ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ބަންޑާރަ ނައިބު ޑރ. އަހުމަދު އަލީ ސަވާދު ހިމެނޭ ވަކީލުން ބުނީ މި ބިލަކީ ގާނޫނުއަސާސީން ފަނޑިޔާރުންނަށް ލިބިދީފައިވާ ރައްކާތެރިކަމަށް އަރައިގަންނަ އިސްލާހެއް ކަމަށެވެ. އަދި ފަނޑިޔާރުންގެ މަސައްކަތަށް ނުފޫޒު ފޯރުވުމަކީ ގާނޫނުއަސާސީން މަނާކޮށްފައިވާ ކަމެއް ކަމަށް ވެސް ފާހަގަކޮށްފައިވެ އެވެ
ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހެޅުއްވި މި ބިލުގެ ދަށުން ދެ ފަނޑިޔާރަކު މަގާމަށް ގާބިލް ނޫން ކަމަށް ކަނޑައެޅުމަށް ޖުޑީޝަލް ސާވިސް ކޮމިޝަން (ޖޭއެސްސީ) އަށް ލާޒިމްކުރެ އެވެ. ނަމަވެސް ވަކީލުން ފާހަގަކުރި ގޮތުގައި ފަނޑިޔާރުން ގާބިލް ނޫން ކަމަށް ކަނޑައަޅާނީ ކޮން މިންގަނޑުތަކަކުން ކަމެއް ބިލުގައި ބަޔާންކޮށްފައެއް ނުވެ އެވެ.
މި ބިލް މަޖިލީހަށް ހުށަހެޅީ ސުޕްރީމް ކޯޓުގެ ފުލް ބެންޗުން މަޖިލީހުގެ މެންބަރުންގެ ގޮނޑި ގެއްލޭ އިސްލާހު ބާތިލްކުރުމުގެ މައްސަލަ ބަލަމުންދަނިކޮށެވެ. އެކަމާ ގުޅިގެން ވަކީލުން ބުނީ މި ދަނޑިވަޅުގައި މިފަދަ ބިލެއް ހުށަހެޅުމަކީ ސުޕްރީމް ކޯޓުގެ މައްސަލައަށް ނުފޫޒު ފޯރުވުމަށް ކުރާ ކަމެއް ކަމަށް ތުހުމަތުކުރެވޭނެ ކަމެއް ކަމަށެވެ.
ވަކީލުން ވަނީ މި ބިލް ފާސްކުރުމަކީ ގައުމުގެ ހަމަޖެހުމާއި ސުލްހަވެރިކަމަށް ހުރަސްއެޅިދާނެ ކަމެއް ކަމަށް ފާހަގަކޮށް، ބިލް އަނބުރާ ފޮނުވާލުމަށް މަޖިލީހުގެ މެންބަރުންނަށް ގޮވާލައިފަ އެވެ.
