ސަރުކާރުން ފަނޑިޔާރުންނަށް ބިރުދައްކާ އަދުލު އިންސާފުގެ ނިޒާމަށް ނުފީޒު ފޯރުވަމުން ގެންދަވާކަމަށް ވިދާޅުވެ ސުޕްރީމްކޯޓުގެ ފަނޑިޔާރުކަމުން ހުސްނުއްސުއޫދު އިސްތިއުފާދެއްވީ އިއްޔެ އެވެ.
އެކަމާއި ގުޅިގެން ޑރ މުނައްވަރު އެކްސްގައި ކުރެއްވި ޕޯސްޓެއްގައި ވިދާޅުވީ ހުސްނުއް ސުއޫދަކީ ގާނޫނީ ދާއިރާއިން ރާއްޖޭގެ އުފެދުނު އެންމެ މޮޅު އެއް ބޭފުޅާކަމަށެވެ. އެގޮތުން ގާނޫނީ ދާއިރާގެ އެންމެ ތިރިން ފެށިގެން އެކި މަރުހަލާގައި ހުސްނުއް ސުއޫދު މަސައްކަތް ކުރައްވާފައިވާކަން ޑރ. މުނައްވަރު ފާހަގަކުރެއްވި އެވެ.
މުނައްވަރު ވަނީ ސުއޫދުގެ ނިންމުމަށް ސެލިއުޓް ކުރައްވާކަމަށް ވިދަޅުވެފަ އެވެ. އަދި ސުއޫދުގެ ނިންމެވުމަށާއި ކުރެއްވި ހިދުމަތްތަކަށް މުނައްވަރު ވަނީ މަރުހަބާ ވިދާޅުވެފަ އެވެ.
އިސްތިއުފާދެއްވާ ރައީސް ޑރ. މުހައްމަދު މުއިއްޒަށް ސުއޫދު ފޮނުއްވި ސިޓީއެއްގައި ވިދާޅުވީ ރައްޔިތުންގެ މަޖިލިހުގެ މެމްބަރުންގެ ގޮނޑި ގެއްލޭ މައްސަލަ ބެލުމުގެ އިހްތިސާސް ސުޕްރީމް ކޯޓަށް ލިބިގެންވާ ކަމަށް އެ ކޯޓުން ނިންމުމާއެކު، ސަރުކާރުގެ ފަރާތުން ގާނޫނު އަސާސީއާ ހިލާފަށް ރާއްޖޭގެ އަދުލު އިންސާފުގެ ބާރަށް ނުފޫޒު ފޯރުވަމުންދާ ކަމަށެވެ.
އަދި ސުޕްރީމް ކޯޓަށް ހުށަހަޅާފައިވާ އެ މައްސަލަ އެ ކޯޓުގައި ބެލުން ހުއްޓުވުމުގެ ގޮތުން ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށް، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް މަޖިލީހުން ބިލެއް ފާސްކޮށް، ސުޕްރީމް ކޯޓުގެ ހުރިހާ ފަނޑިޔާރުންނަށް ބިރު ދައްކަމުންދާ ކަމަށްވެސް ސުއޫދު ވިދާޅުވި އެވެ.
