މިއީ ކުރިން ސުޕްރީމް ކޯޓުގެ ފަނޑިޔާރުކަމުން ސަސްޕެންޑުކުރުމަށްފަހު އިސްތިއުފާ ދެއްވި ހުސްނުއް ސުއޫދު ވެސް އދ. އަށް މައްސަލަ ހުށަހެޅުމަށްފަހު އަޒްމިރާލްދާ ވެސް އެފަދަ ފިޔަވަޅެއް އަޅާފައިވާ މައްސަލައެކެވެ.
އަޒްމިރާލްދާގެ ގާނޫނީ ވަކީލުން ނެރުނު ނޫސް ބަޔާނެއްގައި ބުނެފައިވަނީ، ގާނޫނު އަސާސީ އާއި ގާނޫނުތަކާ ހިލާފަށް އަޒްމިރާލްދާ ސަސްޕެންޑުކޮށް ދައުލަތުގެ އިދާރާތަކުން ހިންގަމުން ގެންދާ އިޖުރާއަތުތަކާ ގުޅިގެން މައްސަލަ އދ. އަށް ހުށަހެޅުމަށް ނިންމާފައިވާ ކަމަށެވެ. މީގެއިތުރުން، އެމްބަސީތަކާއި ހައިކޮމިޝަންތަކުގެ ސަމާލުކަމަށް ވެސް އަޒްމިރާލްދާ ސަސްޕެންޑުކުރި ގޮތުގެ މައްސަލަތައް ގެނެސްފައިވާކަން ވަކީލުންގެ ޓީމުން ހާމަކޮށްފައިވެއެވެ.
ހުސްނުއްސުއޫދު ވަނީ ސުޕްރީމް ކޯޓުގެ ފަނޑިޔާރުންގެ ސަސްޕެންޝަން އުވާލައި ސުޕްރީމް ކޯޓުގެ ފަނޑިޔާރުން ވަކި ކުރުމަށް ސަރުކާރުން ކުރަމުންދާ މަސައްކަތް ވަގުތުން ހުއްޓައިލުމަށް ގޮވާލުމަށް އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ ކިބައިން އެދިފައެވެ. އަޒްމިރާލްދާގެ މައްސަލަ ވެސް މިހާރު އެ ފޯރަމަށް ހުށަހަޅާފައެވެ.
