ކަޔާންގެ ބުނެލުމާއެކު، ސޯފާއަށް ދެމިފައި އޮތް ތާބިޝް ފުންމައިގެން ތެދުވި އެވެ. ބިރުވެރިކަމާއި ހާސްކަމުގެ ބެލުމަކުން ކަޔާންގެ މޫނަށް ތާބިޝް ބަލައިލި އެވެ.
"ކަޔާން.. ތި ކިޔޭ އެއްޗެއް އިނގޭތަ..؟" ބުނާނެ އެއްޗެއްވެސް ހަގީގަތުގައި ތާބިޝްގެ ހިތަށް ނައީ އެވެ.
"އިތުރު ވޭނާއި ރިހުން ފިޒާއަށް ދޭން ބޭނުން ނުވަންޏާ، ތާބިޝްއަށް މި ނޫން އެހެން އެއްގޮތެއްވެސް ނެތް.. ކަލޭމެން ދެމީހުން، މާނައެއް ނެތް ގުޅުމަކުން ތިޔަހެން ގުޅިގެން ތިބިހައި ހިނދަކު ދެމީހުންނަށްވެސް، ހާއްސަކޮށް ފިޒާއަށް އަމާންކަމެއް ނުލިބޭނެ.. ކިތަންމެ އުނދަގުލަސް މިނޫން ޗޮއިސްއެއް ތާބިޝްއަކަށް ނެތް..!" ކަޔާންގެ ވާހަކަ ނިމުނުއިރު ތާބިޝްގެ ދެ ލޯ ރަތްވެއްޖެ އެވެ.
ރިހުމުން ފުރިގެންވާ ބެލުމަކުން ތާބިޝްދިޔައީ ކަޔާންގެ މޫނަށް ބަލަމުންނެވެ. ފިޒާއާއި ކަޔާންއާއި ދެމެދު އޮތް ގުޅުން ތާބިޝްއަށް އޮޅިފައެއް ނެތެވެ. ތާބިޝްއަށްވުރެން، ކަޔާންއަށް ފިޒާ މުހިއްމުކަންވެސް ތާބިޝްއަށް އެގެ އެވެ. އެކަމަށްޓަކައި އެންމެ އުފާކުރާ މީހަކީވެސް ތާބިޝް އެވެ.
"ކިހައި ދުވަހެއްވަންދެން 'ތާބިޝްގެ މީހެއްގެ ގޮތުގައި' ފިޒާ ހައްޔަރުކޮށްފައި ބައިންދާނަން..؟ ފިޒާގެ ފަހަތުން ތާބިޝް ދުވުނު ވަރަކަށް ތާބިޝްއާއި ދުރަށް ފިޒާ ދަތުރުކުރާލެއް ބާރުވާނެ..! މިހުރިހައި ކަމެއް މިހެން އޮތީމައި މިބުނަނީ ކަލޭމެން އެކަކު އަނެކަކަށް އަމާންކަން ދޭށޭ..! ދެމީހުންވެސް ދެމީހުންގެ ދިރިއުޅުމަށް ފުރުސަތު ދޭށޭ..! ގަނޑުފިއްލާ ކުޅުން ހުއްޓާލާފައި އެކަކު އަނެކަކާއި އިސްއުފުލައި އަނގައިން ބުނެވޭނެ ފުރުސަތަކީ ހަމައެކަނި ވަރިކުރުން..! ވަރިއަށްފަހު ދެމީހުންވެސް މިނިވަންވީ.. އޭރުން އެކަކު އަނެކަކަށްޓަކައި ތި އޮންނަ ޝަކުވާއާއި އިލްޒާމްއެޅުވުން މުޅިން ނެތިގެންދާނެ.. ވީ އެންމެ އަވަހަކަށް ފިޒާ މިނިވަންކޮށްދީ..!" އިހްސާސްތަކުގައި އަތްއަޅައި އޮއްބާފައި ކަޔާން ބުނެލީ އެނޫން އެހެން ހަތިޔާރެއް އޭނާގެ ކުރިމަތީގައި ނެތީމަ އެވެ.
