ފަތިހު ވެހުނު ކެރިކޮޅާއެކު ދުނިޔެމަތި ދޮވެލައިފި އެވެ. ވާލާއި ކާޅު އަދި ކޮވެލީގެ ގޮވެލިފަށްޗަށް ފަތިހުގެ އަމާންކަން ވެރިވެއްޖެ އެވެ. ބަންގީގެ އަޑުން މުޅި ކާއިނާތު ރައްކާތެރިކުރައްވައިފި އެވެ. މުރާލި ހަށިގަނޑުތައް ދުނިޔެވީ ވާޖިބައިގެން ހަށަންބަދެލައިފި އެވެ.
އިރުގެ ދޯދިތައް ލޮނުން ތޮޅެލީ ބާއްޖަވެރިކަމާއެކު މުޅިން އައު އުއްމީދުތަކަކަށް އިންސާނުންނަށް ފުރުސަތު ދިނުމަށެވެ. ކުރިމަތިވެފައިވާ ދަތި އުނދަގޫތައް ހުރަސްކުރުމަށް މުޅިން އައު އުއްމީދެއްކުރާ ކިތަންމެ ހިތެއް ވާނެ އެވެ. ބޭނުންތައް ހާސިލްކުރުމަށް އަޒުމުކަނޑައެޅުމަކީ އަމިއްލަ އެދުން އިސްކުރުން ކަމަށްވާނަމަ، އެކަމަށް މިއަދު ތާބިޝް އިސްނަގާނެ އެވެ.
އެކުގައި މަސައްކަތްކުރާތާ މިއަދަކީ ފަސްވަނަ ދުވަހެވެ. ކާމިޔާބު ބުރަމަސައްކަތްތަކެއް ކުރެވިއްޖެ އެވެ. ކަރުދާހުގެ މަސައްކަތްތަކުގެ މުޅިން އެހެން ހަރުފަތަކަށް ގިރާކުރެވުމުން، މިއަދަކީ މުޅިން އައު ޕްރެޒެންޓޭޝަނެއް ފިޒާ ހުށަހަޅަންޖެހޭ ދުވަހެވެ. އޮފިހަށް އައިފަހުން އެނޫން ކަމެއްގައި އަދި ފިޒާ ނޭވާ ނުލަ އެވެ. ޕްރެސެންޓޭޝަން ފަށައިގެން ކުރިއަށްދަނީ އެވެ. ހަތަރު ފަސްފަހަރު ތާބިޝްގެ ނަން ގޮވާންޖެހިއްޖެ އެވެ. ފިޒާގެ މޫނަށް ބެލުން ނޫން އެހެން މަސައްކަތެއް ތާބިޝްގެ ޝެޑިއުލްގައި މިއަދު ނެތް ފަދަ އެވެ. ފިޒާގެ ކޮންމެ ހަރަކާތެއް ކޮންމެ އިހްސާސަކާއި ކޮންމެ ޖަޒްބާތެއް ތާބިޝްގެ ސިކުނޑީގައި ރެކޯޑްކުރަނީ އެވެ. ހިމޭންކަމުގެ ތެރެއިން ހިނިތުންވެފައި ތާބިޝްގެ މަސައްކަތް ކުރިއަށްގެންދިޔަ އެވެ. ފިޒާގެ ލޭހިނގުން އަވަސްވެ، ޕްރެޝަރު މައްޗަށް ދާންފަށައިފި އެވެ.
ތާބިޝްގެ މޭޒުމަތީގައި ދެތިން ހަތަރުފަހަރު ފިޒާ ޖަހައިލައިފި އެވެ. ފިޒާގެ މޫނަށް ބަލައިލާފައި ތާބިޝް ހިނިތުންވި އެވެ. އިހްތިޔާރެއް ނެތި ފިޒާގެ އެސްފިޔަ ޖަހައިލެވުނީ ހުވަފެނީ ގޮތަކަށެވެ. ތާބިޝްގެ ހިނިތުންވުމަކީ ފިޒާގެ ބަލިފަޔެކެވެ. ހިނިތުންވުމުގެ ތެރެއަށް ގެނބިގެންދިޔަ ގޮތެއް ފިޒާއަށް އަންދާޒާވެސް ނުކުރެވެ އެވެ. ތާބިޝްގެ ހިނިތުންވުމަށްވުރެން ހިތްގައިމު މަންޒަރެއް މި ކާއިނާތުގައި ފިޒާއަށްޓަކައި ވުޖޫދު ނުވެ އެވެ.
