މި ހާދިސާގައި ބޯޓުގައި ދަތުރުކުރި 18 މީހުންގެ ތެރެއިން ލ.މާވަށަށް ނިސްބަތްވާ 25 އަހަރުގެ ޢަލީ މުޝްފިގް މުހައްމަދު ޝަރީފް ގެއްލިފައިވާ ކަމަށް އެމްއެންޑީއެފްއިން މަޢުލޫމާތު ދެއެވެ.
ބޯޓުގައި އަލިފާން ރޯވިކަމުގެ މައުލޫމާތު އެމްއެންޑީއެފް ސެންޓްރަލް އޭރިއާ ކޮމާންޑަށް ލިބިފައިވަނީ މިރޭ 21:07 ހާއިރުއެވެ. މި މަޢުލޫމާތު ލިބުމާއެކު ކޯސްޓްގާޑުން ވަނީ ބޯޓު އޮތް ސަރަހައްދަށް ގޮސް މީހުން ސަލާމަތްކުރުމުގެ މަސައްކަތް ފަށާފައެވެ. ބޯޓުގައި ތިބި 18 މީހުންގެ ތެރެއިން 17 މީހުން ވަނީ ސަލާމަތްކުރެވިފައެވެ. ނަމަވެސް އަލީ މުޝްފިގް ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑުން މިވަގުތު ވެސް ދަނީ ކުރަމުންނެވެ.
މި ހާދިސާގައި ސަލާމަތްކުރުމުގެ މަސައްކަތަށް ތ.އަތޮޅު ޕޮލިސް ސްޓޭޝަނުގެ ފަރާތުން ބޮޑު އެހީތެރިކަމެއް ލިބެމުންދާ ކަމަށް އެމްއެންޑީއެފްއިން ބުނެފައިވެއެވެ. އަލިފާން ހިފައި ހުލިވި ބޯޓު އަޑިއަށް ގޮސްފައިވާތީ، ބޯޓުގެ ބައިތައް އެ ސަރަހައްދުން އޮޔާދާކަމަށް ވެސް އެމްއެންޑީއެފްއިން ބުނެފައިވެއެވެ.
އެމްއެންޑީއެފްއިން ވަނީ އެ ސަރަހައްދުން ދަތުރުކުރާ ފަރާތްތަކުން މިކަމަށް ސަމާލުކަން ދިނުމަށް އިލްތިމާސްކޮށްފައެވެ. ހާއްސަކޮށް ރޭގަނޑު އެ ސަރަހައްދުން ދަތުރުކުރާ ފަރާތްތަކުން ހާއްސަ ސަމާލުކަމެއް ދިނުމަށް އެމްއެންޑީއެފްއިން އެދިފައިވެއެވެ.
