ގ.ރަނައުރާގޭ ހައްވާ ޔުމްނު ރަޝީދު މިދިޔަ ހުކުރު ދުވަހުގެ ރޭ ފުރާޅުމައްޗަށް ވެއްޓުނު ހާދިސާއާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމުގައި ޔުމްނު އެންމެ ފަހުން ފެނިފައިވާ އިމާރާތުގެ ބޭރު ފެންނަ ސީސީޓީވީ ފުޓޭޖު ދެއްކުމުގެ އިތުރުން މި މައްސަލައިގައި ހިމެނޭ ފަރާތްތަކުގެ ވަނަވަރުވެސް ހާމަކޮށްފައިވާތީ އެޗްއާރުސީއެމުން ވަނީ ކަންބޮޑުވުން ފާޅުކޮށްފައެވެ.
އެޗްއާރުސީއެމުން މިއަދު ނެރުނު ބަޔާނުގައި ބުނެފައިވަނީ މި މައްސަލައިގައި ފުލުހުންގެ އިހުމާލުތަކެއްވާ ކަމަށް ބުނެ މި މައްސަލައިގައި ޝާމިލުވާ ފަރާތްތަކަށް ބޮޑެތި ތުހުމަތުތަކެއް އާންމުން ސޯޝަލް މީޑިއާގައި ހިއްސާކުރަމުންދާއިރު، މައްސަލައިގެ ތަހުގީގުގައި އެކަންކަމަށް ރިއާޔަތްކުރާނެ ކަމަށެވެ. މި ހާދިސާއާ ގުޅިގެން ފުލުހުން ހާމަކުރި ވީޑިއޯގައި ފެނިގެންދިޔަ ފަރާތްތަކުގެ ކަރާމާތަށް އުނިކަން އައިސްފައިވާ ކަމަށްވެސް އެ ކޮމިޝަނުން ފާހަގަކޮށްފައިވެއެވެ. އަދި މިކަމުގެ ސަބަބުން އަނިޔާވެފައިވާ ފަރާތް އިތުރަށް ވިކްޓިމައިޒްވެގެން ގޮސްފައިވާތީވެސް އެޗްއާރުސީއެމުން ވަނީ ކަންބޮޑުވުން ފާޅުކޮށްފައެވެ.
އެޗްއާރުސީއެމުން ނެރުނު ބަޔާނުގައި އަނިޔާވި ފަރާތުގެ އާއިލާއިން މި މައްސަލައިގައި ފުލުހުންގެ އިހުމާލުތައް ކުށްވެރިކޮށްފައިވާކަން ފާހަގަކޮށްފައިވެއެވެ.
މީގެ އިތުރުން، އަނިޔާވި ފަރާތުގެ ޢާއިލާގެ ގަދަރާއި ކަރާމާތަށް އިހުތިރާމްކޮށް އެފަރާތުގެ ފޮޓޯއާއި ވީޑިއޯ ސޯޝަލް މީޑިއާގައި ނުފެތުރުމަށްވެސް އެޗްއާރުސީއެމުން ވަނީ އިލްތިމާސްކޮށްފައެވެ.
