ބިލަށް ބަހުސްކުރައްވުމުން އަނާރާ ވިދާޅުވީ އެ ބިލު ރައީސް އަނބުރާ ފޮނުއްވައިލެއްވީ، މަޖިލީހުން އަވަސް އަރުވާލައިގެން އެ ބިލު ފާސްކުރީތީކަމަށެވެ.
ކޮމިޓީގެ މަރުހަލާގައި ވެސް އަނާރާ ބިލާ ދެކޮޅު ހެއްދެވިއެވެ. ނަމަވެސް އެ ބިލު ފާސްކުރަން ވޯޓު ދެއްވިއެވެ. އެކަމާ ފާޑުކިޔުން އަމާޒުވުމުން އޭނާ ވިދާޅުވީ އެއީ ޓީމެއްގެ ގޮތުގައި މަސައްކަތް ކުރަން ވެގެން ދެއްވި ވޯޓެއް ކަމަށެވެ. ޕީއެންސީގެ ލީޑަޝިޕުން ވަނީ އެ ބިލަށް ތާއީދު ކުރަން ޕީއެންސީގެ މެންބަރުންނަށް އަންގައި، ތްރީ ލައިން ވިޕެއް ވެސް ނެރެފައެވެ.
އެހެންނަމަވެސް މިއަދު ބިލަށް ބަހުސްކުރެއްވުމުގައި އަނާރާ ވަނީ އެ ބިލަށް ވަރަށް ބޮޑަށް ފާޑުވިދާޅުވެ، ރައްޔިތުންގެ މަޖިލިސް މިހާރަށް ވުރެ މިނިވަންކޮށް، ރައްޔިތުންގެ ބައިވެރިވުމާއެކީ ހިންގަން ޖެހޭ ކަމަށް ވިދާޅުވެފައެވެ.
މަޖިލީހުގެ މަސައްކަތްތަކަށް މިހާރަށްވުރެ ބޮޑަށް ރައްޔިތުންގެ ހިޔާލު ހޯދަންޖެހޭ ކަމަށް އަނާރާ ވިދާޅުވިއެވެ. އަދި "މިފަދަ ކަންކަން ހަމަ ތަކުރާރު ވެގެން ނުދާނެ ކަމަށް" އުއްމީދު ކުރައްވާ ކަމަށްވެސް ވިދާޅުވިއެވެ.
