
އެމަނިކުފާނު މިފަދައިން ވިދާޅުވީ ބައިނަލްއަގުވާމީ އަންހެނުންގެ ދުވަހުގެ މުނާސަބަތުގައި މިއަދު ދެއްވި ހާއްސަ ހިތާބުގައެވެ.
ރައީސް މުއިއްޒުގެ ހިތާބުގައި ދިވެހި ތާރީހުގެ އެންމެ އެވޭލާ ލިޔެކިޔުންތަކުގައިވެސް ދިވެހި އަންހެނުންގެ ހީވާގިކަމާއި، މުރާލިކަމާއި، ގައުމީ އަދި އިޖްތިމާއީ ކަންކަމުގައި ދޭ ބޮޑު އަހައްމިއްޔަތުގެ ވާހަކަތައް ފެންނަން ހުރިކަން ފާހަގަކުރައްވާފައިވެއެވެ. އަދި އަންހެނުންނަކީ ދިވެހި އާއިލާތަކަށް އޯގާތެރިކަމާއެކު ހޭހަންކުރާ މަދަދުގާރުން ކަމުގައި ސިފަކުރައްވާފައިވެއެވެ.
ދިވެހި ސަރުކާރުގެ އެންމެ އިސް އެއް ސިޔާސަތަކީ، މުޖުމަތައުގައި އަންހެން ދަރީންނަށް އޮތް ފުރުސަތުތައް އިތުރަށް ފަހިކޮށްދީ، ސަރުކާރު ހިންގުމުގައި އަންހެނުންގެ ހިއްސާ އިތުރުކުރުމާއެކު އަންހެނުންނަކީ ފުދުންތެރި، ބާރުވެރި ބަޔަކަށް ހެދުން ކަމަށްވެސް ރައީސް ވިދާޅުވިއެވެ.
ރައީސް މުއިއްޒު ވަނީ "އަންހެނަކަށް އުނގަންނައި ދިނުމަކީ ޖީލަކަށް އުނގަންނައިދިނުން" ކަމަށް ބުއްދިވެރި ބަހެއްގައި ބުނާކަން ވެސް ފާހަގަކުރައްވާފައިވެއެވެ. އަދި ސާނަވީއާއި މަތީ ސާނަވީ އަދި ޔުނިވަސިޓީ ތައުލީމުގެ މަރުހަލާގައިވެސް ދިވެހި އަންހެން ކުދިން ގިނައިން އުނގެނޭއިރު، މަތީ ނަތީޖާ ހޯދާ ގިނަ ދަރިވަރުންނަކީވެސް އަންހެން ދަރީންކަން ފާހަގަކުރައްވައި، މިއީ ދިވެހި ގައުމުގެ ކުރިމަގަށް އޮތް ހެޔޮ ފާލެއް ކަމުގައި ސިފަކުރައްވާފައިވެއެވެ.
ހަމައެއާއެކު، ދިވެހިންނަކީ މުސްލިމުންކަމަށް ވާ ހިނދު، އަންހެނުންގެ ހައްގުތައް އެންމެ ހެޔޮ ގޮތުގައި ކަނޑައަޅައިދީ، މުޖްމަތައުގައި އަންހެނުންގެ ގަދަރާއި އިއްޒަތާއި މަގާމް މަތިވެރިކޮށްދިނީ އިސްލާމްދީން ކަމަށްވެސް ރައީސް މުއިއްޒު ވިދާޅުވިއެވެ. އިންސާނާ އެންމެ ހެޔޮކޮށް ހިތައި އޯގާތެރިވާން ޖެހޭނެ ތިން މީހުންނަކީވެސް އޭނާގެ މަންމަކަމުގައި އިރުޝާދު ދެއްވީ މާތް ރަސޫލާ މުހައްމަދު ކަމަށް ރައީސް ހަނދާންކޮށްދެއްވިއެވެ.