މި މައްސަލައާ ގުޅިގެން ޖުޑީޝަލް ސަރވިސް ކޮމިޝަން (ޖޭއެސްސީ)އިން ވަނީ ފަނޑިޔާރު ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ސަސްޕެންޑް ކޮށްފައެވެ. އޭސީސީން ނެރުނު ބަޔާނެއްގައި ބުނެފައިވަނީ ކޮރަޕްޝަންގެ އަމަލެއް ކުރަމުންދާ ކަމަށް ތުހުމަތު ކުރެވޭ މައްސަލަތައް އެއްވެސް ފަރާތެއް އިސްތިސްނާ ނުކޮށް ބެލުމަކީ އެ ކޮމިޝަންގެ ޒިންމާއެއް ކަމަށެވެ.
މި މައްސަލައިގައި އަދުލުގެ ނިޒާމުގައި ހިމެނޭ ގާނޫނުތަކާއި ގަވާއިދުތަކުން ކޮމިޝަނަށް ލިބިދޭ ބާރުތަކުގެ ތެރެއިން މައްސަލަ ކުރިއަށް ގެންދާނެ ކަމަށް އޭސީސީން ބުނެފައިވެއެވެ. އަދި ދިވެހި ރައްޔިތުންނަށް ފުރިހަމަ ޔަގީންކަން އަރުވާފައިވަނީ މައްސަލަ ބެލުމުގައި ވަކި ފަރާތަކަށް ބުރަނުވާނެ ކަމަށެވެ.
ސުޕްރީމް ކޯޓުގެ މި ތިން ފަނޑިޔާރުން ސަސްޕެންޑް ކުރުމާ ގުޅިގެން، ޕާޓީ ބަދަލުކުރުމުން މަޖިލިސް މެންބަރުންގެ ގޮނޑި ގެއްލޭ ގޮތަށް ގާނޫނަށް ގެނައި އިސްލާހު ބާތިލްކުރުމަށް އެދި ހުށަހަޅާފައިވާ މައްސަލައިގެ އަޑުއެހުންތައް ވަނީ މެދުކަނޑާލަން ޖެހިފައެވެ.