"ކަޔާން ތިބުނީ ތެދެއް..! ފިޒާގެ އުފަލަނީ އަހަރެންނާއި ވަކިން، މުޅިން އެހެން ދިރިއުޅުމެއް އުޅުން ކަމަށްވަންޏާއި އޭނާއަށް އަހަރެން އެފުރުސަތު ދޭނަން.. ފިޒާގެ އުފަލަށްވުރެން އެހެން އެއްވެސްކަމެއް އަހަންނަކަށް މުހިއްމެއް ނޫން..! ފިޒާއަށްޓަކައއި ކޮންމެފަދަ ގުރުބާނީއެއްވާންވެސް އަހަރެން ތައްޔާރު..!" އިރުކޮޅަކު ވިސްނާލަން ހުރުމަށްފަހު ތާބިޝް ބުންޏެވެ. އިތުރު އެއްޗެއް ނުބުނެ ތާބިޝް ހިނގައިގަތީ ގޭގެ މައިދޮރާއި ދިމާއަށެވެ.
"ކޮންތާކަށް ތި ދަނީ..؟" ބޭރަށް ނިކުންނަނީކަން ޔަގީންވުމުން ކަޔާން ސުވާލުކުރި އެވެ.
"ފިޒާ މިނިވަންކުރުމުގެ މަސައްކަތަށް ތައްޔާރުވާން.." ކަޔާންއަށް ޖަވާބުދީފައި ތާބިޝް ނިކުމެގެން ހިގައްޖެ އެވެ. ތާބިޝް ނިކުތް ދޮރާއި ދިމާއަށް ބަލަންހުރެ ކަޔާން، ވިސްނާލި އެވެ.
......................
(ފިޒާގެ ގެ/ ރޭގަނޑުގެ ނާސްތާގެ ވަގުތު)
"ކިހިނެއްވީ ޕްރިންސެސް؟ ވަރަށް ވަރުދެރަވެފަ ކަހަލަ ގޮތަކަށް ބޭބެއަށް ޕްރިންސެސް މި ފެންނަނީ ކީއްވެގެން..؟" ލޯތްބާއެކު ވާލިދް ސުވާލުކުރި އެވެ.
"މާބޮޑުކަމެއް ނުވޭ ބޭބޭ.. މަސައްކަތުގެ ބުރަކަމުން ވަރަށް ސްޓްރެސް..!" ގަދަކަމުން ހީލަމުން ފިޒާ ބުންޏެވެ.
"ވަރަށް ދުވަސްކޮށްފައި ރޭގަނޑުގެ ނަސްތާގައި އަހަރުމެން ތިންމީހުންނަށް މި ބައިވެރިވެވުނީ.. އެހެންޏާއި ޕްރިންސެސް އުޅޭނީ މަސައްކަތުގައި އޮފީހުގައި، ޕްރިންސެސް ގޭގައި އުޅެންޏާއި ބޭބެ އުޅޭނީ އޮފީހުގައި ނޫނީ ކޮންމެވެސް މަސައްކަތެއްގައި ބޭރުގައި... ވަރަށް އުފާވެއްޖެ އަހަރުމެންގެ ކުޑަކުޑަ އާއިލާ އެކުގައި މިރޭ މިގޮތަށް ދިމާވީމައި..! ގިނަގިނައިން މިގޮތަށް ބައްދަލުވޭތޯ ބަލަންވާނެ..! ނޫންތަ އަޝްކާ..؟" ވާލިދްގެ އުފާވެރިކަން އޭނާގެ މޫނުން ދައްކާލި އެވެ.
ވާލިދްގެ ވާހަކައަށް އެއްބަސްވުމުގައި އަޝްކާ އަދި ފިޒާގެ ހާލަތު ހަމަ އެއްގޮތެވެ. ހިތުގައި އަތް އަޅާފައި ރިހުން ފޮރުވާލި އެވެ. ގަދަކަމުންނަމަވެސް ހިނިތުންވީ އެވަގުތަށް އެއީ އެންމެ ރަގަޅު ގޮތްކަމަށްވާތީ އެވެ.
