މި މަހުގެ 24 ވަނަ ދުވަހުގެ ރޭ 11:15 ހާއިރު އެ ދެމަފިރިން ދިރިއުޅެމުން ދިޔަ ގޭގެ ކޮޓަރީގައި ހިނގި އަލިފާނުގެ ހާދިސާގައި ދެމީހުން ވެސް ބޮޑަށް ފިހުނު ކަމަށާއި، ދެމީހުންގެ ހާލަތު ސީރިއަސްވުމާ ގުޅިގެން މިވަގުތު ދެމީހުން ވެސް ވަނީ އައިސީޔޫއަށް ބަދަލުކޮށްފައި ކަމަށް އައިޖީއެމްއެޗުން ބުނެއެވެ.
އެ ދެމަފިރިންގެ ފަސް އަހަރުގެ ތުއްތު ދަރިފުޅެއް ހުރެއެވެ، ނަމަވެސް އަލިފާނުގެ ހާދިސާ ހިނގި ވަގުތު އެ ކުއްޖާ ކޮޓަރީގައި ނޫޅޭ ކަމަށް ވެއެވެ.
އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވާ ކަމަށާއި، މި މައްސަލަ ފުލުހުން މިހާރު ގެންދަނީ ތަހުގީގު ކުރަމުން ކަމަށް ފުލުހުން ބުނެފައިވެއެވެ.
މި ހާދިސާއާ ގުޅިގެން ފުލުހުން މީޑިއާއާ ހިއްސާކުރި މައުލޫމާތުގައި ބުނެފައިވަނީ އަލިފާނުގެ ހާދިސާއާ ގުޅިގެން ދެމީހުން ޒަހަމްވެ، ފަރުވާ ދިނުމަށް މާލެ ގެނެސްފައިވާ ކަމަށެވެ. އަދި މި ހާދިސާއާ ގުޅޭ އިތުރު މައުލޫމާތު ލިބުމުން ހާމަކުރާނެ ކަމަށް ފުލުހުން ބުނެފައިވެއެވެ.
