ބާޒާރުގައި ކަރާ ކިލޯއެއް މިއަދު އުޅެނީ 25 ރުފިޔާގަ އެވެ. އެގޮތުން މާކެޓުގައި އެންމެ ތިޔާގިކޮށް ފެންނަނީ އއ. ތޮއްޑޫ އާއި ކަނޑޫދޫ ކަރަ އެވެ.
ނަމަވެސް ކަރާއަކީ އާންމުކޮށް ރޯދަމަހު އަގު އުފުލޭ ބާވަތެކެވެ. ނިމިދިޔަ އަހަރުގެ ރޯދަމަސް ފެށުނުއިރު ކަރާ ކިލޯއެއްގެ އަގު އުޅުނީ 30 ރުފިޔާއަށެވެ.
ވިޔަފާރިވެރިން މައުލޫމާތު ދިން ގޮތުގައި ތޮއްޑޫއިން މި ރޯދަ މަހު 500 އެއްހާ ޓަނުގެ ކަރާ ސަޕްލައި ކުރާނެ އެވެ.
މިރުހުގެ އަގުތަކަށް ކަޅި ހިންގާލައިފިނަމަ މިއަދު މާކެޓުގައި 100 ގްރާމްގެ މިރުސް ހުރީ 20-25 އާ ދެމެދު އެވެ. އަދި ކިލޯއެއް ލިބެން ހުރި 200 ރުފިޔާއަށެވެ.
ދިވެހިންގެ ތެރޭ މަގުބޫލު ކަނޑޫދޫ މިރުހެކޭ އެއްފަދައިން ލ އަތޮޅުގެ މިރުސްވެސް ބާޒާރުމަތީ ގިނަކަން ފާހަގަކޮށްލެވެ އެވެ. މީގެ ހަފްތާއެއް ވަރުކުރިން ބާޒަރުގައި މިރުސް ކިލޯއެއް ވިއްކީ 250 ރުފިޔާއަށެވެ.
މިއަދު ބާޒާރުމަތީ ކޮޕީ ފަތް ބޮނޑިއެއްވެސް އުޅެނީ 15 ރުފިޔާ އާއި 20 ރުފިޔާ އާ ދެމެދު އެވެ.
އަސާސީ ކާބޯތަކެތީގެ ގޮތުގައި 141 މުދާ ކަނޑައަޅައި ރޯދަމަހު ބާޒާރުގެ އަގުތައް ހިފަހައްޓަން ފިޔަވަޅުތަކެއް އަޅަން އިކޮނޮމިކް މިނިސްޓްރީން ވަނީ ނިންމައިފަ އެވެ.
އިކޮނޮމިކް މިނިސްޓްރީން ބުނީ އެ މިނިސްޓްރީގެ އިންސްޕެކްޝަން ޓީމުން މާލެ އާއި އަތޮޅުތަކުގެ ފިހާރަތަކާއި ލޯކަލް މާރުކޭޓުތަކުން ބާޒާރުގެ އަގުތައް މޮނީޓާކުރާނެ ކަމަށެވެ.
އަސާސީ ބާވަތްތަކުގެ އަގު ބޮޑުވެއްޖެނަމަ "އަސާސީ ބާވަތްތައް ކަނޑައެޅުމާއި އަގު މޮނިޓާކުރުމާއި މާކެޓް އިންޓަވެންޝަންގައި މިނިސްޓްރީން އަމަލު ކުރާނެ ގޮތުގެ އުސޫލު" ގެ ދަށުން އިންޓަވީން ކުރާނެ ކަމަށް އިކޮނޮމިކް މިނިސްޓްރީން ވަނީ ބުނެފަ އެވެ.
އިކޮނޮމިކް މިނިސްޓްރީން ބުނި ގޮތުގައި އަސާސީ ބާވަތްތަކުގެ ތަކެތީގެ އަގުތައް ސްޓެބިލައިޒް ކުރުމަށް ހަމަޖެހިފައިވަނީ އެސްޓީއޯ މެދުވެރިކޮށެވެ.
