މިއަހަރުގެ ފިތުރު އީދަށް ރާއްޖޭގެ އެކި ކަންކޮޅުގައި ހަރުކުރި އީދު ލައިޓްތައް ދިއްލާލާނީ އަންނަ ހޮނިގިރު ދުވަހުގެ ރެއިން ފެށިގެންނެވެ.
މި އަހަރަށް އީދު ލައިޓްތައް ދިއްލުމަށް ހޮނިހިރު ދުވަހުގެ ރޭ ހާއްސަ ހަރަކާތެއް ބޭއްވުމަށް ވަނީ ނިންމާފައެވެ. މި ހަރަކާތުގައި ރައީސް ޑރ. މުއިއްޒުި ބައިވެރިވެޑައިގަންނަވާކަމަށް ލޯކަލް ގަވަނެންސް މިނިސްޓްރީން ބުނެއެވެ. މި ހަރަކާތަކީ ސަރުކާރު ކުންފިނިތަކުން ބައިވެރިވެގެން ބާއްވާ ހަރަކާތެއްކަމަށް މިނިސްޓަރު އާދަމް ޝަރީފު އުމަރު ވިދާޅުވިއެވެ.
މިދިޔަ އީދުގައި ހުޅުމާލެ ދިއްލާލާފައި
މިދިޔަ އަހަރު އީދު ލައިޓް ފޮނުވުނީ މައިގަނޑު ގޮތެއްގައި އަތޮޅުވެރިން ކުރާ ރަށްރަށް ކަމަށާއި އޭގެ އިތުރުން މިފަހަރު ސަރުކާރުން ކޮންމެ އަތޮޅެއްގެވެސް 2 ރަށަކަށް އީދު ލައިޓް ފޮނުވާފައިވާކަމަށް މިނިސްޓަރު ވަނީ ވިދާޅުވެފައެވެ. އެގޮތުން މިއަހަރު މިދިޔަ އަހަރަށްވުރެ އިތުރަށް އިތުރު 36 ރަށެއްގައި އީދު ލައިޓްތައް ހަރުކޮށް ދިއްލާނެކަަމަށް މިނިސްޓަރު އާދަމް ޝަރީފު އުމަރު ވިދާޅުވިއެވެ. މި 36 ރަށަށް އީދު ލައިޓް ގެނައުމަށް ދައުލަތުގެ ބަޖެޓުން 28 މިލިއަން ރުފިޔާ ހަރަދުވާނެކަމަށް މިނިސްޓަރު އާދަމް ޝަރީފު އުމަރު ވަނީ ވިދާޅުވެފައެވެ.
މިދިޔަ އީދުގައި މާލެ ދިއްލާލާފައި
މި ފަހަރު އަލަށް އީދު ލައިޓްތައް ދިން ރަށްތައް
ހއ. ހޯރަފުށި، ހއ. އިހަވަންދޫ، ހދ. ނޮޅިވަރަމް، ހދ. ހަނިމާދޫ، ށ.މިލަންދޫ، ށ. ފޯކައިދޫ، ނ.ވެލިދޫ، ނ.ހޮޅުދޫ، ރ. އައލިފުށި، ރ.ދުވާފަރު، ބ.ތުޅާދޫ ، ބ.ހިތާދޫ، ޅ.ހިންނަވަރު، ޅ.ކުރެންދޫ، ކ.ކާށިދޫ، ކ.މާފުށީ، އއ.ތޮއްޑޫ، އއ.އުކުޅަސް ، އދ.މާމިގިލި، އދ.އޮމަދޫ، ވ.ކެޔޮދޫ، ވ.ފުލިދޫ، މ.މުލައް، މ.ކޮޅުފުށީ ، ފ.ބިލެއްދޫ، ފ.ފީއަލި ،ދ.މީދޫ، ދ.މާއެނބޫދޫ، ތ.ތިމަރަފުށީ، ތ. ވިލިފުށި ، ލ.ގަން، ލ.މާވަށް، ގއ، ދާންދޫ، ގއ.ގެމަނަފުށި، ގއ.ގައްދޫ، ގދ.މަޑަވެލި.
މިދިޔަ އީދުގައި ހުޅުމާލެ ދިއްލާލާފައި
މިފަހަރު އަތޮޅުތަކުން ރަށްރަށް އިހްތިޔާރުކުރީ ކޮންމެ އަތޮޅަކަށްވެސް ސަރުކާރުން ކަނޑައެޅި 2 ރަށަކަށް އެ ފުރުސަތު ދިނުމަށް ކަމަށް މިނިސްޓަރު ވިދާޅުވިއެވެ. އަދި 2 ރަށް އިހްތިޔާރު ކުރީ އާބާދީ އެންމެ ގިނަ ރަށްރަށަށް ބަލައިގެންކަމަށްވެސް މިނިސްޓަރު ވިދާޅުވިއެވެ.
މާލޭ ފިތުރު އީދަށް ދިއްލާމުގެ މަސައްކަތް މިހާރު ވަނީ ފަށާފައެވެ. އެގޮތުން މާލޭގެ އެކި ސަރަހައްދުތަކުގައި އީދު ލައިޓްތައް ހަރުކުރުމުގެ މަސައްކަތް ސިޓީ ކައުންސިލާއި މިނިސްޓްރީ ގުޅިގެން އަންނަނީ ކުރަމުންނެވެ.
