ދައުލަތުގެ މީޑިއާ މެދުވެރިކުރައްވައި ވާހަކަ ދައްކަވަމުން މިނިސްޓަރު ވިދާޅުވީ، ބޭސް އެތެރެކުރުމުގައި ޒަމާންވީ ނަހަމަ ވިޔަފާރިއާއި ނިޒާމީ އިސްރާފް ހުއްޓުވައި، ރައްޔިތުންނަށް ކޮލިޓީ ބޭސް ފޯރުކޮށްދިނުމަށް ސަރުކާރުން ފަށާފައިވާ މަސައްކަތުގައި ގިނަ ގޮންޖެހުންތަކެއް ކުރިމަތިވެފައިވާކަމަށް ހެލްތު މިނިސްޓަރު ފާހަގަކުރެއްވިއެވެ. ނިޒާމަށް ގެނެވުނު ބަދަލުތަކާއެކު ބާޒާރުގައި ބޭސް ލިބުމުގައި ދަތިތަކެއް ކުރިމަތިވެފައިވާކަން މިނިސްޓަރު ވަނީ ފާހަގަކުރައްވާފައެވެ.
ރާއްޖެއަށް ބޭސް އެތެރެކުރުމުގައި 2000 ޕަސަންޓާ ހަމައަށް ފައިދާ ލައިގެން ބޭސް ވިއްކަމުންދިޔަކަން ސަރުކާރުން އާސަންދަ އިސްލާހުކުރުމަށް ކުރަމުންދިޔަ މަސައްކަތުގެ ތެރެއިން ފާހަގަވެފައިވާކަމަށް އޮފީހުން ބުނެއެވެ. މިކަން ހައްލުކޮށް އާސަންދަ ހަރުދަނާކުރުމަށް ބަލްކް ޕްރޮކިއުމަންޓް އުސޫލުން ރާއްޖެއަށް ކޮލިޓީ ބޭސް އެތެރެކުރުމުގެ މަސައްކަތް މިހާރު ވަނީ ފަށާފައެވެ.
ބޭހުގެ ކަންކަން ހަމައަކަށް އެޅުވުމަށް މީގެކުރިން އެއްވެސް ސަރުކާރަކުން އިސްކަން ނުދެއްވާ މިންވަރަށް މިހާރުގެ ސަރުކާރުން މަސައްކަތް ކުރަމުންދާކަމަށް މިނިސްޓަރު ފާހަގަކުރެއްވިއެވެ. އަދި ބޭހުގެ މައްސަލަ ހައްލުކުރުމަށް ކުރަންޖެހޭ ހުރިހާ މަސައްކަތެއްގެ ޒިންމާ ސަރުކާރުން ނަގައި، އެކަމަށް ދާއިމީ ހައްލެއް ގެނެސްދޭނެކަމުގެ ޔަގީންކަން ހެލްތު މިނިސްޓަރު ވަނީ ދެއްވާފައެވެ.
ކޮލިޓީ ބޭސް އަގުހެޔޮކޮށް ލިބޭނެ އިންތިޒާމު ހަމަޖެއްސުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެއްކަމަށާއި، މިކަމަށް ހުރަސްއެޅުމުގެ ގޮތުން އެކިއެކި ފަރާތްތަކުން ކުރާ މަސައްކަތްތަކަށް ބެލުމެއްނެތި، މިމަސައްކަތް ކުރިއަށް ގެންދާނެކަމަށް ސަރުކާރުން ވަނީ އަޒުމު ކަނޑައަޅާފައެވެ.
