މިކަމުގެ އެއްބަސްވުމުގައި ސޮއިކުރުން އޮތީ މިއަދު ހެލްތް މިނިސްޓްރީގައެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރީ ސްޓޭޓް މިނިސްޓަރ އަހްމަދު ޤާސިމްއެވެ. ރޯޑް ޑިވެލޮޕްމަންޓް ކޯޕަރޭޝަން ލިމިޓެޑްގެ ފަރާތުން ސޮއިކުރީ ޑެޕިއުޓީ މެނޭޖިން ޑިރެކްޓަރ މުހައްމަދު އަސްބާހް އަލީ ނަސީރުއެވެ.
ދ. އަތޮޅު އާ ހޮސްޕިޓަލަށް އެޅުމަށް އާރުޑީސީ މި ހަވާލުކުރީ އެ އަތޮޅަށް ކުރައްވާ ދަތުރުފުޅެއްގައި ރައީސް ޑރ. މުހައްމަދު މުއިއްޒު މިއަދު ފުރާވަޑައިގެންފައިވަނިކޮށެވެ.
ދ. އަތޮޅު އާ ހޮސްޕިޓަލްގެ އެޅުމުގެ މަސައްކަތް އާރްޑީސީއާ ހަވާލުކޮށްފައިވަނީ 18 މަސް ދުވަހުގެ ތެރޭގައި ނިންމާގޮތަށެވެ. 50 އެނދުގެ މި ހޮސްޕިޓަލަށް އެޅުމުގެ މަސައްކަތުގެ އަގަކީ 181 މިލިއަން ރުފިޔާއެވެ.
މި ހޮސްޕިޓަލްގައި މެމޮގްރަފީ ހިދުމަތާއި ޑެންޓަލް އޯޕީޖީ، ކަށީގެ ފަރުވާތަކަށް ޚާއްސަ އޯތޯ-ތިއޭޓަރަކާއި، ޕްރައިވެޓް ރޫމްތައް ހުންނާނެކަމަށް ހެލްތް މިނިސްޓްރީން ބުނެއެވެ. މީގެއިތުރުން ހޮސްޕިޓަލްގެ ސްޓާފުންނަށް ޓްރެއިނިން ދިނުމަށް ބޭނުންވާނެ ފެސިލިޓީއަކާއި މި ހޮސްޕިޓަލަކީ އަތޮޅު ހޮސްޕިޓަލަކަށްވާތީ، އަތޮޅުތެރޭގެ މަސައްކަތްކުރާ މުވައްޒަފުންނަށް ބޭނުންވާ ތަމްރީންދިނުމަށް ބޭނުންވާ ފެސިލިޓީއެއްވެސް ހަދާނެކަމަށް ހެލްތު މިނިސްޓްރީން ބުނެއެވެ.
މި އެއާޕޯޓް އަޅާ ކުޑަހުވަދުއަކީ އެއާޕޯޓެއް އޮންނަ ރަށަކަށްވާތީ، އެމަޖެންސީ ހާލަތްތަކުގައި ކޭޓާކުރެވޭނެ އިމަޖެންސީ އީއާރެއް މި ހޮސްޕިޓަލްގައި ހުންނާނެކަމަށް ހެލުތު މިނިސްޓްރީން ބުނެއެވެ.
ހޮސްޕިޓަލުގެ ބޭނުން ކުރާ ހަކަތަ އަށް ކުރާ ހަރަދު ކުޑަ ކުރުމުގެ ގޮތުން މި މަޝްރޫއުގެ ދަށުން ހޮސްޕިޓަލުގައި ސޯލާ ޕީވީ ސިސްޓަމް ހަރުކުރުމަށް ހަމަޖެހިފައިވާކަމަށްވެސް ހެލްތުން ބުނެއެވެ.
