މި ކުއްލި މައްސަލަ މަޖިލީހުގެ މިއަދުގެ ޖަލްސާއަށް ހުށައެޅުއްވީ ހިތަދޫ ދެކުނު ދާއިރާގެ އެމްޑީޕީ މެމްބަރު އިބްރާހިމް ނާޒިލްއެވެ.
މި މައްސަލަ ބަލައިގަންނަން ފެނޭތޯ ނެގި ވޯޓްގައި ބަލައި ގަންނަން ނުފެންނަކަމަށް ވެރިކަން ކުރާ ޕީއެންސީގެ 47 މެންބަރުން ވޯޓްދެއްވާ އެ މައްސަލަ ވަނީ މަޖިލީހުން ބޭރުކޮށްލާފައެވެ. މައްސަލަ ބަލައިގަންނަން ފެންނަކަމަށް ވޯޓް ދެއްވީ 13 މެމްބަރުންނެވެ. އޭގެތޭރެގައި ހިމެނެނީ އެމްޑީޕީގެ 12 މެމްބަރުންގެ އިތުރުން ޕީއެންސީގެ އައްޑޫ ހިތަދޫ މެދު ދާއިރާގެ އަހުމަދު އަޒާން މަރުޒޫގުއެވެ.
ހިތަދޫ ދެކުނު ދާއިރާގެ އެމްޑީޕީ މެމްބަރު އިބްރާހިމް ނާޒިލް
ނާޒިލް ހުށަހެޅުއްވި ކުއްލި މައްސަލައިގައި ބުނީ އައްޑޫއިން ކަރަންޓު ކެނޑެމުން ދިޔުމުގެ ސަބަބުން އެ ސިޓީގެ ރަައްޔިތުންގެ އަގުބޮޑު މުދަލަށް ގެއްލުންވަމުންދާކަމަށެވެ. އަދި ރައްޔިތުން ދިރިއުޅެމުން ދަނީ ހާސްކަމާއި ދަތިކަމުގެ ތެރޭގައި ކަމަށެވެ.
އައްޑޫ ކަރަންޓުން ކެނޑޭ މައްސަލަ ހައްލުކުރަން ބޭނުންވަނީ 3 މެގޮވޮޓްގެ ޖަނަޜޭޓަރެއްކަމަށް އައްޑޫ ސެންޓަރަލް ޕަވާ ސްޓޭޝަނުން ބުނަމުންދިޔަ ނަމަވެސް ސަރުކާރުން އެ ސިޓީއަށް ގެންދިޔައީ 1.8 މެގަވޮޓްގެ ޖަނަރޭޓަރެއްކަމަށް ނާޒިލް ފާހަގަކުރެއްވިއެވެ. މީގެއިތުރުން އައްޑޫ ސިޓީ ކަރަންޓްގެ މައްސަލަ ހައްލުކުރަން ސަރުކާރުން އެކި ތާރީހުތައް ދިންނަމަވެސް މިހާތަނަށްވެސް އެކަމަށް އެކަށީގެންވާ މަސައްކަތެއް ކޮށްފައި ނުވާކަމަށް ނާޒިލް ހުށައެޅުއްވި ކުއްލި މައްސަލާގައި ވަނީ ފާހަގަކޮށްފައެވެ.
އައްޑޫ ކަރަންޓްގެ މައްސަލަ ހައްލުކުރުމަށް ރޯދައިގެ ކުރިން ވަނީ 1.8 މެގްވޮޓްގެ ޖަނެރޭޓަރެއް އެ ސިޓީއަށް ގެންގޮސް އެ ބޭނުންކުރަން ފަށާފައެވެ. އެހެންނަމަވެސް ކަރަންޓް ކެނޑުން ހައްލު ނުވާތީ އިތުރު 1.8 މެގަވޮޓްގެ ޖަނެރޭޓަރެއް މި ހަފްތާގައި ގެންދާނެކަމަށް އެ ސިޓީއަށް ކަރަންޓްގެ ހިދުމަތް ދެމުން އަންނަ ފެނަކައިން ވަނީ ބުނެފައެވެ.
