އެ ކުންފުނިން ބުނީ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތެއް ކުރުމަށް ހަމަޖެހިފައިވާކަމަށެވެ. އެހެންކަމުން މިއަދި މެންދުރު ފަހު 14:00 އާއި 16:00 އާ ދެމެދު މާލޭގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑުމަކީ އެކަށީގެންވާ ކަމެއްކަމަށް ސެޓެލްކޯއިން ބުނެއެވެ.
އެ ކުންފުނިން ބުނީ ކަރަންޓް ކެނޑޭނެކަމަށް ބެެލެވެނީ މާލެ ސިޓީ، ޢިއްޒުއްދީން މަގު، ސަބްދެލި މަގު އަދި މަޖީދީ މަގު ހިމެނޭ ސަރަޙައްދުންކަމަށެވެ.
ސްޓެލްކޯއިން އަންނަނީ މާލޭ ސަރަހައްދުގެ ކަރަންޓް ވިއުގައިި ތަރައްޤީކުރުމުގެ މަސައްކަތް ކުރަމުންނެވެ. އަދި މިއަހަރުގެ ޕީކް ދުވަސްވަރަށް ތައްޔާރުވުމަށާއި، ގްރޭޓާ މާލޭ ޕަވާ ބެކަޕްގެ ގޮތުގައި ސްޓެލްކޯ ހުޅުމާލެ އެނެކްސް 2 އިންޖީނުގެއެއް ވަނީ ހުޅުވާފައެވެ. ހުޅުމާލޭ އިންޖީނުގެ އެނެކްސް 2 ގައި 1.6 މެގަވޮޓްގެ ޖުމްލަ 12 ޖަނަރޭޓަރު ސެޓް ބެހެއްޓުމަށް ހަމަޖެހިފައިވާކަމަށް ސްޓެލްކޯއިން ބުނެއެވެ.