"ފިޒާ"
ތާބިޝްގެ ހިނިތުންވުމަށް ފިޒާގެއްލިފައިވާ މަންޒަރު އޭނާއަށް ފާހަގަކުރެވުނެވެ. ވަގުތުގެ ބޭނުން އެންމެ ހެޔޮގޮތުގައި ހިފުމަށް ތާބިޝް ނިންމީ ފިޒާއަށް އެއްޗެއް ވިސްނޭތޯ އެވެ. ފިޒާގެ ނަމުން ގޮވައިލީ އެސަބަބަށްޓަކަ އެވެ.
"ގަބޫލުކުރިޔަސް ނުކުރިޔަސް ހަގީގަތަކީ، އަހަރެންނާއި ނުލައި ދިރިއުޅުމަކީ ފިޒާއަށް ފަސޭހަކަމެއް ނޫން.. ފިޒާއާއި ނުލައި ދިރިހުރުމަކީ އަހަންނަށްވެސް ފަސޭހަކަމެއް ނޫން..!" ތާބިޝްގެ ޖުމުލައާއެކު ފިޒާ ތެޅިގަތެވެ. ދެފަރާތަކަށް ބޯ ހޫރުވާލީ ތާބިޝްގެ ބުނުމަށް އިންކާރުކުރުމަށެވެ.
"އައި ތިންކް އައި ޝުޑް ލީވް..!"
އަތުރާފައިހުރި އެއްޗެހި ތަރުތީބުކޮށް ދަބަހަށް އަޅަން ތައްޔާރުވި ވަގުތު ތާބިޝް އައިސް ހުއްޓުނީ ފިޒާއާއި ދާދި ގާތުގަ އެވެ.
އަވަސް އަރުވާލާފައި ގޮނޑިންތެދުވާން ހަރަކާތްކޮށްލި ވަގުތު، ގޮނޑީގެ ދެފަރާތުގެ އަތްގަނޑުގައި އަތްވިއްދާފައި ފިޒާ އެގޮނޑިން ތެދުވުމަށް ތާބިޝް ހުރަސް އެޅި އެވެ.
"ޖަވާބު ދީ..! އަހަރެން މިބުނި އެއްޗެއްގެ ތެދު ދޮގު ނުވަތަ ހަގީގަތް އެނގެން ބޭނުން.. މި ބުނީ ތެދެއްތަ؟ ނޫނީ ދޮގެއްތަ؟" އަސަރުން ފުރިފައިވާ ދެލޮލަށް ބަލަންވެސް ފިޒާއަށް ފަސޭހައެއް ނުވި އެވެ. ނަމަވެސް ދެމީހުންގެ މޫނު، ކައިވަތަކަށްވުރެން ގާތެވެ.
"މިތަނުގައި ވަގުތު ހޭދަކުރަން މިއައީ، އަމިއްލަ އެއްވެސް ސުވާލަކަށް ޖަވާބުދޭކަށް ނޫން.. ތާބިޝް މުހައްމަދދު އަހްސަން، މަސައްކަތުގެ މާހައުލުގެ އަދަބު އަހްލާގަށް ހުރުމަތްތެރިކޮށް ހިތުމަށް ހަނދާންކޮށްދެން..!" އިންޒާރުގެ ރާގުގައި ފިޒާ ބުނެލި އެވެ.
ޖުމުލައިގެ ބާރު، ތާބިޝްއަށް ހަޖަމުނުކުރެވިގެން އުޅެނިކޮށް ތާބިޝްގެ މޭގައި އަތް އަޅާފައި ފިޒާ ކޮށްޕާލި އއެވެ. ހަރަކާތެއް ގެންނާންވެސް ތާބިޝްއަށް ނޭގުނެވެ. ކެބިންތެރެއިން ނިކުތުމަށްޓަކައި މޭޒު ހުރަސްކޮށް ފިޒާ ބާރަށް ހިނގައިގަތެވެ. ތިންހަތަރު ފިޔަވަޅު އެޅުނުތަނާ، ފިޒާގެ ހީލްސް އެއްރިއަކަށް ޖެހުމުން ފިޒާގެ ކޮންޓްރޯލް ގެއްލި އަރިއަޅައިލި އެވެ. ނަމަވެސް ހަށިގަނޑު ބިމުގައި ޖެހުމުގެ ކުރީން ތާބިޝްގެ ދެއަތް އުނަގަނޑު ދަށަށް ވައްދައި ފިޒާ އުފުލާލައިފި އެވެ. ވާނުވާ އެނގުމާއެކު ތާބިޝްގެ އަތުތެރެއިން ނިކުތުމަށް ފިޒާ ގަދަހަދަންފެށި އެވެ. ނަމަވެސް ތާބިޝް ހިފަހައްޓާފައިވަނީ ފަސޭހައިން ނިކުމެވޭވަރަށްވުރެން މާ ބާރަށެވެ.
