މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ނާޖާއިޒް މަންފާ ހޯދި މައްސަލައިގައި ޝައްމާންގެ އިތުރުން 4 މީހަކު ހައްޔަރުކޮށް ބަންދުގެ މުއްދަތު ވަނީ ޖަހާފަ އެވެ.
މި މައްސަލާގައި މިދިޔަ މަހުގެ 22 ގައި ޝައްމާން ހައްޔަރުކުރުމަށްފަހު ކޯޓުން ފުރަތަމަ ބަންދުގެ މުއްދަތު ޖެހީ 15 ދުވަހެވެ. އެ މުއްދަތު ހަމަވުމުން ދެން ޖެހީ ވާނުވާ ބަންދެވެ. މި މައްސަލާގައި ދެން ހައްޔަރުކުރި ހަތަރު މީހުންވެސް ޝަރީއަތް ނިމެންދެން ބަންދުގެ މުއްދަތު ވަނީ ޖަހާފަ އެވެ. ޝައްމާން މައްސަލަ ހައިކޯޓުގައި އިސްތިއުނާފު ކުރީ މިދިޔަ ހަފްތާގަ އެވެ. މި މައްސަލަ ހައިކޯޓުގައި ފަށާނީ މާދަމާ މެންދުރު ފަހު އެވެ.
ޝައްމާން ފުރަތަމަ ބަންދު ކުރި މައްސަލަ ހައިކޯޓުގައި އިސްތިއުނާފު ކުރުމުން އެ ކޯޓުން އެ މައްސަލަ އެންމެ ފުރަތަމަ ބަލައި ނުގަތެވެ. އެކަމަކު ޝައްމާންގެ ފަރާތުން އެ މައްސަލަ ރިވިއުކޮށްދޭން އެދުމުން ހައިކޯޓުން ފަހުންވަނީ މައްސަލަ ކުރިއަށް ގެންދަން ނިންމާފަ އެވެ.
މި މައްސަލާގައި ފުލުހުން ނެރުނު ބަޔާނެއްގައި ބުނީ ކޯޓެއް އަމުރެއްގެ ދަށުން ޝައްމާން ވަހީދު ދިރިއުޅޭ ގެ ބަލައި ފާސްކުރިއިރު އެގެއިން 257،475 ރުފިޔާއާއި 10،000 އެމެރިކާ ޑޮލަރު ފެނިފައިވާކަމަށެވެ. އަދި މީގެއިތުރުން އެހެނިހެން ބައެއް ގައުމުތަކުގެ ފައިސާ އާއި އިލެކްޓްރޯނިކް ސާމާނުތައްވެސް ހޯދާފައިވާކަމަށް ފުލުހުންގެ ބަޔާނުގައިވެ އެވެ.
ފުލުހުން ބުނީ މި މައްސަލައިގެ ތަހުގީގުގައި ގިނަ އަދަދެއްގެ ސީސޓީވީ ފުޓޭޖްތައް އެއްކޮށް ގިނަ ބަޔަކާއި ސުވާލުކޮށްފައިވާކަމަށެވެ. ފުލުހުން ބުނީ ގަވައިދާ ހިލާފަށް ދޫކޮށްލި ބިދޭސީ މީހާ އަތުން ހޯދިކަމަށް ބުނާ ފައިސާ އަޅާފައިވާ ކޮތަޅު މި މައްސަލާގައި ހައްޔަރުކޮށްފައިވާ އިމިގްރޭޝަންގެ މުވައްޒަފަކު ޝައްމާން ވަހީދުގެ ގެއަށް ހިފައިގެން ވަންނަތަން ސީސީޓީވީ ފުޓޭޖް ތަކުން ފެންނަކަމަށެވެ.
މި މައްސަލާގައި ފުލުހުން ވަނީ ޝަމްއާންގެ އަނބިކަނބަލުންގެ ފޯނާ ފާސްޕޯޓް ހިފަހައްޓާފަ އެވެ.
ހައިކޯޓުގައި އިސްތިއުނާފުކޮށްފައިވާ ޝައްމާންގެ ދެވަނަ މައްސަލައަކީ ޝަރީއަތް ނިމެންދެން އޭނާ ބަންދުކޮށްފައި ބެހެއްޓުމަށް ކުރި އަމުރުގެ މައްސަލަ އެވެ. މި ދެ މައްސަލައިގެ އިސްތިއުނާފު ހައިކޯޓުގައި ކުރިއަށް ގެންދާނީ އެއްކޮށެވެ.