"އިޒް އިޓް އެބައުޓް ތާބިޝް..؟"
ކެއުމުގެ ތެރެއިން ކުއްލިޔަކަށް ވާލިދުކޮށްލި ސުވާލުން މުޅިގޭގެ މާހައުލު ބަދަލުވާން ސިކުންތެއްވެސް ނުނެގި އެވެ. ހަރުކަށިކަމާއެކު ވާލިދްކޮށްލި ސުވާލުން ފިޒާއާއި އަޝްކާގެ ހަރަކާތް ހުއްޓުނެވެ. ލިބުނު ޝޮކް މޫނުމަތީން ފާޅުކޮށް ފެނެ އެވެ.
ފިޒާ މަސައްކަތްކުރަކީ ތާބިޝްއާއިއެކުގައިކަން ވާލިދްކައިރީގައި ދެމީހުންކުރެ އެކަކުވެސް ނުބުނެ އެވެ. ފިޒާގެ ހަޔާތަށް އަލުން ތާބިޝް އަތުވެއްޖެކަމެއް ނުވަތަ ނޫންކަމެއްގެ ހަބަރެއްވެސް ވާލިދުއަށް ދެމީހުންގެ ފަރާތުން ލިބިފައެއް ނުވާނެ އެވެ.
"ކަލޭމެން ދެމީހުންވެސް ހީކުރަނީ އަހަރެން ގާތުގައި އެއްވެސް އެއްޗެއް ނުބުނިއްޔާ، އެއްކަމެއްވެސް އަހަންނަށް ނޭގޭނެކަމަށްތަ؟ ދެމީހުންގެ މައުލޫމާތަށްޓަކައި ބުނެލަން، އަހަރެންވެސް މަސައްކަތްކުރަނީ ފިޒާއާއި ތާބިޝް މަސައްކަތްކުރާ އިންޑަސްޓްރީގައި.. ރާއްޖޭގެ އެންމެ ނަން މަޝްހޫރު ބިޒްނަސް ޓައިކޫންގެ ހަބަރާއި މައުލޫމާތު އަހަންނަށްވެސް ލިބޭ..! އަހަރެންގެ ލޮލުން ކިތަންމެ ފަހަރަކު ސައިޓްތަކުން ދެކުނިން ތާބިޝްއާއި ފިޒާއެކުގައި..! އެކަމަކު އެވަރުގެ ކަމެއް މިގޭތެރޭގައި ހިނގަމުންދާއިރުވެސް އަހަރެން ކައިރީގައި ބުނެލާނެ ހަމައެކަކުވެސް ނެތް.." ވާލިދް ވާހަކަދައްކަމުންދިޔައީ އެއްވެސް އިހްސާސެއް ނެތް މީހަކު ފަދައިންނެވެ.
"ބޭބޭ.. އެއީ.. ހަމަ އެކަނި... އަހަރުމެން ދެމީހުން.. ދެމެދުގައި އޮންނަނީ... ހަމައެކަނި ޕްރޮފެޝަނަލް މަސައްކަތްތަކާއި ހުރި ގުޅުން... އެހެން އެއްވެސް ގުޅުމެއް ..." އަޅައަޅައިގަންނަމުން ފިޒާ ވާހަކަދެއްކި އެވެ. ނަމަވެސް ބޭނުންވި ހުރިހައި ތަފްސީލލެއް ނުދެވުނެވެ.
"ފިޒާ" ފިޒާހުއްޓުވީ ވާލިދް އެވެ.
"މިއަދު އޮފީސްތެރޭގައި ހިނގިކަންކަން ބޭބެއަށް އިނގޭ..!" ވާލިދްގެ ބުނެލުމާއެކު ފިޒާގެ މެއަށް ގަނޑުފެން ބާލިދީއެއް އޮއްސާލި ފަދަ އެވެ. ހަރަކާތެއް ގެންނާންވެސް ނޭގުނެވެ.
