މުލީ އެއަރޕޯޓްގެ ޓެސްޓް ފްލައިޓް ޖޫން މަހުގެ ފުރަތަމަ ދުވަހު ބޭއްވުމަށް ހަމަޖެހިފައިވާ ކަމަށް ރީޖަނަލް އެއަރޕޯޓްސް ކުންފުނިން ބުނެފިއެވެ.
އެއަރޕޯޓް ތަރައްޤީކުރުމުގެ މަޝްރޫއުގެ 85 ޕަސަންޓް މަސައްކަތް ވަނީ ނިމިފައި ކަމަށާއި، ބޮޑެތި މަސައްކަތްތައް މިހާރު ވަނީ ނިންމާފައިވާ ކަމަށްވެސް އެ ކުންފުނީގެ މެނޭޖިން ޑިރެކްޓަ އަހުމަދު މުބީން ދައުލަތުގެ މީޑިއާ މެދުވެރިކުރައްވައި ވިދާޅުވިއެވެ.
މަޝްރޫއުގެ މަސައްކަތް ކުރަމުންގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ހަވާލުކޮށްގެންނެވެ. އެމްޓީސީސީން ދެއްވި މައުލޫމާތުން އެނގޭ ގޮތުގައި މިވަގުތު ކުރަމުންދަނީ ޓަރމިނަލް އަދި އެހެނިހެން އިމާރާތްތަކުގެ ފިނިޝިންގެ މަސައްކަތްތަކެވެ. އެއަރޕޯޓްގެ ރަންވޭގެ ހުރިހާ މަސައްކަތްތައް މިހާރު ވަނީ ނިމިފައެވެ. ޓަރމިނަލަށް ބޭނުންވާ ސާމާނު ހޯދުމުގެ މަސައްކަތްތަކަކީވެސް މިވަގުތު ކުރިއަށްދާ އެންމެ މުހިންމު މަސައްކަތެއްކަމަށް އެމްޓީސީސީން ބުނެފައިވެއެވެ.
ރަންވޭގެ ވަށައިގެން ހިއްކާ ސަރަހައްދުގެ ބޮޑު ހިލައިގެ ރިވެޓްމަންޓްގެ މަސައްކަތް ނިންމާ، ހިއްކަން ޖެހޭ ހިސާބަށް ވެލި އެޅުމުގެ މަސައްކަތްވެސް ދަނީ ކުރަމުންނެވެ. ބިން ހިއްކުމުގެ 90 ޕަސަންޓް މަސައްކަތްވެސް ވަނީ ނިމިފައެވެ. އެތެރޭގެ އުދުހުންތަކަށް ހާއްސަ އެއަރޕޯޓެއްގެ ގޮތުގައި ތަރައްޤީކުރާ މި އެއަރޕޯޓަކީ 1200 މީޓަރު ދިގު އަދި 30 މީޓަރު ފުޅާ ރަންވޭއަކާއެކު ތަރައްޤީކުރާ އެއަރޕޯޓެކެވެ.
ކުރިއަށް އޮތް ދެ މަސްތެރޭގައި މަސައްކަތްތައް ނިންމާ، ރަންވޭއަށް ޓެސްޓް ފްލައިޓް ބޭއްވުމުގެ މަސައްކަތްތައް ދަނީ ކުރިއަށެވެ. މުލީ އެއަރޕޯޓްގެ މަޝްރޫއަށް ސަރުކާރުން ހަރަދުކުރަނީ 221 މިލިޔަން ރުފިޔާއެވެ. އެމްޓީސީސީން ބުނާގޮތުގައި މަސައްކަތުގައި ބައެއް ލަސްތައް އުޅެނީ، އެއަރޕޯޓަށް ކޮންޓްރެކްޓަރަށް ބޭނުންވާ ބައެއް ވަސީލަތްތައް ރާއްޖެއިން ބޭރުން ގެނައުމުގައި ދަތިތަކެއް ހުރުމުންނެވެ.
މ. އަތޮޅަކީ ރާއްޖޭގައި އެއަރޕޯޓެއް ނެތް މަދު އަތޮޅުތަކުގެ ތެރޭގައި ހިމެނޭ އެއް އަތޮޅެވެ. މ. އަތޮޅުގައި މީހުން ދިރިއުޅޭ 8 ރަށް އޮންނައިރު، އަތޮޅުގެ އާބާދީ އުޅެނީ 8000 އިން ދަށުގައެވެ. މ. މުލީގައި އެއަރޕޯޓް ތަރައްޤީކުރުމުގެ މަސައްކަތް ފަށާފައިވަނީ 2022 ވަނަ އަހަރުގެ ކުރީކޮޅުއެވެ.