"ކިތަން ފަހަރު އަހަރެން ފިޒާކައިރީގައި ބުނިން ހީލްސްއަށް ނާރާށޭ..! ކިތަށްފަހަރު ކިތަށް ގޮތަށް ތީގެން އަނިޔާ ލިބިފައި އެބަހުރި..؟" ފިޒާގެ ހާލާއިމެދު ކަންބޮޑުވެފައި ތާބިޝް ބުންޏެވެ.
"ތަދާއި ވޭނަކީ އަހަރެންގެ ދިރިއުޅުމުގެ އާދަތައް..!" ރިހުމުން ފުރިފައިވާ އަޑަކުން ފިޒާ ބުނެލި އެވެ.
ކުރިއަށްވުރެން މާ ބާރަށް ފިޒާގެ ގައިގައި ތާބިޝް ހިފަހައްޓާލި އެވެ. ގަދަހެދުން ހުއްޓާލައި ފިޒާވެސް ހިމޭންވެއްޖެ އެވެ. އެކަކު އަނެކެއްގެ ލޮލަށް ގެއްލި ހިޔާލީ ދުނިޔެއެއްގައި ދެމީހުން ދަތުރުކުރީ އެއް މަންޒިލެއްގަ އެވެ.
ދެމީހުންގެ ލޮލުގައިވަނީ ރިހުމާއި ޝަކުވާ އެވެ. ލޯތްބަށްޓަކައި ކެތްމަދުވެ އެކަކު އަނެކަކަށް އިންތިހާއަށް ބޭނުންވެފައި އެވެ. އެކަކު އަނެކެއްގެ ވޭނީ އިހްސާސްގެ ތެރޭގައި އަމިއްލަ ދުނިޔޭގައި ފީނަމުންދިޔައީ ދެމީހުންގެ ރިހުމާއި ވޭނަށް ތަސައްލީއެއް ލިބޭތޯ އެވެ.
ދޮރުގައި ޓަކިޖަހައި ހަބަރެއް ނުވުމުން ލަވާންޔާ އެތެރެއަށް ވަނެވެ. ލިބުނު ޝޮކްގައި އަނގަމަތީގައި އަތްއެޅީ ފެންނަމުންދިޔަ ގައިގޯޅި މަންޒަރު އޭނާއަށް ހަޖަމުނުކުރެވުނީމަ އެވެ.
ލަވާންޔާ ރުޅިގަދަވެ، ނަފްރަތުގެ ހުޅު ރޯވާން ހިނދުކޮޅެއްވެސް ނުނެގި އެވެ. ތާބިޝްގެ ކެބިންތެރެއިން ފިޒާ ފުރަތަމަ ފެނުނު ދުވަހުން ފެށިގެން ލަވާންޔާގެ ހިތުގައި ފިޒާއަށްޓަކައިވަނީ އިންތިހާ ހަސަދައާއި ނަފްރަތެވެ. ތާބިޝްގެ ލޮލުން ލަވާންޔާއަށްޓަކައި ދެކެން ބޭނުންވި ކިތަންމެ އިހްސާސެއް ފިޒާއަށްޓަކައި އެ ލޮލުގައިވާތީ ލަވާންޔާ ވަނީ ދެކިފަ އެވެ. ތާބިޝްގެ މިފަދަ ޝައުގުވެރިކަމެއއް އެހެން އެއްވެސް އަންހެނަކާއިމެދު ފެނިފައި ނުވާތީ، ލަވާންޔާގެ ހިތް ފިޒާއަށްޓަކައި ދުވަހަކުވެސް ހެވެއްނުވާނެ އެވެ.
