އެޗްއާރްސީއެމްއިން ބުނީ މި މައްސަލައިގެ ތަހުގީގު ކުރިއަށްދާ ގޮތާމެދު ޒަކިއްޔާގެ އާއިލާއިން ވަނީ ކަންބޮޑުވުން ފާޅުކޮށްފައި ކަމަށެވެ. އެހެންކަމުން މައްސަލައާ ގުޅުންހުރި އިދާރާތަކުން އަމަލުކުރަމުންދާ ގޮތް ބެލުމަށް ތަހުގީގެއް ފަށާފައިވާ ކަމަށް އެ ކޮމިޝަނުން މައުލޫމާތު ދިނެވެ.
މައްސަލައާ ގުޅޭ ލިޔެކިޔުންތައް ފުލުހުންގެ އަތުން ހޯދައި، އެ މައުލޫމާތުތައް މިހާރު ދަނީ ދިރާސާކުރަމުންނެވެ. އުމުރުން 50 އަހަރުގެ ޒަކިއްޔާ މަރުވެފައި ފެނުނީ އޭނާ ދިރިއުޅުނު ގޭގެ ބަދިގެ ކައިރީގައި ހުންނަ ގުދަނެއްގެ ކައިރިންނެވެ. މަރުވެފައި އޮއްވައި ފެނުނުއިރު އޭނާގެ ހަށިގަނޑުގައި ބޮޑެތި ޒަހަމްތަކެއް ހުރިކަން ފާހަގަކުރެވުނެވެ.
ފުލުހުން މިހާރު ދަނީ މި މައްސަލައިގެ ތަހުގީގު ކުރިއަށް ގެންދަމުންނެވެ. އަދި އެމެރިކާގެ އެފްބީއައިގެ އެހީތެރިކަން ވެސް ހޯދަން ފަށާފައިވެއެވެ. މިހާތަނަށް ލިބިފައިވާ މައުލޫމާތުތަކަށް ބަލާއިރު، ޒަކިއްޔާ މަރުވީ އަމިއްލައަށްކަން ނުވަތަ މީހަކު މަރާލީކަން އަދި ކަށަވަރު ނުވާކަމަށް ފުލުހުން ބުނެފައިވެއެވެ.
