
ޕާޓީ ބަދަލުކުރުމުން މަޖިލިސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހު ބާތިލްކުރުމަށް ސުޕްރީމް ކޯޓަށް ހުށަހަޅާފައިވާ މައްސަލަ ބައްލަވަމުން ގެންދެވި ފަނޑިޔާރު ހުސްނުއްސުއޫދު މިއަދު ވަނީ އިސްތިއުފާ ދެއްވާފައެވެ. އޭނާ އިސްތިއުފާ ދެއްވީ ސަރުކާރުން ނުފޫޒު ފޯރުވަމުންދާތީ ކަމަށް ވަނީ ތުހުމަތުކުރައްވާފައެވެ.
މި ހާދިސާއާ ގުޅިގެން އެމްޑީޕީން ނެރުނު ބަޔާނުގައި ބުނީ، ފަނޑިޔާރު ސުއޫދު ތުހުމަތުކުރައްވާފައިވާ ގޮތަށް ރައީސް މުއިއްޒު ދުސްތޫރީ މައްސަލަ ވަކި ގޮތަކަށް ނިންމަން ނުފޫޒު ފޯރުވާކަމަށް ވާނަމަ، އެކަމާ ގުޅޭ ތަހުގީގެއް ހިންގުމަށް ދައުލަތުގެ ހުރިހާ އިދާރާތަކަށް ގޮވާލާކަމަށެވެ.
އެމްޑީޕީގެ ބަޔާނުގައި އިތުރަށް ފާހަގަކޮށްފައިވަނީ ސުޕްރީމް ކޯޓުގައި އޮތް އެ ދުސްތޫރީ މައްސަލައިގެ ބެންޗުގެ ފަނޑިޔާރުންގެ މައްސަލަ ސަރުކާރުގެ ފުރިހަމަ ކޮންޓްރޯލް އޮތް ޖޭއެސްސީ އަދި އޭސީސީން އެއްވެސް އަސާސެއް ނެތި ބަލަމުންދާކަމަށެވެ. މިއީ ސަރުކާރުން ބޭނުންވާ ގޮތަކަށް އެ މައްސަލަ ނިންމުމަށް ކުރާ މަސައްކަތްތަކެއް ކަމަށް އެމްޑީޕީން ފާހަގަކޮށްފައިވެއެވެ. އަދި މިކަމާ ގުޅިގެން އެމްޑީޕީން ވަނީ ރާއްޖޭގެ ދުސްތޫރީ ނިޒާމު ފުނޑާލަން ރައީސް މުއިއްޒު ދެމުންގެންދަވާކަމަށް ބުނާ ހަމަލާތައް ތަހުގީގުކުރުމަށް ގޮވާލާފައެވެ.
އެމްޑީޕީން ބުނީ ދައުލަތުގެ ތިން ބާރު ރައީސް މުއިއްޒުގެ އަތްޕުޅަށް މަހާލުމަށް ވެރިކަންކުރާ ޕާޓީ، ޕީއެންސީން ކުރާ ކަންކަމާ ދެކޮޅަށް މެދުކެނޑުމެއް ނެތި އިހުތިޖާޖުކުރުމަށް ގޮވާލާކަމަށެވެ. އެމްޑީޕީން އިތުރަށް ބުނެފައިވަނީ ފަނޑިޔާރުގެ މިނިވަންކުރުމަށް ކުރަންޖެހޭ ކަންކަން ކުރުމަށް ވެސް ސަރުކާރަށް ގޮވާލާކަމަށެވެ. ރައީސް މުއިއްޒުގެ ސަރުކާރުން ދުސްތޫރީ ނިޒާމަށް ދެމުންގެންދާ ހަމަލާތަކަށް ހަރުކަށި އަދަބު ދިވެހި ރައްޔިތުން ދޭނެކަން ވެސް އެމްޑީޕީގެ ބަޔާނުގައި ހަނދާންކޮށްދީފައިވެއެވެ.