މިކަމާއި ގުޅިގެން ދައުލަތުގެ މީޑިއާ އަށް ދެއްވި އިންޓަވިއުއެއްގައި، އާސަންދައިގެ މެނޭޖިންގ ޑިރެކްޓަރު އާމިނަތު ޒީނިއާ ވިދާޅުވީ، މި މައްސަލައަށް ހައްލެއް ހޯދުމަށް މިހާރުވެސް ފިނޭންސްއާއެކު މަސައްކަތް ކުރައްވަމުން ގެންދަވާކަމަށާއި، މި މައްސަލަ ހައްލުކުރުމަށް ނަގާނެ ސީދާ މުއްދަތެއް އެނގިވަޑައިނުގަންނަވާކަމަށް ޒީނިއާ ވިދާޅުވި އެވެ.
ލަންކާގެ އިތުރު ހޮސްޕިޓަލްތަކުން ވެސް އާސަންދަ ކަނޑާލި ކަމަށް މީޑިއާތަކުން ރިޕޯޓް ކުރި ނަމަވެސް ޒީނިއާ ވިދާޅުވީ މިވަގުތު އިޝޫ އުޅޭނީ ލަންކާ ހޮސްޕިޓަލްއާއެކު ކަމަށާއި ލަންކާ ހޮސްޕިޓަލްއިން މި ހިދުމަތް މެދުކެނޑިފައިވަނީ އެ ހޮސްޕިޓަލުން ކްރެޑިޓް އުސޫލުން ހިދުމަތްދިނުން ހުއްޓާލުމާގުޅިގެން ކަމަށެވެ.
ލަންކާގައި ހުންނަ އާސިރީ މެޑިކަލް ހޮސްޕިޓަލާއި، އާސިރީ ސެންޓްރަލް ހޮސްޕިޓަލް އަދި އާސިރީ ސާޖިކަލް ހޮސްޕިޓަލުން ދިވެހިންނަށް އާސަންދައިގެ ހިދުމަތް ދިނުން މެދުކަނޑާލާފައިވާ ކަމަށް ބުނެ ސޯޝަލް މީޑިއާގައި ބައެއް ފަރާތްތަކުން ދައްކާ ވާހަކަ ޒީނިއާ ދޮގުކުރެއްވި އެވެ.
ލަންކާ އަކީ ރާއްޖެއިން ބޭރުގައި އެންމެ ބޮޑު ދިވެހި އާބާދީއެއް އޮންނަ އެއް ގައުމެވެ. ބޭސްފަރުވާ ހޯދުމަށް އެ ގައުމުގައި ދިގު މުއްދަތަކަށް ދިރިއުޅޭ ދިވެހިންގެ އަދަދު ވެސް މަދެއް ނޫނެވެ.
އާސަންދަ ސްކީމްގެ ދަށުން ރާއްޖެއިން ބޭރަށް ބޭސްފަރުވާއަށް މިވަގުތު ފޮނުވަމުންދަނީ އިންޑިއާ އާއި ސްރީލަންކާއަށެވެ. ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، ޔޫއޭއީ އާއި ތައިލެންޑުގެ ހޮސްޕިޓަލްތަކުން އާސަންދަ ހޯދައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފަ އެވެ. ނަމަވެސް އެ ދެ ގައުމުން ސިއްހީ ހިދުމަތް ހޯދާ ފަރާތްތަކަށް އާސަންދަ ލިބުމުގައި ދަތިތަކެއް ހުރި ކަމަށް މައުލޫމާތު ލިބިފައިވެ އެވެ.
