މި ދަތުރުފުޅަކީ ލަންކާގެ ފޮރިން އެފެއާޒް، އެމްޕްލޯއިމަންޓް އެންޑް ޓޫރިޒަމް މިނިސްޓަރު އެޗް އެމް ވިޖިތާ ހެރަތުގެ ދައުވަތަކަށް ކުރައްވާ ދަތުރުފުޅެކެވެ.
ފޮރިން މިނިސްޓްރީން ބުނީ ލަންކާގެ ބޮޑުވަޒީރާ އެކު ބޭއްވެވި ބައްދަލުވުމުގައި، ރާއްޖޭގެ ތަރައްގީ އާއި ކުރިއެރުމަށް ލަންކާއިން ޒަމާނުއްސުރެ ފޯރުކޮށްދެމުންދާ އެހީ ފާހަގަކުރައްވައި އެކަމަށް މިނިސްޓަރު ހަލީލް ޝުކުރު އަދާކުރެއްވިކަމަށެވެ. ހާއްސަކޮށް ރާއްޖޭގެ ތައުލީމާއި މީހުން ބިނާކުރުމަށް ލަންކާއިން ފޯރުކޮށްދެމުންދާ އެހީތެރިކަން މިނިސްޓަރު ހަލީލް ފާހަގަކުރެއްވި ކަމަށްވެސް ފޮރިން މިނިސްޓްރީން ބުނެއެވެ.
ޑރ. ހަލީލްގެ މި ދަތުރުފުޅުގައި ލަންކާގެ ރައީސް އަނޫރާ ކުމާރާ ޑިސަނަޔަކައާ މިރޭ ބައްދަލުކުރެއްވުމަށް ވަނީ ހަމަޖެހިފައެވެ. މީގެ އިތުރުން ލަންކާގައި ދިރިއުޅޭ ދިވެހިންނާއި އެ ގައުމުގެ ވިޔަފާރިވެރިންނާވެސް މިނިސްޓަރު ހަލީލް ބައްދަލުކުރައްވަން ވަނީ ހަމަޖެހިފައެވެ.
ތިން ދުވަހުގެ ރަސްމީ ދަތުރުފުޅެއްގައި ޑރ ހަލީލް އިއްޔެ ވަނީ ލަންކާގެ ފޮރިން މިނިސްޓަރު ހޭރަތުއާ ބައްދަލުކުރައްވައި ރަސްމީ މަޝްވަރާތައް ބާއްވާފައެވެ.
އެ މަޝްވަރާތަކަށްފަހު ފޮރިން މިނިސްޓްރީން ބނީ ލަންކާ އާއި ރާއްޖެ ގުޅިގެން ޓޫރިޒަމާއި ތައުލީމާއި އިގުތިސާދު އަދި ސަލާމަތީ ދާއިރާތަކުން އިތުރަށް މަސައްކަތް ކުރުމަށް ދެ މިނިސްޓަރުން މަޝްވަރާކުރެއްވިކަމަށެވެ.
ފޮރިން މިނިސްޓަރުގެ މި ދަތުރުފުޅުގައި އެ މިނިސްޓްރީގެ ފޮރިން ސެކްރެޓަރީ ފާތިމަތު އިނާޔާ އާއި އެޑިޝަނަލް ސެކްރެޓަރީ އާމިނަތު އަބްދުﷲ ދީދީ ބައިވެރިވެވަޑައިގަންނަވަ އެވެ.
