ސުޕްރީމް ކޯޓުގެ ފަނޑިޔާރު ކަމަށް ހައި ކޯޓުގެ އިސް ފަނޑިޔާރު ކަމުގައި މި ވަގުތު ހުންނެވި ހުސައިން ޝަހީދު އައްޔަން ކުރުމަށް، ރައްޔިތުންގެ މަޖިލީހަށް އޭނާގެ ނަން ރައީސް މުހައްމަދު މުއިއްޒު ފޮނުއްވީ އިއްޔެއެވެ.
އެއާއި އެކު ޝަހީދުގެ ނަން ދިރާސާކުރަން ޖުޑީޝަރީ ކޮމެޓީން ފޮނުވުމުން އެ ކޮމެޓީން ވަނީ ކުޑަވަގުތުކޮޅެެއްގެ ތެރޭގައި ޝަހީދު ސުޕްރީމް ކޯޓަށް އައްޔަންކުރަން ފެންނަކަމަށް ފާސްކޮށްފައެވެ. އެ ކޮމެޓީން ޝަހީދުގެ ނަން އެހާ އަވަހަށް ފާސްކުރި ސަބަބެއްކަމަށް ބުނީ ފަނޑިޔާރު ޝަހީދުގެ ނަން ދިރާސާކުރަން ފޮނުވާފައިވަނީ ޖޭއެސްސީން އިންޓަވިއުކޮށް، ރަނގަޅަށް ދިރާސާކުރުމަށް ފަހު ކަމަށާއި އެހެންކަމުން ކޮމިޓީން ދެން އިތުރަށް ކުރާނެ ދިރާސާއެއް ނެތް ކަމަށެވެ.
ރައްޔިތުން މަޖިލީހުން ޝާހިދު ސުޕްރީމް ކޯޓުގެ ބެންޗަށް އައްޔަންކުރަން ފާސްކުރީ މަޖިލީހުގެ މިއަދުގެ ޖަލްސާަގއި ބައިވެރިވި 64 މެމްބަރުން ތާއިދާއެކުއެވެ. އޭގެތެރޭގައި އިދިކޮޅު އެމްޑީޕީން މިއަދު ޖަލްސާގައި ބައިވެރިވި ހުރިހާ މެމްބަރުންވެސް ހިމެނިވަޑައިގަންނަވައެވެ. އިދިކޮޅަށް ވޯޓް ދިން އެއްވެސް މެމްބެރެއް ނެތެވެ.
ސުޕްރީމް ކޯޓުގެ ފަނޑިޔާރެއްގެ މަގާމު ހުސްވީ މި މަހު 4 ވަނަ ދުވަހު ހުސްނުއްސުއޫދު ފަނޑިޔާރު ކަމުން އިސްތިއުފާ ދެއްވުމުންނެވެ. އެ މަގާމަށް ފަނޑިޔާރަކު ހޯދަން ޖޭއެސްސީން ދެ ފަހަރަށް އިއުލާން ކުރުމުން ނަން ހުށަހެޅުއްވީ ޝަހީދުގެ އިތުރުން ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު އަދި ގާނޫނީ ވަކީލެއް ކަމަށްވާ ރުސްދުﷲ އިބްރާހީމެވެ.
ހައިކޯޓުގެ އިސްފަނޑިޔާރު ހުސައިން ޝަހީދުއަކީ މިސްރުގެ އަލްއަޒުހަރު ޔުނިވަރސިޓީގެ ލޯ ގްރެޖުއޭޓެކެވެ. ޝަހީދުވަނީ ދިވެހިރާއްޖޭގެ އިސްލާމީ ޔުނިވަރސިޓީން މާސްޓަރ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ ހާސިލް ކުރައްވާފަ އެވެ.
ޝަހީދު ހައިކޯޓުގެ ފަނޑިޔާރުކަމުގެ ހުވާކުރެއްވީ، 2018 ވަނަ އަހަރުގެ ޖުލައި މަހުގެ 24 ވަނަ ދުވަހު އެވެ. ދިވެހިރާއްޖޭގެ ހައިކޯޓުގެ އިސްފަނޑިޔާރުގަކަމުގެ މަގާމަށް ޝަހީދު އައްޔަން ކުރައްވާފައިވަނީ 2023 ވަނަ އަހަރުގެ އޮކްޓޫބަރު މަހުގެ 30 ވަނަ ދުވަހު އެވެ.
ފަނޑިޔާރު ޝަހީދު ފުރުއްވާފައިވާ މަގާމްތަކުގެ ތެރޭގައި އައްޑު އަތޮޅު ފޭދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި، ނ. ހޮޅުދޫ މެޖިސްޓްރޭޓް ކޯޓުގެ ކޯޓު އިސް މެޖިސްޓްރޭޓްގެ މަގާމުގެ އިތުރުން ކްރިމިނަލް ކޯޓުގެ ޤާޒީކަމުގެ މަގާމު ހިމެނެ އެވެ.
