މިނިސްޓްރީގެ މާލީ ހިސާބުތަކުން ދައްކާ ގޮތުގައި، މި އަހަރުގެ ފެބްރުއަރީ މަހުގެ 13 ވަނަ ދުވަހާ ހަމައަށް ދައުލަތުގެ ބަޖެޓުން 1.4 ބިލިއަން ރުފިޔާ ސަލާމަތްކުރެވިފައިވެ އެވެ. މިއީ މިދިޔަ އަހަރާ އަޅާބަލާއިރު ހަރަދުތައް ކުޑަކުރެވުނު މިންވަރެވެ.
ސަރުކާރުން ގެންގުޅޭ ހަރަދު ކުޑަކުރުމުގެ ސިޔާސަތުގެ ދަށުން ރިކަރަންޓް ހަރަދުތައް 2.87 ބިލިއަން ރުފިޔާއަށް ތިރިކުރެވިފައިވާއިރު، ކެޕިޓަލް ހަރަދުތައް ވެސް 169.8 މިލިއަން ރުފިޔާއަށް ދަށްކުރެވިފައިވެ އެވެ. މިއީ މިދިޔަ އަހަރާ އަޅާބަލާއިރު ވަރަށް ބޮޑު ތަފާތެކެވެ.
ނަމަވެސް ދައުލަތަށް ލިބޭ އާމްދަނީ މިދިޔަ އަހަރާ އަޅާބަލާއިރު ދަށްވެފައިވާ ކަމަށް ފިނޭންސް މިނިސްޓްރީން ބުނެ އެވެ. މިގޮތުން މިދިޔަ އަހަރު 4.8 ބިލިއަން ރުފިޔާގައި ހުރި އާމްދަނީ މި އަހަރު ވަނީ 4.4 ބިލިއަން ރުފިޔާއަށް ދަށްވެފަ އެވެ.
އުމްރާނީ ތަރައްގީގެ މަޝްރޫއުތަކުގެ ތެރެއިން އެންމެ މުހިންމު ކަންކަމަށް އިސްކަންދީގެން ހަރަދުތައް ކުރިއަށް ގެންދިއުމަކީ މި ސަރުކާރުން ގެންގުޅޭ އުސޫލެއް ކަމަށް ފިނޭންސް މިނިސްޓްރީން ބުނެ އެވެ.
