔަމް ޒީނާ ކިޔާ އަންހެނެކެވެ. އޭނާގެ އުމުރަކީ 23 އަހަރެވެ. ޒީނާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށްވަނީ 15 ދުވަސް ޖަހާފައެވެ.
ޒީނާގެ ބަންދު އަމުރު ރިޕޯޓުން އެނގޭ ގޮތުގައި އޭނާ ހައްޔަރުކުރި ޓެކްސީގެ ތެރެއަށް މަސްތުވާތަކެތި ކަމަށް ބެލެވޭ ހަތް ރަބަރު ޕެކެޓްވަނީ އެއްލާލާފައެވެ. އަދި ފަހުން އޭނާގެ ގެއިން ގިނަ އަދަދެއްގެ މަސްތުވާތަކެތިވަނީ ފެނިފައި ކަމަށް ފުލުހުންނާ ހަވާލާދީ ބަންދު ރިޕޯޓުގައި ފާހަގަ ކޮށްފައިވެއެވެ.
މަސްތުވާތަކެތީގެ މައްސަލައެއްގައި މާލޭން މީގެ 10 ވަރަކަށް ދުވަސް ކުރިންވެސް އަންހެން ގްރޫޕެއް ހައްޔަރުކުރިއެވެ.
މަސްތުވާތަކެތި ގެންގުޅެ، އެ ބޭނުން ކުރުމުގެ ތުހުމަތުގައި ހައްޔަރުކޮށްފައިވާ އެ ތިން އަންހެނުންވެސް ހައްޔަރުކޮށް ކޯޓަށް ހާޒިރު ކުރުމުން އެ މީހުންގެ ބަންދަށްވަނީ 30 ދުވަސް ޖަހާފަ އެވެ.
• ރިފާޝާ ހަނީފު 29، ހއ. ހޯރަފުށީ މަނަފަރު
• އާމިނަތު ނަބީލާ އިބްރާހީމް 36، ހ. ފިނިމާގެއާގެ
• އާއިޝާތު ހަފްސާ 47، އާމިނަތުމަންޒިލް ސ. ފޭދޫ
މި ތިން މީހުން ވެސް ހައްޔަރުކޮށްފައިވަނީ ރަނގަޅަށް ކަމަށް ކޯޓުންވަނީ ކަނޑައަޅާފަ އެވެ. ތިން އަންހެނުންގެ ބަންދަށް 30 ދުވަސް ޖަހާފައިވާއިރު، ތިން މީހުންނަކީވެސް ފަރުވާ ދޭން ޖެހޭ ބައެއް ކަމަށް ބަންދު އަމުރުގައި ބަޔާންކޮށްފައިވެ އެވެ.