ތާބިޝްއަށްޓަކައި ލަވާންޔާގެ ހިތުގައި އޮތް ލޯތްބާއި ތާބިޝް ހާސިލްކުރުމަށް ކުރަމުންދާ މަސައްކަތަށް އެޅުނު ހަމައެކަނި ހުރަހަކީ ފިޒާ އެވެ. ހަސަދައާއި ނަފްރަތުގެ އަލިފާނުން ފިޒާ އަންދާލެވޭނެ ނަމަ، މިއަދާއި ހަމައަށް ލަވާންޔާ އެކަންވެސް ކުރީހެވެ. އެފަދަ ގާތްގޮތަކަށް ތާބިޝްގެ އަތުތެރޭގައި ފިޒާވަނިކޮށް ފެނުމަކީ ލަވާންޔާއަށް ކެތްކުރެވޭވަރުގެ ކަމަކަށް ނުވި އެވެ. 'އިންސެކިއުރިޓީ އަދި ޖެލލަސިއަކީ' އިންސާނުންގެ ހަލާކެވެ. ބާރުގަދަ ވިހަޔަކަށްވުރެން ބާރު ދުވެލީގައި އިންސާނުންގެ ނަފުސު ތަގައްޔަރު ކުރުމަށް މި ދެ ބަލި ފުދެ އެވެ. މިއަދު ލަވާންޔާ ހިތުގައި ޖެހިއްޖެ އެވެ. ހައްދެއް ނެތް މިންވަރަށް ކެތްތެރިކަން ކޮޅުންލައިފި އެވެ.
"ތާބިޝް..!!" ދަތްކުނޑިވިކާފައި ތާބިޝްގެ ނަމުން ލަވާންޔާ ބާރު އަޑުން ގޮވާލި އެވެ.
ތާބިޝްއާއި ފިޒާއަށް، ކެބިންގައި އިތުރު މީހަކު ހުރިކަން ރެއަކާލީ އޭނާގެ ވިހަގަދަ އަޑުންނެވެ.
ތިބެވުނު ހާލު ފިޒާއަށް އަންދާޒާކުރެވުނީ، ކެބިންގ ތެރޭގައި ވިހަ ފެތުރިގަތް ފަހުންނެވެ. ކުއްލިޔަކަށް ތެޅިގަންފައި ގަދަބާރު ދައްކާލި އެވެ. ތާބިޝްއަށް މަޖުބޫރުވެ، ފިޒާގެ ގައިން އަތް ނައްޓުވާލި އެވެ.
"އައި ހޭވް ޓު ލީވް- ބާއި!" ޖުމުލަ ނިމުނުއިރު ކެބިންގެ ތެރެއިން ބޭރަށް ފިޒާ ދެމިގެންފި އެވެ.
ފޮރޮޅިފައި އޮތް ފަޔަށް ވަމުންދިޔަ ތަދަކަށް ބެލުމެއް ނެތެވެ. ރިހެމުންދިޔަ ކުޑަހުޅާއެކު އަރައިގެން ހުރި ހީލްސްގައި ފިޒާ ފިޔަވަޅުނެގީ އަމިއްލަ ހާލަތަށް ބެލުމެއްނެތި އެވެ.
"ތާބިޝް..! ތާބިޝްގެ އަތުތެރޭގައި އޭނާ އޮންނާންޖެހުނީ ކީއްވެގެން..؟" ތާބިޝްއަކީ ލަވާންޔާގެ އަމިއްލަ މުދަލެއް ފަދައިން އަމިއްލަ ހައްގު އަދާކުރުމުގެ ނިޔަތުގައި ސުވާލުކުރީ ހަރުކަށިކަމާއެކު އެވެ.
ސުވާލާއެކު ތާބިޝްގެ ހަށިގަނޑާއި ލޮލާއި މޫނަށް އައި ބަދަލު ވަރަށް ރަގަޅަށް ލަވާންޔާ ބެލި އެވެ.
ހިނދުކޮޅެއް ކުރީން ލޯތްބާއި އޯގާތެރިކަމުން ފުރިފައި ހުރި ދެ ލޮލުގައި މިވަގުތުވަނީ ހަރުކަށިކަމާއި ފޫހިކަމމެވެ. ކުޑަވެސް ޝައުގުވެރިކަމެއް ތާބިޝްގެ މޫނުން މިވަގުތު ނުފެނެ އެވެ.