"ބޭބޭ.. އެއީ.." ފިޒާ ބުނަން އުޅުނު އެއްޗެއް ވާލިދްއަށް މުހިއްމެއް ނުވި އެވެ.
"ފިޒާ.. ތިއީ ފިޒާގެ އަމިއްލަ ދިރިއުޅުން.. އެކަމާބެހޭގޮތުން ބޭބެ އެއްވެސް އެއްޗެއް ބުނާކަށް ނެތިން.. އިތުރަށް ވިސްނައިދޭނެ އެއްޗެއްވެސް ނެތް.. މީގަ އޮތީ ފިޒާ ބޭނުންވާ ގޮތް..! އެކަމަކު ފިޒާއަސްވެސް އެންގެންވާނެ ކޮންމެ ފަހަރަކުވެސް ފިޒާގެ ނިންމުމމަށް އަހަރުމެން ދެމީހުން އިހްތިރާމްކުރާކަން.. މިރޭވެސް އަދި މުސްތަގްބަލްގައިވެސް މިކަމަށް ބަދަލެއް ނާންނާނެ.. ކޮންމެ ކަމެއް ކޮންމެ ގޮތަކަށް ދިއަޔަސް އަހަރުމެން ދެމީހުން ފިޒާއާއި އެންމެ ގާތުގައި ތިބޭނަން، ފިޒާގެ ކޮންމެ ނިންމުމަކަށް އިތުބާރުކުރާނަން.. އުއްމީދުކުރަނީ މިކަން ދުވަހަކުވެސް ހަނދާންނައްތާނުލާނެކަމަށް.." ހިމޭންކަމާއެކު ވާލިދު ވާހަކަދެއްކި އެވެ.
ގޮނޑިން ތެދުވެގެން އައިސް ވާލިދު ގައިގައި ބައްދާލިގޮތަށް ފިޒާ ރޯންފަށައިފި އެވެ.
"ތެންކިއު ސޯ މަޗް ބޭބޭ... ދައްތައާއި ބޭބެ ނެތްނަމަ މިހާރު އަހަރެންގެ ފުރާނަ ނެތް މަސްގަނޑު ވަޅުލައިފީސް.." ރުއިމުގެ ތެރެއިން ފިޒާ ބުންޏެޗެ.
"ޝްޝްޝްޝ.. ތިކަހަލަ ވާހަކަ ކުދިން ނުދައްކާނެ.. ހިތްވަރުގަދަ ކުދިން ނުރޯނެ..! ބޭބެގެ ޕްރިންސެސްއަކީ ވަރަށް ހިއްވަރުގަދަ ކުއްޖެއް.." ފިޒާގެ ބުރަކަށީގައި ފިރުމާލަމުން ވާލިދް ބުންޏެވެ.
"އޯކޭ.. މިވާހަކަ މިހިސާބުން ނިންމާލާ.. އިތުރަށް ތާބިޝްގެ ވާހަކަ ދައްކާކަށް ނުޖެހޭނެ.. މިރޭގެ ކާނާ ފަރަށށް ފުރިހަމަ.. ކެއުމައިގެން ކުރިއަށްދާންވީނުން.. ވަރަށް ރޮވިއްޖެ! ރޮވުމަކީ އާދަޔާހިލާފަށް ބަނޑުހައިވާކަމެއް..!" ކޮއްކޮއާއި ބޭބެގެ ސަމާލުކަން ހޯދުމަށް އަޝްކާ ބުންޏެވެ. ދެބެން އެކުގައި ހީލަމުން ކާތަށި ކައިރިކޮށްލި އެވެ.
އާއިލީ ވަގުތުކޮޅުގައި އެތައް ވާހަކައެއް ދެކެވުނެވެ. ކައިނުނިމެނީސް ގޭގެ ބެލްއަޅައިލި އަޑުއިވިއްޖެ އެވެ.
"މިވަގުތު މިގެއަށް އަންނާނީ ކާކު..؟" ވާލިދް ސުވާލުކޮށްލި އެވެ.
ދޮރުނުހުޅުވާ ލަސްވުމުން އަނެއްކާވެސް ބެލްއަޅައިލާއިފި އެވެ.
