
18 މީހުންނާއި އެކު ތ. ހިރިލަންދޫއިން މާލެއަށް ދަތުރުކުރަމުން ދިޔަ "ހޮޅުދޫ ބޯޓު"ގައި ބުދަ ދުވަހުގެ ރޭ އިރާކޮޅު ރޯވީ ތ. ކަނޑޫދޫ ކައިރިން ދަތުރުކުރަމުން ދަނިކޮށެވެ. މި ހާސިދާގައި މާވަށް ނިސްބަތްވާ އުމުރުން 25 އަހަރުގެ އަލީ މުޝްފިގް ފިޔަވާ އެންމެން ވަނީ ސަލާމަތްކުރެވިފައެވެ. މުޝްފިގު ގެއްލި އެ ޒުވާނާ ހޯދުމުގެ މަސައްކަތް އަންނަނީ ކުރަމުންނެވެ.
އެމްއެންޑީއެފުން ބުނީ މުޝްފިގު ހޯދުމުގެ މަސައްކަތް ކަނޑާއި ވައިގެ މަގުން ހުއްޓާނުލާ ކުރަމުން އަންނަކަމަށެވެ. މިދިޔަ 24 ގަޑިއިރުގެ ތެރޭގައިވެސް ބޮޑު ސަރަހައްދެއް ބަލާފައިވާކަމަށް އެމްއެންޑީއެފުން ބުނެއެވެ.
މިހާތަނަށް މުސްފިގު ހޯދުމަށް ކޮށްފައިވާ މަސައްކަތް
- ކަނޑުގެ މަތިން 133 ސްކެއާ ނޯޓިކަލް މޭލް ވަނީ ބަލާފައި
- ކަނޑުގެ އަޑިން ޑައިވްކޮށްގެން 143,880 އަކަ މީޓަރު ވަނީ ބަލާފައި
- ވައިގެމަގުން 5000 ސްކެއާ ކިލޯމީޓަރު ވަނީ ބަލާފައި
މުޝްފިގު ހޯދުމުގެ މަސައްކަތުގައި ކޯސްޓްގާޑް ޝިޕް ގާޒީ އާއި އެފްއައިސީ މާފަތް އަދި އެޗްޕީ 114 ބޭނުންކުރަމުން އަންނަކަމަށް އެމްއެންޑީއެފުން ބުނެއެވެ. މީގެއިތުރުން އެއާ ކޯގެ ޑްރޯންވެސް އަރުވަމުން އަންނަކަމަށާއި ސެންޓްރަލް އޭރިއާ ކޮމާންޑްގެ ޑައިވަރުންވެސް ޑައިވްކުރަމުން އަންނަކަމަށްވެސް އެމްއެންޑީއެފުން ވަނީ ބުނެފައެވެ.