
މިދިޔަ ސަރުކާރުން އެކުލަވާލި ފްލެޓް ލިސްޓް އަލުން ރިވިއުކުރުމަށްފަހު މި ސަރުކާރުން އާއްމުކުރީ މިދިޔަ މަހުގެ 27 ވީ ބުރާސްފަތި ދުވަހުއެވެ. ސަރުކާރުން އާއްމުކުރި ލިސްޓުގައިވާ ގޮތުން މިހާރު ފްލެޓް ހައްގުވާ މީހުންގެ އަދަދު ވަނީ 1،820 އަށް މަދުވެފައެވެ. އެ ލިސްޓަށް ޝަކުވާ ހުށައެޅުމުގެ ފުރުސަތު ހުޅުވާލީ މިމަހުގެ އެއްވަނަ ދުވަހުން ފެށިގެންނެވެ.
ޝަކުވާ ހުށައެޅުމަށް ހުލޫވާލި ފުރުސަތުގައި މި ތިން ދުވަހުގެ ތެރޭގައި 675 ޝަކުވާ ލިބިފައިވާކަމަށް ހައުސިން މިނިސްޓްރީން ބުނެއެވެ. އޭގެތެރޭގައި ހިމެނެނީ ތިން ކޮޓަރީގެ ފްލެޓް ލިސްޓާ ގުޅިގެން ހުށައެޅި 452 ޝަކުވާއަކާއި ދެ ކޮޓަރީގެ ފްލެޓް ލިސްޓާ ގުޅިގެން ހުށައެޅި 223 ޝަކުވާއެކެވެ.
ފްލެޓް ލިސްޓަށް ޝަކުވާ ހުށައެޅުން މިމަހުގެ ނިޔަލަށް ވަނީ ހުޅުވާލާފައެވެ.
ޝަކުވާ ހުށައަޅަން ޖެހޭގޮތް
- ފޯމް ހުށަހަޅާފައިވާ ފަރާތެއްނަމަ އެފަރާތުގެ ފޯމާއި ގުޅޭ ޝަކުވާ 'ގެދޮވެރިން ޕޯޓަލް' މެދުވެރިކޮށް.
- ލިސްޓުގައިވާ ފަރާތަކާއި ގުޅޭ ޝަކުވާއެއް ނަމަ [email protected] އީމެއިލްއަށް ނުވަތަ މިނިސްޓްރީއަށް އެޑްރެސްކޮށް ފޮނުވޭ ސިޓީއަކުން.
މީގެ އިތުރުން، ޝަކުވާ ހުށަހެޅުއްވުމުގެ މުއްދަތުގެ ތެރޭގައި ޝަކުވާ ހުށަހެޅުއްވުމުގެ ކަންކަން ކުރިޔަށްގެންދާނެ ގޮތާއި ގުޅޭ އިތުރު މަޢުލޫމާތު ސާފުކުރުމަށް މި މިނިސްޓްރީގެ ނަންބަރު 4004911 އަދި 4004910 ފޯނަށް ގުޅުއްވައިގެން މަޢުލޫމާތު ސާފުކުރެވޭނެ ގޮތް ހަމަޖެހިފައިވާކަމަށްވެސް ހައުސިން މިނިސްޓްރީން ބުނެއެވެ.
މި ސަރުކާރުން އަލުން ބެލުމަށްފަހު އާއްމުކުރި ފްލެޓް ލިސްޓުގައިވާ ގޮތުން ތިން ކޮޓަރީގެ ފްލެޓަށް ކުރިމަތިލީ މީހުންގެ ތެރެއިން ޝަރުތު ހަމަވީ 1،423 މީހެކެވެ. އަދި ދެ ކޮޓަރީގެ ފްލެޓަށް ކުރިމަތިލީ މީހުންގެ ތެރެއިން ޝަރުތު ހަމަވީ 397 މީހެކެވެ.
ހައުސިން މިނިސްޓްްރީން ވަނީ 2،695 މީހެއްގެ ފޯމް ޝަރުތު ހަމަނުވާ ކަމަށް ކަނޑައަޅާފައިއެވެ. އަދި 424 ފަރާތެއް ޕޮއިންޓަށް އައި ބަދަލާ އެކު އެމީހުން ވަނީ ލިސްޓުން އުނިވެފައިވެއެވެ.
އިންޑިއާގެ އެގްޒިމް ބޭޭންކުގެ އެހީގައި ހުޅުމާލޭގައި އަޅާ 400 ފްލެތްގައި ހިމެނެނީ ތިން ކޮޓަރީގެ 2،750 ފްލެޓާއި ދެ ކޮޓަރީގެ 1،250 ފްލެޓުތަކެވެ.