"ވާލިދް.. ސަމްސަލުން ދޫކޮށްލާ.. މިއީ އަހަރެންގެ.. އެންމެ ފަހު އެތިކޮޅު ކާލާނީ އަހަރެން.. ދޫކޮށްލާ..!" ހަދާފައިހުރި ޕިރިނީގެ އެންމެ ފަހު އެތިކޮޅަށް ވާލިދްއާއި އަޝްކާ ހަނގުރާމަކުރަމުންދިޔަ އެވެ.
ތިންވަނަ ފަހަރަށްވެސް ބެލް އަޅައިލާފި އެވެ.
"އެވަރަށް ބެލްއަޅަނީ ކާކުތޯ ބަލާފައި މިއަންނަނީ..!" ބޭބެއާއި ދައްތަގެ ޓޮމް އެންޑް ޖެރީ ހަނގުރާމައިގެ ހެކިވެރިޔަކަށް އިނުމަށްފަހު ހެމުން ފިޒާ ތެދުވި އެވެ.
ދޮރުހުޅުވާލުމާއެކު ލިބުނީ ބާރުގަދަ ކަރަންޓް ޝޮކެކެވެ. ނިއްކުރިއަށް ރޫ އަރުވާލާފައި ދެތިންފަހަރު ލޯފޮހެލާފައި ބަލައިލި އެވެ.
"ތާބިޝް" އިހްތިޔާރަކާއި ނުލައި ތާބިޝްގެ ނަން ކިޔައިލެވުނެވެ.
ދެމީހުންގެ ހަތަރުކަޅި ބައްދަލުވެ، މާޒީގެ ރާޅާއެކު ފީނަންފެށީ ޖެހެމުންދިޔަ ވަޔާއި އޮއެވަރުވެސް ލޯބީގެ އިހްސާސްތަކަށް ސަމާލުވީތީ އެވެ.
"ފިޒާ... ޕްރިންސެސް.. ކާކު އައީ" ދެމީހުންގެ އިހްސާސްތަކަށް ރާޅެއް ބިންދާލިފަދަ އެވެ. ވާލިދްގެ ސުވާލާއެކު ދެމީހުންނަށް ތެޅެގަނެވުނީ އެއްފަހަރާ އެވެ.
"ފިޒާ.. އެތެރެއަށް ވަންނާންވެސް ނުބުނާނަންތަ..؟" ފިޒާގެ ލޮލަށް ބަލަމުން ތާބިޝް ސުވާލުކޮށްލި އެވެ. ފިޒާ އެއްފަރާތަކަށް ޖެހިލައި ޖާގަ ދެއްކުމުން ތާބިޝް އެތެރެއަށް ވަނެވެ.
މަޑުމަޑުން ހިނގާލާފައި ފިޒާއާއެކު ތާބިޝް އައިސް ހުއްޓުނީ ކާމޭޒް ކައިރީގަ އެވެ.
"ފިޒާ... ކާކު އައ.." އަޝްކާގެ ޖުމުލަ ނިންމާނެ ފުރުސަތެއް ނުލިބުނެވެ. ކުރިމަތީގައި ހުރީ ތާބިޝް އެވެ. ތާބިޝް އިސްދަށަށް ޖަހައިލި ނަމަވެސް އަޝްކާގެ ހަރަކާތް މުޅިން ތަފާތެވެ. މޫނު ރަތްވެގެން ދިޔައީ ރުޅި ގަދަވުމުންނެވެ.
"މިގެއަށް އަންނާން ކަލެއަށް ކެރުނީތީވެސް އަންތަރީސްވެއްޖެ..!" ޖެހިލުމެއްނެތި އަޝްކާ ބުންޏެވެ.
"އެއީ.. އަހަރެން.. އަހަރެން.." އެއްވެސް އެއްޗެއް ބުނާކަށް ތާބިޝްއަށް ފަސޭހައެއް ނުވި އެވެ.
