
ރޯދަ މަހު ގޭބިސީތަކުގެ ފެން ބިލުތަކަށް ޑިސްކައުންޓް ދިނުމަށްޓަކައި، އެމްޑަބްލިއުއެސްސީ އިން ޑިސްކައުންޓް ދިނުމުގެ އުސޫލު ވަނީ އާއްމުކޮށްފައެވެ.
އެ އުސޫލްގައިވާ ގޮތުން އަންނަ އޭޕްރީލް މަހު ގޭބިސީތަކަށް ފޮނުވާ ބިލުތައް އާއްމު މަހަކަށްވުރެ ބޮޑު ނުވާނެ ގޮތަށް ޑިސްކައުންޓް ދިނުމަށް ވަނީ ނިންމާފައެވެ.
އެގޮތުން އާއްމު މަހެއްގެ ފެނުގެ މިންވަރު ކަނޑައަޅާނީ 2024 ވަނަ އަހަރުގެ ފެބްރުއަރީ، މާޗު އަދި އޭޕްރީލް މަސް ނުހިމަނައި، އެ އަހަރުގެ ބާކީ އޮންނަ 9 މަހުގެ އެވްރެޖަށް ބަލައިގެންކަމަށް އެ ކުންފުނިން ބުނެއެވެ.
އެމްޑަބްލިޔުއެސްސީން ބުނީ އޭޕްރީލް މަހަށް ތައްޔާރުކުރާ ބިލު، އާއްމު މަހުގެ ބިލަށް ވުރެ ބޮޑުވާ ނަމަ، އެ ބޮޑުވާ މިންވަރުޑިސްކައުންޓުގެ ގޮތުގައި އެއްކޮށް އުނިކޮށްދޭނެ ކަމަށެވެ. އަދި އުނިކޮށްދެވޭ މިންވަރަކީ އޭޕްރީލް މަހު ފޮނުވާ ބިލުގެ 10 އިންސައްތައަށްވުރެ ކުޑަ މިންވަރެއް ނަމަ ޑިސްކައުންޓުގެ މިންވަރު 10 ޕަސެންޓާ އެއްވަރަށް މަތިކޮށްދޭން ނިންމާފައިވާކަމަށްވެސް އެމްޑަބްލިޔުއެސްސީން ބުނެއެވެ.
މީގެއިތުރުން އާއްމު މަހުގެ ބިލަށް ވުރެ އޭޕްރީލް މަހު ފޮނުވާ ބިލުގެ އަދަދު ކުޑަ ނަމަ ޑިސްކައުންޓުގެ ގޮތުގައި އޭޕްރީލް މަހު ފޮނުވާ ބިލުން 10 އިންސައްތަ އުނިކޮށްދޭނެކަމަށްވެސް އެ ކުފުންފުނިން ބުނެއެވެ.
އޭޕްރީލް މަހު އަލަށް ބިލް ކުރާ މީޓަރުތަކަށާއި ކުރިން ރަޖިސްޓަރީ ކޮށްފައިވީ ނަމަވެސް މިހާތަނަށް ބިލް ނުކުރާ ކަސްޓަމަރުންނަށް ފޮނުވާ ފުރަތަމަ ބިލަކީ އޭޕްރީލް މަހުގެ ބިލުް ނަމަ އެ ކަސްޓަމަރުންގެ ބިލުންވެސް 10 އިންސައްތަ ޑިސްކައުންޓް ދޭނެކަމަށްވެސް އެމްޑަބްލިޔުއެސްސީން ބުނެއެވެ.
ރޯދަމަހަށް ޑިސްކައުންޓް ދިނުމުގެ އުސޫލާއި ގުޅޭގޮތުން އެއްވެސް ސުވާލެއް އޮތް ނަމަ އެ ކުންފުނީގެ ހޮޓްލައިން 105 އަށް ނުވަތަ 1050 އަށް އެސްއެމްއެސް ކޮށްގެން ނުވަތަ [email protected] އަށް މެއިލް ކޮށްގެން މައުލޫމާތު ލިބޭނެ ކަމަށް އެމްޑަބްލިއުއެސްސީން ބުނެެއެވެ.