ރަސްގެފާނު މިހެން އަންގަވާފައިވަނީ އަރަބި ބަސް މުޅި ދުނިޔެއަށް ފުޅާކުރުމަށް ސައުދީ އަރަބިއްޔާއިން ފަށާފައިވާ ހާއްސަ ޕްރޮގްރާމްގެ ތެރެއިންނެވެ.
ރަސްގެފާނުގެ މި ނިންމެވުމާއި އެކު މި ނިންމުން ތަންފީޒުުރަން ހަވާލުކޮށްފައިވަނީ ސައުދީގެ އެންމެ ބޮޑު ޔުނިވާސިޓީ، އިމާމް މުހައްމަދު ޔުނިވާސިޓީއާ އެވެ.
އެ ޔުނިވާސިޓީން ނެރުނު ބަޔާނެއްގައި ބުނީ އަރަބި ބަސް ކިޔަވާދޭން ރާއްޖޭގައި ގާއިމުކުރާ މައުހަދުގެ ޑިރެކްޓަރަކަށް ޑރ. ސާލިހް ބިން ސުލައިމާން އަލް އަރާޖާ އައްޔަނުކޮށްފައިވާކަމަށެވެ. އަދި ރާއްޖޭގައި ހުންނަ ސައުދީ އެމްބަސީ އާ ގުޅިގެން މި މައުހަދު ގާއިމުކޮށް ކިޔަވައިދޭން ފެށުމުގެ މަސައްކަތްތައް ހަވާލުކޮށްފައިވާކަމަށްވެސް އިމާމް މުހައްމަދު ޔުނިވާސިޓީން ބުނެއެވެ.
ރާއްޖޭގައި ގާއިމުކުރާ މި މައުހަދަކީ ރައްޔިތުންގެ މެދުގައި ގުޅުން ބަދަހިކޮށް މެދުމިނުގެ އިންސާނީ އަދި ސަގާފީ އަހުލާގު ފެތުރުމަށް އެހީތެރިވެދީ އަދި ފެންވަރު ރަނގަޅު ތައުލީމެއް ފޯރުކޮށްދޭނެ ތަނެއްކަމަށްވެސް ޔުނިވާސިޓީން ބުނެއެވެ.
ރާއްޖޭގައި ހުންނަ ސައުދީ އެމްބަސީން އެކްސްގައި ކުރި ޕޯސްޓެއްގައި ބުނީ ސައުދީން ރާއްޖެއަށް ކަނޑައަޅުއްވާފައި ހުންނަވާ ސަފީރު މަޓްރެކް އަބްދުالله އަލްއަޖަލީން އަލްދުސާރީ، ޑރ. ސާލިހް ބިން ސުލައިމާން އަލް އަރާޖާ އާ ބައްދަލުކުރައްވައި، ރާއްޖޭގައި އަރަބި ބަސް އުގަންނައިދޭ މައުހަދެއް ގާއިމުކުރުމުގެ އެންމެ ފަހުގެ އިންތިޒާމްތަކާ ގުޅޭގޮތުން މަޝްވަރާ ކޮށްފައިވާކަމަށެވެ.