ސީދާ ތާބިޝްގެ ލޮލަށް ބަލަމުން ވާލިދު ގޮނޑިންތެދުވި އެވެ. ރުޅިއައިސް ރަތްވެ ހުރެ ތާބިޝްގެ ކުރިމަތީގައި ހުއްޓުނެވެ. ވާލިދުގެ އަތް އުފުލެން ފެށުމާއެކު ފިޒާ ތެޅިގަތެވެ. ކުއްލި ހަރަކާތަކާއެކު ފިޒާއައިސް ހުއްޓުނީ ތާބިޝްއާއި ވާލިދުއާއި ދެމީހުންގެ ދެމެދުގަ އެވެ. ދެމީހުން ދެމެދުގައި ލެވުނު ފާރެއް ނުވަތަ ތާބިޝްގެ ދިފާއުގައި ދިއްކޮށްލި އައްޑަނައެއްގެ ގޮތުގައި ފިޒާ ފެނިގެން ދިޔައީ ހަމައެކަނި ތާބިޝްއަކަށް ނޫނެވެ. އަޝްކާއާއި ވާލިދުވެސް ފިޒާގެ މި ހަރަކާތުން ހައިރާންވި އެވެ.
"ބޭބޭ.. ޕްލީޒް"
ވާލިދުގެ ދެއަތުގައި މަޑުމަޑުން ހިފަހައްޓާލަމުން ފިޒާގެ ބޯ ދެފަރާތަށް ހަރަކާތްކޮށްލި އެވެ. ވާލިދުގެ އެ ހަރަކާތް މަނާކުރުމަށެވެ. ތާބިޝްއަށް ދޭން އުޅުނު ހަމަލާ ފިޒާ ހުއްޓުވީ އެވެ. ފިޒާގެ ދެ ލޮލުން ފެންނަމުންދިޔައީ ހިތާމައާއި އާދޭހެވެ.
ވާލިދް އިސްޖަހައިލި އެވެ. ކޮއްކޮގެ ލޮލުން ހިތާމައާއި ކަރުނަ ދުށުމަކީ ވާލިދުއަށް ކެއްވާނެކަމެއް ނޫނެވެ. ފިޒާގެ އުފަލަށްޓަކައި މުޅި ދުނިޔޭގެ ކުރިމަތީގައިވެސް ވާލިދް އިސްޖަހާނެ އެވެ. އަޝްކާއާއި ވާލިދު މިރޭވެސް ގަބޫލުކުރާ ހަގީގަތެއް އެބައޮތެވެ. ތާބިޝްއަށް ހާނިއްކައެއްވުމަށް ނުވަތަ އަނިޔާއެއް ލިބުމަކަށް ފިޒާ ފުރުސަތެއް ނުދޭނެ އެވެ. ވާލިދު އިސްޖަހައިލާފައި ފަހަތަށް ފިޔަވަޅެއް އެޅީ ކޮއްކޮއަށްޓަކަ އެވެ. ފިޒާގެ އުފަލަށްޓަކަ އެވެ. ތާބިޝްއަށް އަނިޔާއެއް ދީފިނަމަ، އެރިހުން ތަހަންމަލްކުރާނީ ފިޒާ އެވެ. އެކަމަށް ވާލިދު ފުރުސަތެއް ނުދޭނެ އެވެ.
"މިގެއަށް އައުމުގެ ބޭނުމަކީ ކޮބާ..؟" ހަރުކަށި އަޑަކުން ވާލިދް ސުވާލުކުރި އެވެ. ބުދެއް ފަދައިން ގާވެފައިހުރި ތާބިޝްގެ ހުރިހައި ސަމާލުކަމެއް ހުއްޓިފައިވަނީ ފިޒާއަށެވެ.
ދާދިދެންމެ ހިނގާދިޔަ ކަންތައް ގަބޫލުކުރާން ތާބިޝްއަށް ފަސޭހަ ނުވީ އެވެ. އެފަދަ ގޮތަކަށް ވާލިދުގެ ކިބައިން ތާބިޝް ހިމާޔަތްކުރާން އެދެމެދަށް ފިޒާ އަތުވެދާނެކަމަށް ތާބިޝްގެ ހުވަފެނެއްގާވެސް ފެނިފައެއް ނެތެވެ.
