މި ދަރުސްގައި އޭނާ ޖުމްލަ 12 މުހިންމު ވަސިއްޔަތެއް ކުރެއްވިއެވެ. އޭގެތެރޭގައި އިސްލާމީ ޝަރީއަތުގެ އަސާސްތަކާއި އިސްލާމީ އަޤީދާއާއި ޝަރީއަތާއި އަހުލާޤާއި އަދަބާއި ސުލޫކުގައި ހިފެހެއްޓުން ހިމެނެއެވެ.
އިންސާނާ ކަންބޮޑުވާންވާނީ ސުވަރުގެ ނުލިބިދާނެތީ ކަމަށް ވިދާޅުވިއެވެ. ދުނިޔޭގެ ތަނަވަސްކަމާއި މުއްސަނދިކަމާ މެދު ކަންބޮޑުވާނަމަ، އެ މީހެއްގެ ކިބައިން ފުދުންތެރިކަމާއި މުއްސަނދިކަން ނެތިކުރައްވަފާނެކަމަށާއި، އެހެނަސް އާހިރަތާ މެދު ކަންބޮޑުވާނަމަ އެ މީހަކަށް ދުނިޔޭގައި ފުދުންތެރިކަމާއި ތަނަވަސްކަން މާތް ﷲ މިންވަރުކޮށްދެއްވާނެކަމަށްވެސް ވިދާޅުވިއެވެ.
މި ދަރުސްގައި ޑރ. ސަލާހުލްބުދައިރު ވަސިއްޔަތްކުރެއްވި އެހެނިހެން ކަންތައްތަކުގެ ތެރޭގައި ގަލޯގަދަރަށް އީމާންވުމާއި ނަމާދަށް ރައްކާތެރިވުން ހިމެނެއެވެ.
ދޭދޭ ފަރުދުންގެ މެދުގައި ސުލްހަވެރިކަން ދެމެހެއްޓުމާއި ހަސަދަވެރިކަމާ ދުރުވުމާއި ދޫ ރައްކާތެރިކުރުމާއެކު ރިވެތި ބަހުން މުހާތަބުކުރުމަށްވެސް އިމާމު ވަސިއްޔަތްކުރެއްވިއެވެ. އަދި ހެޔޮލަފާ މީހުންނާ އެކު އުޅުމަކީ ހެޔޮލަފާކަން ދަސްވެ، ރަނގަޅު އާދަތައް ދަސްވާ ކަމެއްކަމަށްވެސް ޑރ. ސަލާހުލްބުދައިރު ވިދާޅުވިއެވެ.
މި ދަރުސްގެ ދިވެހި ތަރުޖަމާ އިއްވަވައިދެއްވީ އިސްލާމީ ކަންތައްތަކާ ބެހޭ މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
