މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ގެ ޤާބިލުކަން އިތުރަށް ރަނގަޅުކޮށް ރާއްޖޭގެ ޓޫރިޒަމް ދާއިރާގައި އެ ކުންފުނީގެ ހިއްސާ އިތުރުކުރުމަށް މަސައްކަތް ކުރާނެ ކަމަށް، ޓޫރިޒަމް މިނިސްޓަރު ތޯރިގު އިބްރާހީމް ވިދާޅުވެއްޖެއެވެ.
ޓޫރިޒަމް މިނިސްޓަރާއި އެމްޓީޑީސީގެ މެނޭޖިން ޑިރެކްޓަރު އަހުމަދު ނިޔާޒާ ދެމެދު ބޭއްވުނު ބައްދަލުވުމުގައި ރާއްޖޭގެ ޓޫރިޒަމް ސިނާއަތުގައި އެމްޓީޑީސީގެ މުހިންމުކަން އިތުރުކުރުމާއި، އެ ކުންފުނީގެ މަސައްކަތްތައް ފުޅާކުރުމާ ގުޅޭގޮތުން މަޝްވަރާކުރެވުނެވެ.
އެމްޓީޑީސީގެ މެނޭޖިން ޑިރެކްޓަރު އަހުމަދު ނިޔާޒު ވިދާޅުވީ ކުރިއަށް އޮތްތަނުގައި ޓޫރިޒަމް މިނިސްޓްރީއާ ގުޅިގެން އިތުރު މަސައްކަތްތަކެއް ކުރުމަށް އެ ކުންފުނިން ތައްޔާރަށް ތިބިކަމަށެވެ. މި ބައްދަލުވުމުގައި ޓޫރިޒަމް ދާއިރާ ކުރިއެރުވުމަށް އިތުރަށް ކުރެވިދާނެ މަސައްކަތްތަކާ ގުޅޭގޮތުންވެސް މަޝްވަރާކުރެވުނެވެ.
ޓޫރިޒަމް މިނިސްޓްރީން ބުނީ ކުރިއަށް އޮތްތަނުގައި އެމްޓީޑީސީން ޓޫރިޒަމް ދާއިރާއަށް އިތުރު ހިއްސާއެއް ކުރެވިދާނެ ދާއިރާތަކާ ބެހޭގޮތުންވެސް މި ބައްދަލުވުމުގައި މަޝްވަރާކުރެވުނު ކަމަށެވެ. އަދި ދެ ފަރާތުން ގުޅިގެން ޓޫރިޒަމް ދާއިރާ ކުރިއެރުވުމަށް މަސައްކަތްކުރުމަށް އެއްބަސްވެފައިވާ ކަމަށްވެސް ޓޫރިޒަމް މިނިސްޓްރީން އިތުރަށް ބުންޏެވެ.
