މަޖިލީހުގެ މެމްބަރުންގެ ގޮނޑި ގެއްލޭނެ އިތުރު ގޮތްތަކެއް ކަނޑައަޅައި ގާނޫނުއަސާސީއަށް މިދިޔަ އަހަރު ގެނައި އިސްލާހު ބާތިލްކުރަން ރައްޔިތުން މަޖިލީހުގެ ކުރީގެ މެމްބަރު އަލީ ހުސައިން ވަނީ ހުށައަޅާފައެވެ. އަދި އެ މައްސަލަ ހިނގަމުން ދަނިކޮށް އެއްވެސް މެމްބަރަކު މަގާމުން ވަކިކުރުމާ ބެހޭ އެއްވެސް އިޖުރާއަތެއް ނުހިންގުމަށް ވަގުތީ އަމުރެއް ނެރެދިނުމަށް އޭނާ ވަނީ ހުށައަޅާފައެވެ. އެއާއި އެކު އެ މައްސަލައިގެ އަޑުއެހުމެއް މިއަދު 11 ޖަހާއިރު ބާއްވަން ސްޕުރީމް ކޯޓުން އޮތީ ތާވަލުކޮށްފައެވެ.
އެހެންނަމަވެސް ސުޕްރީމް ކޯޓުގެ ތިން ފަނޑިޔާރުންކަމަށްވާ ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ޖޭއެސްސީން ވަނީ މިއަދު ކުއްލި ގޮތަކަށް ސަސްޕެންޑްކޮށްފައެވެ. އެނގިފައިވާ ގޮތުގައި އެ ކޮމިޝަނުން މިގޮތަށް ނިންމީ މި ތިން ފަނޑިޔާރުންނާއި ގުޅޭގޮތުން އެންޓިކޮރަޕްޝަން ކޮމިޝަން (އޭސީސީން) ބަލަމުން އަންނަ މައްސަލައަކާއި ގުޅިގެންނެވެ. އަދި އެ މައްސަލައިގެ ތަފްސީލުތައް އޭސީސީން ޖޭއެސްސީއާ ހިއްސާކޮށްފައިވާކަަންވެސް ވަނީ އެނގިފައެވެ.
ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ސަސްޕެންޑްކުރުމުން މިއަދު ބާއްވަން އަޑުއެހުން ކޯޓުން ވަނީ ކެންސަލްކޮށްފައެވެ.
ސުޕްރީމްކޯޓުގެ ތިން ފަނޑިޔާރުން ސަސްޕެންޑްކުރަން ޖޭއެސްސީން ނިންމީ އެކޯޓުގެ ފަނޑިޔާރުންގެ އަދަދު މަދުކުރުމަށް ރައްޔިތުން މަޖިލީހުން ފާސްކުރިތާ ކޮޑަ ވަގުތުކޮޅެއްގެ ތެެރޭގައެވެ.
ހޮޅުދޫ ދާއިރާގެ ޕީއެންސީގެ މެމްބަރުން އަބްދުއްސައްތާރު މުހައްމަދު ހުށައެޅި ބިލް މަޖިލީހުން ފާސްކުރީ 68 މެމްބަރުންގެ ވޯޓާއި އެކުއެވެ.
