ވަޅިއަކާ ކޯރާޑިއަކާއި ކަށިގަނޑަކުން މީހަކަށް ހަމަލާދޭން މަސައްކަތްކޮށްފައިވަނީ، މއ. ކޫލްއައިސިސް އަހްމަދު ރަޝީދުއެވެ. އޭނާގެ ބަންދު އަމުރު ރިޕޯޓުން އެނގޭ ގޮތުގައި އޭނާގެ އުމުރަކީ 61 އަހަރެވެ.
އޭނާ ހައްޔަރުކޮށް ކޯޓަށް ހާޒިރުކުރުމުން، އޭނާގެ ޝަރީއަތް ނިމެންދެން ބަންދުގައި ބެހެއްޓުމަށްވަނީ ކޯޓުން އަމުރުކޮށްފައެވެ. މި މައްސަލައިގައި އަހްމަދު ރަޝީދުއާ ދެކޮޅަށް އެކަށީގެންވާ ވަރަށް ހެކި ލިބިފައިވާ ކަމަށް ބަންދު އަމުރު ރިޕޯޓުގައި ފާހަގަކޮށްފައިވެއެވެ. ކޯޓަށް ހުށަހަޅާފައިވާ ހެކިތަކުގެ ތެރޭގައި، ހާދިސާގެ ރިޕޯޓާއި، ހެއްކެއްގެ ބަޔާނުގައި އަހްމަދު ރަޝީދު ތޫނު އެއްޗެއް ބޭނުންކޮށްގެން ބިރު ދައްކައި، މީހަކަށް ހަމަލާދިނުމަށް މަސައްކަތްކޮށްފައިވާކަން ފާހަގަކޮށްފައިވެއެވެ.
އަހްމަދު ރަޝީދު ބަންދުން ދޫކޮށްލައިފިނަމަ، މީހެއްގެ ހަށިގަނޑަށް ގެއްލުންވުމުގެ ފުރުސަތު އޮތް ކަމަށާއި، އަދި އަހްމަދު ރަޝީދު ފިލާފާނެ ކަމުގެ އިހުތިމާލު އޮތްކަމަށްވެސް ބަންދު ރިޕޯޓުގައި ފާހަގަކޮށްފައިވެއެވެ.
