މިމަހު އިމްޕޯޓް އެކްސްޕޯޓްގެ ސަބަބުން ދައުލަތަށް 363 މިލިޔަން ރުފިޔާ ލިބިފައިވާކަން ކަސްޓަމްސްއިން އާންމުކޮށްފައިވާ ތަފާސްހިސާބުތަކުން ހާމަވެއެވެ.
ފެބްރުއަރީ މަހު އިމްޕޯޓްކުރެވުނު މުދަލުގެ ތެރެއިން އެންމެ ގިނައިން ހަރަދުކޮށްފައިވަނީ ތެލާއި މެޝިނަރީސް އަދި ކާބޯތަކެތި ގެނައުމަށެވެ. ކަސްޓަމްސްގެ ތަފާސްހިސާބުތަކުން ދައްކާގޮތުން ތެލަށް 0.8 ބިލިއަން ރުފިޔާ ހަރަދުކޮށްފައިވާއިރު، މެޝިނަރީސް އާއި ކާބޯތަކެއްޗަށް 1.7 ބިލިއަން ރުފިޔާ ހަރަދުކޮށްފައިވެއެވެ.
ރާއްޖެއަށް އެންމެ ގިނައިން މުދާ އެތެރެކޮށްފައިވަނީ ޔޫއޭއީ އަދި އިންޑިއާއިންނެވެ. މީގެއިތުރުން ޗައިނާ، ސިންގަޕޫރު އަދި ސްރީލަންކާއިން ވެސް ގިނަ ޢަދަދަކަށް މުދާ އެތެރެކޮށްފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.
އަދި ފެބްރުއަރީ މަހު ރާއްޖެއިން ބޭރުކުރި މުދަލުގެ ތެރޭގައި ގިނައީ މަހުގެ ބާވަތްތަކެވެ. މި ބާވަތްތައް އެންމެ ގިނައިން އެކްސްޕޯޓް ކޮށްފައިވަނީ ތައިލެންޑް، އިނގިރޭސިވިލާތް، އިންޑިއާ، ވިއެޓްނާމް އަދި ބަންގްލަދޭޝްއަށެވެ.
ކަސްޓަމްސްގެ ތަފާސްހިސާބުތަކުން އިތުރަށް ދައްކާގޮތުން، ފެބްރުއަރީ މަހު މުދަލާއެކު ރާއްޖެއަށް 155 އުޅަނދު އެތެރެވެފައިވާއިރު، 155 އުޅަނދު ރާއްޖެއިން ބޭރަށް ފުރައިގެން ގޮސްފައިވެއެވެ.