"ނަތިންގ..! އޭނާ ވެއްޓެން ދަނިކޮށް އަހަރެން ހިފަހައްޓައި އެހީތެރިވީ..!" މަސައްކަތަށް ސަމާލުކަން ހުއްޓުވާލަމުން ތާބިޝް ޖަވާބުދިނީ ލަވާންޔާއާއި ދިމާއަށް ބަލައިވެސް ނުލަ އެވެ.
"އޯހް... މިތަނުގެ ތެރޭގައި ކަލޭމެން ދެމީހުން މަސައްކަތްކުރާ ގޮތަކީ އެއީދޯ..! އިރުއެރީއްސުރެން ރޭގަނޑުގެ އެތައް ދަމެއް ވަންދެން ރެއާއި ދުވާލު ކަލޭމެން ދެމީހުން މިތަނުގެ ތެރޭގައި ހޭދަކުރާއިރު، ކޮށްފައި ހުންނާނީ ކިހައިވަރެއްގެ ކޮންކޮން ކަންތައްތަކެއްކަން ހިތަށް ގެންނާންވެސް ނޭގޭ..؟" ވިހަގަދަ ނަފުރަތުގެ ބުނެލުމަކުން ލަވާންޔާގެ ޖުމުލް އަމާޒުކޮށްލީ ތާބިޝްއަށެވެ.
"ލަވާންޔާ...! އިނަފް!!! މިއީ ލަވާންޔާއާއި ބެހޭކަމެއް ނޫން.. ތިފަދަ ގޮތަކަށް ފިޒާއާއި ގުޅުވައިގެން ވާހަކަ ނުދައްކާތި..! އެއީ ތި ހީކުރާ ކަހަލަ ކުއްޖެއް ނޫން..!" ހިތްހަމަ ނުޖެހިފައި ތާބިޝް ލަވާންޔާއާއި ކުރިމަތިލި އެވެ.
"އޯހް... އެއީ ކިހައިވަރެއްގެ ކޮން ފާޑެއްގެ އަންހެނެއްކަން އަހަންނަށް ވަރަށް ރަގަޅަށް ފެނިއްޖެ..! ތާބިޝް އަހަންނާއި ތި ގޮތަށް ވާހަކަ ތިދައްކަނީ އޭނަގެ ސަބަބުންތަ..؟ ހަފްތާއެއްވެސް ހަމަނުވާ ކުރު މުއްދަތުގައި ކޮންފަދަ ޖާދުއެއް އޭނާ ތާބިޝްއަށް ހަދާފައި ތިހުރީ..؟ ތާބިޝްއާއެކުވެސް ރޭކުރަން އޭނާ އެއްބަސްވީތަ..؟ އަގަކީ ކޮބާ..؟" ލަވާންޔާގެ ހުތުރު އިލްޒާމް ތާބިޝްގެ ލޭ ކައްކުވާލި އެވެ. ކަތުރުކަށިގަނޑު ބިންދައިގެން ދާވަރަށް ދަތްކުޑިވިކާފައި ތާބިޝް، ލަވާންޔާއާއި ކުރިމަތިލި އެވެ.
"ލަވާންޔާ..!!!!"
އުފުލާލެވުނު އަތް މައިތިރިކުރީ ތާބިޝްގެ ގަދަ ހިތްވަރުންނެވެ. ކުރިމަތީގައި ހުރީ އަންހެން ކުއްޖަކަށްވާތީ އޭނާގެ އެ ހަރަކާތް ހުއްޓުވާން މަޖުބޫރުވީ އެވެ. ނޫންނަމަ ތާބިޝްގެ އިނގިލިތަކުގެ ނިޝާން މިއަދު ލަވާންޔާގެ މޫނުގައި ފަވާލީހެވެ.
