ތޮށިގަނޑު މުށި ކުލައިގައި އަދި އެތެރެ ފެހި ކުލައިގައި ހުންނަ ކުދިކުދި ކަޅު އޮށްތަކެއް ހުންނަ ކިވީ އަކީ ކާލަން ވެސް އެހާ މީރު އެއްޗެކެވެ. ކިވީ އަކީ ކެއުމުގެ ތަފާތު ވައްތަރުތައް ތައްޔާރުކުރުމުގައި އެތައް ގޮތަކަށް ބޭނުން ކުރެވޭ މޭވާ އެކެވެ. ކިވީ ޕައި އިން ފެށިގެން ގޮސް ކިވީ ޖޫސް އަށެވެ. ހަމަ އެހެންމެ ކިވީ ހުހަށް ކާންވެސް ދެވަނަ އެއް ނެތް ފަދަ މޭވާ އެކެވެ.
ކިވީ އަކީ ނިއުޓްރިއެންޓްސް ގިނަ މޭވާ އެކެވެ. އެގޮތުން، ހަންގަނޑަށް އެންމެ ބޮޑަށް ބޭނުންވާ ނިއުޓްރިއެންޓްސްގެ ގޮތުގައި ހިމެނޭ ވިޓަމިން އޭ، ސީ އަދި އީ ގިނަ އަދަދަކަށް ހިމެނެ އެވެ.
ކިވީ އަކީ ސިއްހީ ވަރަށް ގިނަ މާއްދާ ތަކެއް އެކުލެވިފައިވާ މޭވާ އެކެވެ. މި މޭވާ ވަކިން ހާއްސަކޮށް ވިޓަމިން ސީ މުއްސަނދި އެއްޗެކެވެ. ކިވީން ލިއްބައިދޭ މާއްދާތަކުގެ ތެރޭގައި ވިޓަމިން އީ، ކޭ، ފޮލޭޓް، ކޮޕާ، ޕޮޓޭސިއަމް، އެންޓިއޮކްސިޑަންޓްސް، ޕްރޮޓީން އަދި އަޔަން ހިމެނެ އެވެ
ކިވީގައި ވިޓަމިން ލިބެން ހުންނަ މިންވަރަށް ބަލާއިރު ބޮޑު ދެ ކިވީ ބޭނުންކޮށްފިނަމަ އެދުވަހު ދެން ވިޓަމިން ސީ ލިބޭ އެހެން ކާނާއެއް ބޭނުން ނުކުރިއަސް ހަށިގަނޑަށް އެއްވެސް ގެއްލުމެއް ނުލިބޭނެ އެވެ. މިއީ އޮރެންޖުން ވިޓަމިން ސީ ލިބޭ މިންވަރުގެ ދެ ގުނަ އަދަދެކެވެ. ވިޓަމިން ސީ އަކީ މުސްކުޅި ބަލިން ސަލާމަތް ވުން ހިމެނޭ ހެން ދިފާއީ ނިޒާމް ވަރުގަދަކޮށް ސްޓްރެސް ފިލުވާލަން އެހީތެރިވެދޭ މާއްދާ އެކެވެ.
މިހިސާބުން ނިމުނީކީ ނޫނެވެ. ހަލާކުވެފައި ހުންނަ ފާރުގަނޑުތައް ފަސޭހަކޮށްދިނުމުގެ އިތުރުން ކަށި ވަރުގަދަ ކުރަން ބޭނުންވާ އަޔަން ލިބެ އެވެ. އަދި ލޭ ހޮޅިތަކާއި ދަތްތަކަށް ވެސް ކިވީ އަކީ ފަރުވާ އެކެވެ.