މާޒީގައި ތާބިޝްގެ ކިބައިން ފިޒާއަށް ލިބިފައިވާ ނަފްރަތާއި އެތައް ރިހުމެއް އޭނާގެ ކުރިމަތީގައި އެނބުރެން ފެށި އެވެ.
"އައުޗް...!! އާހް..." ތާބިޝް އޮފީހުންއައިސް ގެއަށް ވަނުމަށް ތަޅުގައި ހިފައިލިވަގުތު އޭނާގެ ކަންފަތުގައި ޖެހުނީ މަންމަގެ އަޑެވެ.
އަވަސްގޮތަކަށް ދޮރުހުޅުވާލި އެވެ. ބާރުގަދަ ކޮއްޕާލުމަކާއެކު ބަރު ލަކުނޑިގަޑެއް ވެއްޓޭފަދައިން ތާބިޝްގެ ފައިދޮށަށް ވެއްޓުނީ އޭނާގެ މަންމަ އެވެ. ގާތުގައި ހުރީ ހަމައެކަނި ފިޒާ އެވެ.
އަތުގައި އޮތް ލެޕްޓޮޕް ދަބަސް، ބިންމަތީގައި ބޭއްވުމަށްފަހު ތާބިޝް އަވަސްވެގަތީ އޭނާގެ މަންމަ، ފައިބުޑުން ނަގާށެވެ. އަތްމައްޗަށް އުފުލާލައިގެން ގެނެސް ސޯފާގައި މަންމަ ބޭއްވި އެވެ. ގުޑާލަންވެސް ނޭގިފައި ދާދިކައިރީގައި ފިޒާ ހުއްޓެވެ.
"މިހާލުގައި އަހަރެން ކިހައި ދުވަހަކު އުޅެންޖެހޭނެބާ..؟" ރޮއެގަންފައި ބަތުޝަބާ ބުންޏެވެ. އަލިފާންފަދައިން ދެ ލޯރަތްކޮށްފައި ތާބިޝް ބަލައިލީ ފިޒާއަށެވެ.
"މަންމަ އެހައި ބާރަށް ވެއްޓުނު ސަބަބެއް ފިޒާ ބުނެދިބަލަ..!" ނަފްރަތުން ފުރިގެންވީ އިންޒާރަކުން ތާބިޝް ބުނެލި އެވެ.
ބުނާނެ އެއްވެސް އެއްޗެއް ނޭގިފައި ފިޒާއަށް ހުރެވުނީ ތާބިޝްގެ މޫނަށް ބަލަހައްޓައިގެންނެވެ. ދާދި ދެންމެ އެ ހިނގިކަންތައް ސިކުނޑިއަށް ނަގައިގަންނާން އަދިވެސް ފިޒާއަށް ވަގުތު ބޭނުންވެ އެވެ.
"އަހަންނަށް އަނިޔާ ނުކުރާށޭ ބުނެ، މިއަދުވެސް އާދޭސްކުރިން..! މިއަދުވެސް ބަދިގޭގެ ހުރިހައި ކަމެއް ކުރީ އަހަރެން އެކަނިމައިއެކަނި..! ޒަހުރާގެ ދަރިފުޅު ބަލިވެގެން އޭނާ މިއަދު ކައްކާކަށް ނާދޭ..! ހުރިހައި ކަމެއްކޮށްފައި އައިސް ވަރުބަލިވެގެން މިތާ އިށީންދެފައި، ތާބިޝް އަންހެނުންކައިރީގައި އަހަންނަށް ގްރީން ޓީ އެއް ހަދައިދޭށޭ ބުނީތީ ކޮށްލިވަރު މިއީ..! އެއްފަހަރު ދެފަހަރު ބުނީމައިވެސް އަޑުނީވުނީމައި ދެން ބުނެވޭނީ ބާރަށް... ބާރަށް ބުނީތީ އަހަންނަށް މަޖުބޫރުކުރީ، މައާފަށް އެދެން..! އަހަރެން މައާފަށް ނޭދުނަކަސް މިވަރުކުރާކަށް ނުވާނެނުން..! މިއީ މިއަދު އެކަނި އަހަރެން ތަހަންމަލްކުރާ ކަންތަކެއް ނޫން.. މިގެއަށް އޭނާއައިންސުރެން އަހަންނަށށް އެކިވަރުގެ އަނިޔާކުރޭ.. މިކަހަލަ ވާހަކަ ނުދައްކަނީ އަހަރެންގެ ތާބިޝްގެ ދިރިއުޅުން ހަލާކުވެދާނެތީ..!" ރޮމުން ބަތުޝަބާ ދެއްކި ހުރިހައި ވާހަކައެއް ތާބިޝްގެ ކަންފަތަށް އިވެމުންދިޔައީ ބާރުގަދަ ގުގުރިއެއްގެ ގޮތުގަ އެވެ.
