މިނިސްޓަރު އިހްސާން މިހެން ވިދާޅުވީ އެމަނިކުފާނާއި ދެކޮޅަށް މަޖިލިހަށް ހުށައެޅިފައިވާ އިތުބާރު ނެތްކަމުގެ މައްސަލާގައި ޖަވާބުދާރީވެޑާއިގަންނަވަމުންނެވެ.
އެމްޑީޕީގެ 12 މެމްބަރުން މިނިސްޓަރު އިހުސާންގެ އިތުބާރު ނެތްކަމަށް ހުށައަޅާފައިވާ މައްސަލައިގައި ކޮށްފައިވާ ތުހުމަތުތަކުގެ ތެރޭގައި ޑީއެންއާރު ޑޭޓާ ބޭނުންކޮށްގެން ޕީއެންސީއަށް މީހުން ވެއްދުމާއި، ބެސްޓިނެޓް މައްސަލައިގައި އަހަރަކު 460 މިލިއަން ރުފިޔާ ދައްކަން ޖެހޭ އެއްބަސްވުމެއްގައި ސޮއިކުރުން ހިމެނެއެވެ. މީގެ އިތުރުން ފުލުހުންގެ ތަހުގީގުތަކަށް ސިޔާސީ ނުފޫޒު ފޯރުވުމުގެ ތުހުމަތުވެސް އޭނާގެ މައްޗަށް ކުރެވެއެވެ.
މި ހުރިހާ ތުހުމަތުތަކަށް މިނިސްޓަރު ވަނީ އިންކާރުކޮށްފައެވެ. މިނިސްޓަރު އިހްސާން ކުރެވޭ ތުހުމަތުތަކުގެ ތެރެއިން ބެސްޓިނެޓް މައްސަލާގައި ޖަވާބުދާރީވަމުން މިނިސްޓަރު ވަނީ އެކަމާއި ގުޅިގެން ކަން ހިނގާފައިވާ ގޮތާއި އެކަމުގެ ލިޔެކިޔުންތައް މަޖިލިހާއި ހިއްސާކޮށްފައެވެ.
ބެސްޓިނެޓްގެ ލިޔެކިޔުންތައް ހޯމް މިނިސްޓަރު އިހްސާން ދައްކާލަނީ
13.7 މިލިއަން ޑޮލަރުގެ ގެއްލުމަކާއި ކުރިމަތިލާން ޖެހޭ ބެސްޓިނެޓް މައްސަލަގައި އެމްޑީޕީގެ ސަރުކާރުގެ ވެރިން އަޅާލައިފައި ނުވާކަމަށް މިނިސްޓަރު އިހްސާން ވިދާޅުވިއެވެ. އެގޮތުން އެ ކުންފުނިން ދިވެހި ސަރުކާރާއި މިދިޔަ ވެރިކަމުގައި ކުރި އެއްވެސް މުއާމަލާތަކަށް ޖަވާބު ދީފައި ނުވާކަން ފާހަގަކުރަމުން އެކަމުގައި އިހްމާލުވި އެންމެންގެ މައްޗަށް ފިޔަވަޅު އަޅުއްވާނެކަމުގެ އިންޒާރު މިނިސްޓަރު އިހްސާން ވަނީ ދެއްވާފައެވެ.
ބެސްޓިނެޓުން އިމިގްރޭޝަނަށް ފޮނުވި ލިޔުންތައް އިމިގްރޭޝަނުން އޭރުގެ ކަމާއި ގުޅޭ ހުރިހާ އިދާރާއަކަށް ފޮނުވާފައިވާކަމަށް މިނިސްޓަރު އިހްސާން މިއަދު ވަނީ ވިދާޅުވެފައެވެ. އެގޮތުން ކުރީގެ ރައީސް އިބްރާހިމް މުހައްމަދު ސާލިހާއި އޭރުގެ ބަންޑާރަ ނައިބު އިބްރާހިމް ރިއްފަތާއި އިކޮނޮމިކް މިނިސްޓަރު ފައްޔާޒު އިސްމާއިލް ހިމެނޭކަން މިނިސްޓާރު ފާހަގަކުރެއްވިއެވެ.