ވިޓަމިން ސީ ގެ އިތުރުން ކިވީގައި ގިނަ އަދަދަކަށް ވިޓަމިން އީ ވެސް ހިމެނެ އެވެ. ވިޓަމިން އީ ގައި ހިމެނޭ އެންޓިއޮކްސިޑެންޓުން ކޮލެސްޓްރޯލް ހުންނަ މިންވަރު ދަށްކޮށްލަ އެވެ. އަދި ދިފާއީ ނިޒާމް ބޫސްޓުކޮށްލާ ދިފާއީ ނިޒާމް އެތައް ގުނައެއް ވަރުގަދަކޮށްދެ އެވެ. އަދި ކެންސަރާ ދެކޮޅަށް މަސައްކަތް ކޮށް ކެންސަރު ޖައްސަން މަސައްކަތްކުރާ ސެލްތައް ނައްތާލަންވެސް މިއަށްވުރެ ރަނގަޅު އެހެން މޭވާއެއް ނެތެވެ
ކިވީގެ ފައިދާތަކުގެ ތެރޭގައި ހަޖަމުކުރުމުގެ ނިޒާމަށް ދިމާވާ މައްސަލަތަކުން ސަލާމަތްކޮށް ދިނުން ހިމެނެ އެވެ. ހެނދުނުގެ ނާސްތާކުރުމަށް ފަހު މަދުވެގެން ދެ ކިވީ ކާލުމުން މިކަމުން ސަލާމަވާން ވެވިދާނެ އެވެ. ކިވީގައި އެކުލެވޭ ޑައިޓްރީ ފައިބަރާއި އެކްޓިނިޑިން ކިޔާ އެންޒައިމެއްގެ ސަބަބުން ހަޖަމުކުރުން ފަސޭހަކޮށްދެ އެވެ. ބޮޑުކަމުދިޔުމަށް އުދަނގޫ ވާ ބޭފުޅުންނަށްވެސް ކިޥީ އަކި ކޮންމެހެން ކެއުމުގަ ހިމަނާލަން ޖެހޭ މޭވާ އެކެވެ
ދިރާސާތަކުން ދައްކާ ގޮތުގައި އަށް ހަފުތާގެ މުއްދަތަކަށް ކޮންމެ ދުވަހަކު ދެ ކިވީ ކާ ނަމަ ޑައޮލޯސްޓިކާއި ސިސްޓޮލިކް ބްލެޑް ޕެޝަރު ހަމައަކަށް އަޅުވައިދޭނެ އެވެ. މީގެ ނަތީޖާ އަކީ ސްޓްރޯކާއި ހާޓްއެޓޭކް ފަދަ ހިތުގެ މައްސަލަތަކުން މީހާ ދުރު ކޮށް ރައްކާތެރިކޮށް ދިނުމެވެ. ލޭ ގަނޑުކޮށް ދިނުމުން ދުރުކޮށްދޭ މި މޭވާ އަކީ ޑައެޓް ކުރާ މީހުންނަށް ވެސް ހަށިގަނޑު ލުއި ކޮށް ދިނުމަށް އެހީވެދޭ ވަރަށް ފައިދާ ކުރާ މޭވާ އެކެވެ.
ކިވީގެ އިތުރު ފައިދާތަކުގެ ތެރޭގައި ހަންގަނޑު ރީތިކޮށް ދިނުމާއި ޑީއެންއެއޭ ހަލާކުވުމުން ރައްކާތެރިކޮށް ދިނުމުގެ އިތުރަށް މިއީ ނިދަން އުނދަގޫވުމުގައި މައްސަލަތައް ހުންނަ މީހުންނާއި ނޭވާ ހިއްލާ މީހުން ވެސް ބޭނުން ކުރުން ވަރަށް ރަނގަޅު މޭވާއެކެވެ.
ކިވީގެ ތޮޅި މަށާލައިގެން ހުހަށް ކެއުމުގެ އިތުރުން ފްރެޝް ސެލެޑްތަކުގައިވެސް ބޭނުންކުރެވިދާނެ އެވެ. އަދި ޔޯގަޓާއެކު ނުވަތަ އެހެން ފުރުޓު ޓާޓްތަކުގައި ކިވީ ހިމަނައިގެން ބޭނުންކުރެވިދާނެ އެވެ. އަދި ސްމޫތީ ހަދައިގެން ބުއިމެއްގެ ގޮތުގައި ވެސް ބޭނުން ކުރެވިދާނެ އެވެ.