އިސްޖަހައިގެން ހުރި ފިޒާގެ ދިފާއުގައި އޭނާ އުއްފުވެސް ނުބުނެ އެވެ. ތާބިޝް އަމިއްލައަށް ތެދުވެގެން ގޮސް، ފްރިޖުން އައިސްޕެކް ނަގައިގެން އައިސް، މަންމަގެ އުޅަނބޮއްޓާއި ކަކުލާއި ކުޑަހުޅުގައިވެސް އައިސްޕެކް އެޅި އެވެ. އެއަށްފަހު ފިޒާގެ އަތުގައި ހިފައިގެން ދަމަމުން ކޮޓަރިއަށް ވެއްދީ ބަތްޝަބާގެ ކުރިމަތީގަ އެވެ.
"އަހަރެންގެ މަންމައަކީ އަހަރެންގެ ހިތް..! މަންމައަށް އިހްތިރާމްކުރަން ނޭގޭ މީހަކަށް އަހަރެންގެ ދިރިއުޅުމުން ޖާގައެއް ނުލިބޭނެ..! އެފަދަ ދަށުދަރަޖައިގެ ކަމެއް ފިޒާ ކޮށްފާނެކަމަށް އަހަރެން އުއްމީދެއް ނުކުރަން!" އަތުކޮޅަށް ފިޒާ ހޫރުވާލަމުން ތާބިޝް ބުންޏެވެ.
ބާރު ސްޕީޑްގައި ފިޒާގޮސް ޖެހުނީ މޭޒުގެ ކަނުގަ އެވެ. ވީ ތަދުން ދަށްބަނޑުގައި އަތް އަޅާފައި ފިޒާ ރޮއެގަތެވވެ. ކޮޓަރީގައި ހުރުން ފަސޭހަކަމަކަށް ނުވީތީ ތާބިޝް މިސްރާބުޖެހީ ޓެރަސްއަށެވެ.
ރުޅިކޮންޓްރޯލްކުރުމަށް މަސައްކަތްކުރުމުގެ ބަދަލުގައި ތާބިޝްގެ ލޯކުރިމަތީގައި މަންޒަރު ދައުރުވަމުންދިޔައީ ބާރުސްޕީޑްގައި މަންމައައިސް އޭނާގެ ފައިބުޑަށް ވެއްޓުނު މަންޒަރެވެ. ހެޔޮވިސްނުމެއް ނުލިބި، ރުޅިގަދަވުމުން ކަރުގައި އޮތް ޓައި ނަގާފައި ފައިބުޑަށް ހޫރުވާލި އެވެ.
"ޓައީއަށް ކޮންހާ ރުޅިއެއް ތި ބާލާލަނީ..؟ އަމިއްލަ ބޯ ނަގާފައި ފައިބުޑަށް އެއްލާލަންވީނުން..! އޭރުން ދެވަނަ ދުވަހު އެދަފަ ޑްރާމާއަކަށް ތައްޔާރުވާން ފަހަރެއްގައި ދަސްވެދާނެ..!" (ނުނިމޭ)
