މި ބައްދަލުވުން ބޭއްވުނީ ބާލިންގައި ކުރިއަށްގެންދިޔަ އައިޓީބީ 2025 ޓޫރިޒަމް ފެއާގައެވެ.
މިނިސްޓަރު ތޯރިގު އާއި ވިލާ ރިސޯޓްސްގެ އިސްވެރިން ދެމެދު ކުރިއަށްގެންދިޔަ މަޝްވަރާތަކުގައި ރާއްޖޭގެ ޓޫރިޒަމް ދާއިރާގެ ދެމެހެއްޓެނިވި ތަރައްޤީއާއި ކުރިއެރުމަށް ސަރުކާރާއި އިންޑަސްޓްރީ ގުޅިގެން މަސައްކަތްކުރުމުގެ މުހިންމުކަމާ ބެހޭގޮތުން ވާހަކަދެކެވުނެވެ.
މިނިސްޓަރު ތީރިގު ވިދާޅުވީ، ދާއިރާގެ ގޮންޖެހުންތަކަށް ހައްލު ހޯދުމަށް ދެފަރާތުގެ މެދުގައި އޮންނަ ގުޅުން އިތުރަށް ހަރުދަނާކުރުމަކީ މުހިންމު ކަމެއް ކަމަށެވެ.
ވިލާ ރިސޯޓްސްގެ ފަރާތުން މި ބައްދަލުވުމުގައި ބައިވެރިވި އިސްވެރިން ވިދަޅުވީ ސަރުކާރުގެ އެހީތެރިކަމާއެކު ރާއްޖޭގެ ޓޫރިޒަމް އިތުރަށް ކުރިއެރުވުމަށް ގިނަގުނަ މަސައްކަތްތަކެއް ކުރަމުންދާ ކަމަށެވެ. އަދި ކުރިއަށް އޮތްތަނުގައިވެސް މި މަސައްކަތް ހަލުވިކަމާއެކު ކުރިއަށް ގެންދާނެ ކަމަށްވެސް ވިލާ ރިސޯޓްސްގެ އިސްވެރިން ވިދާޅުވިއެވެ.
މިނިސްޓަރު ތޯރިގު ވިދާޅުވީ މި އަހަރުގެ ބާލިން ފެއާއަކީ ވަރަށް ކާމިޔާބު ފެއާއެއް ކަމަށެވެ.
އައިޓީބީ 2025 ފެއާގައި ރާއްޖެއިން 89 ކުންފުންޏެއް ތަމްސީލްކުރާ 200 މަންދޫބުން ބައިވެރިވެފައިވާއިރު، މި ފެއާގައި ރާއްޖެ ތަމްސީލްކުރުމަށް 504 އަކަމީޓަރުގެ ޑަބަލް ޑެކާ ސްޓޭންޑެއް ހާއްސަކޮށްފައިވެއެވެ. މި ސްޓޭންޑުގައި ވީއައިޕީ މީޓިންގ ރޫމަކާއި ތިން އިންޑަސްޓްރީ މީޓިންގ އޭރިއާ ހިމެނެއެވެ. މީގެއިތުރުން ރާއްޖޭގެ ސަގާފަތް ދައްކުވައިދޭ ޓްރެޑިޝަނަލް ކޯނަރެއްވެސް ސްޓޭންޑުގައި ޤާއިމުކޮށްފައިވެއެވެ.
ޓޫރިޒަމް ފެއާގައި ކުރެވުނު މަސައްކަތްތަކުގެ ސަބަބުން ކުރިއަށް އޮތް މަސްތަކުގައި ރާއްޖެއަށް ޓޫރިސްޓުން އަންނަ މިންވަރު އިތުރުވާނެކަމަށް ބެލެވޭ ކަމަށްވެސް މިނިސްޓަރު ތޯރިގު ފާހަގަކުރެއްވިއެވެ.
