އެމަނިކުފާނު މިހެން ވިދާޅުވީ "ރައްޔިތުންނާއިއެކު ޕޮޑްކާސްޓް" ގެ ނަމުގައި މިހާރު ކުރިޔަށް ގެންދަވާ ޝޯގެ ދެވަނަ އެޕިސޯޑުގައި މިއަދު ވާހަކަ ދައްކަވަމުންނެވެ.
ރައީސް މުއިއްޒު ވިދާޅުވީ ހުޅުމާލޭގައި ހުންނަ އޮރެންޖު ހިޔާއަށް ތެލެސީމިއާ ސެންޓަރު ބަދަލުކުރުމުގެ މަސައްކަތް މިހާރު ފަށާފައިވާކަމަށާއި އެތަން ހަދާ މިމަހުގެ 30 ނިންމަން ސިފައިންނަށް އަންގާފައިވާނެކަމަށެވެ. އަދި އެތަނުން ހިދުމަތް ދޭން އަންނަމަހުގެ 8 ވަނަދުވަހުގެ ކުރިން ފައްޓަވާނެކަމަށް ރައީސް ވިދާޅުވިއެވެ.
ތެލެސީމިއާ ސެންޓަރު ހުޅުމާލެއަށް ބަދަލުކުރުމުން ވަސީލަތުގެ ގޮތުން މިހާރަަށް ވުރެ ފުރިހަމަވެ މިހާރަށްވުރެވެސް ރަނގަޅު ހިދުމަތްތައް ލިބޭނެކަމަށް ރައީސް ވިދާޅުވިއެވެ. އެގޮތުން ގިނަ ވަސީލަތްތަކެއް ގާއިމުކުރަން އަންގަވާފައިވާނެކަމަށް ރައީސް ވިދާޅުވިއެވެ.
މީގެއިތުރުން އެ ސެންޓަރަށް ބޭނުންވާ ސީނިއަރ ފިޒިޝަނެއްވެސް މިހާރު ފުލްޓައިމްކޮށް މަސައްކަތް ކުރަން ފަށާފައިވާކަން ރައީސް ވަނީ ފާހަގަކުރައްވާފައެވެ. އަދި އެތަނަށް ބޭނުންވާ ފަސް ނަރުހުން ހޯދުމަށް ހުޅުވާލާފައިވާކަމަށާއި ވަރަށް އަވަހަށް އެކަން ހަމަޖެހިގެންދާނެކަމަށްވެސް ރައީސް ވިދާޅުވިއެވެ.
