
ކުންފުނީގެ ބޯޑުން އެ މަގާމަށް ވިސާމް އައްޔަން ކުރީ މިދިޔަ އާދިއްތަ ދުވަހުއެވެ.
ރެޖިސްޓްރާ އޮފް ކޮމްޕެނީސްގެ މަގާމުން ވިސާމް އިސްތިއުފާ ދެއްވީ މި މަހުގެ 1 ވަނަ ދުވަހުއެވެ. ފަސްޓް ނެޝަނަލް ކޯޕަރޭޝަނަކީ ފަންޑު މެނޭޖްމަންޓާއި އެޑްވައިޒަރީ ހިދުމަތްތައް ފޯރުކޮށްދޭ ކުންފުންޏެކެވެ. އަލަށް އައްޔަންކުރެވުނު އެ ކުންފުނީގެ ޗީފް ކޮމާޝަލް އޮފިސަރުގެ ހައިސިއްޔަތުން ވިސާމުގެ މަސްއޫލިއްޔަތުތަކުގެ ތެރޭގައި ކުންފުނީގެ ވިޔަފާރިއާއި ގުޅޭ ސްޓްރެޓެޖީތައް އެކުލަވައިލުމާއި ތަރައްގީކުރުން ހިމެނެއެވެ. މީގެ އިތުރުންވެސް އޭނާ ކުންފުނީގެ ޕްރޮޑަކްޓް ޑިވެލޮޕްމަންޓް މަސައްކަތްތައް ބަލަހައްޓައި ސޭލްސް އާއި މާކެޓިން މަސައްކަތްތައް ކުރާނެއެވެ.
ވިސާމަކީ މާކެޓިން މެނޭޖުމަންޓުގެ ދާއިރާއިން ޑިގްރީ އަދި އިކޮނޮމިކްސްގެ ދާއިރާއިން ރާއްޖެއިން ބޭރުން މާސްޓާސް ހާސިލްކުރައްވާފައިވާ ބޭފުޅެކެވެ. އޭނާ ވަނީ ސީއެމްޑީއޭ އާއި ޕެންޝަން އޮފީހުގެ ބޯޑުގައިވެސް މަސައްކަތް ކުރައްވާފައެވެ. މީގެ އިތުރުން އޭނާއަކީ މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ބޯޑު މެންބަރެއްވެސް މެއެވެ.