"ޑޯންޓް..! ދެވަނަ ފަހަރު ހިތަށްވެސް ނާރުވާތި ފިޒާއާއިބެހޭގޮތުން ތިފަދަ ހުތުރު ވާހަކައެއް ދައްކަން... އެ ދުވަހަކުން އަހަރެންގެ އަތްތިލަ މިގޮތަށް ތިރިއެއް ނުކުރާނަން..! ކީކޭ ހިތަށް އަރައިގެން ތިއުޅެނީ.. ފިޒާގެ ބޮލުގައި ހުތުރު އިލްޒާމު އަޅުވާއިރު، ލޯގަނޑެއްގެ ކުރިމައްޗަށް ހުއްޓި އަމިއްލަ ސޫރައަށް ބަލައިލިންތަ..؟ އަހަރެންގެ ސަމާލުކަން ހޯދަން، ފާޑުފާޑުގެ ހެދުންލައިގެން އައިސް އަހަރެންގެ ގައިމައްޗަށާއި އަތްމައްޗަށާއި ބުރަކަށި މައްޗަށް ވެއްޓިގަންނަ މީހަކު ތިފާޑުގެ ވާހަކަ ދައްކަން ލަދެއް ނުގަނޭތަ..؟ ފިޒާއާއި ބެހޭގޮތުން މައުލޫމާތި ނޭގެންޏާއި އަހަރެން އެހީވެދާނަން..! ފިޒާއަކީ އަބުރުވެރި، އަމިއްލަ ނަފުސުގެ އިއްޒަތާއި ކަރާމާތަށް ފަހުރުވެރިވާ މާތް އަހްލާގެއްގެ ވެރި އިއްފަތްތެރި އަންހެން ކުއްޖެއް..! ފިޒާ ހިނގާ މަގަކުންވެސް ލަވާންޔާއަށް ނުހިނގޭނެ..! ފިޒާގެ މަގާމް އަހަރެންގެ ހިތުން ހޯދަން،، ހިތަށްވެސް ނާރުވާތި.. އެކަމެއް ނުވާނެ.. ފިޒާއާއި ވާދަކުރެވޭނެ ގާބިލުކަމެއް ލަވާންޔާގެ ކިބަޔަކު ނެތް..! ހަނދާންކުރާތި، ފިޒާއާއި ވިއްދާލަން ހިތައްވެސް ނާރުވާތި..!" ތާބިޝްގެ އަޑު ތުރުތުރު އަޅަ އެވެ. ލަވާންޔާއަށް އެންމެ އެކަށީގެންވާ މަގާމު ތާބިޝްގެޖުމުލަތަކުން ބުނެދީފި އެވެ.
"އެނާގެ ހަގީގީ ގާޖަ، އޭނާއަށް އަހަރެން ދައްކާލާނަން..!" ނަފްރަތާއި ރުޅިވެރިކަމުން ފުރިގެންވީ ބުނެލުމެކެވެ. އެބުނި އެއްޗެއް ތާބިޝްއަށް ފަހުމު ނުވެގެން އުޅެނިކޮށް ކެބިންގެ ތެރެއިން ލަވާންޔާ ނިކުމެއްޖެ އެވެ. ދޮރާއި ހަމައަށް ތާބިޝް އައުމުގެ ކުރިން ބޭރުން ކެބިންގެ ދޮރު ލަވާންޔާ ތަޅުލައިފި އެވެ.
"ލަވާންޔާ.. ދޮރު ހުޅުވާ..! ހަމަ މިހާރު ދޮރު ހުޅުވާ..! ޑެމިޓް...!!" ދޮރުގައި ބާރަށް ތަޅަމުން ތާބިޝް އާދޭސްކުރީ ދޮރުހުޅުވުމަށެވެ. ކުރިމަތި ވެދާނެ ނުރައްކަލަކަށް ތާބިޝް ވިސްނާލުމުން އިތުރަށް ހާސްކަންވީ ބޮޑެވެ!
......................
ލަވާންޔާ ދުވެފައި ދިޔައީ އޮފީގުހެ މައި ރިސެޕްޝަނާއި ދިމާއަށެވެ. އެތަން މިތަން ހޯދަމުން ދުވުނީ ފިޒާ ފެނޭތޯ އެވެ.
ފުރަގަސްދީގެން ރިސެޕްޝަނިސްޓާއި ވާހަކަ ދައްކާން ހުރި ފިޒާ، ލަވާންޔާގެ ލޮލުގައި އަޅައިގަތުމަށް ވަގުތުކޮޅެއް ނެގި އެވެ. އަވަސް ފިޔަވަޅުތަކުގައި ބާރަށް ގޮސް، ފިޒާގެ އަތުގައި ހިފައި ވަރަށް ބާރަށް ލަވާންޔާއާއި ދިމާއަށް އަނބުރާލީ ގަދަކަމުންނެވެ. (ނުނިމޭ)
