އެކްޓިން ޕޮލިސް ކޮމިޝަނަރުގެ މަސްއޫލިއްޔަތު ޑެޕިއުޓީ ކަމިޝަނަރު ފަރުހާދު ފިކުރީއާ ހަވާލުކުރުމަށްފަހު ނިންމުން ބަދަލުކޮށްފައި މިވަނީ ގަޑިއިރެއްގެ ތެރޭގައެވެ.
ފުލުހުންގެ އިދާރާ ހިންގުން ވަގުތީ ގޮތުން ފަރުހާދުއާ ހަވާލު ކުރިކަން ހޯމް މިނިސްޓަރު، އަލީ އިހުސާން އިއުލާނު ކުރެއްވީ މިރޭ 7:46 ގައެވެ. ނަމަވެސް 8:46 ގައި އިހުސާން ކުރެއްވި ޕޯސްޓެއްގައި ވިދާޅުވީ އެނިންމުން ބަދަލުކޮށް އެކްޓިން ޕޮލިސް ކޮމިޝަރަކަށް ނަވީން އައްޔަނުކޮށްފައިވާ ކަމަށެވެ.
މިނިސްޓަރު ނިންމުން ބަދަލު ކުރި ސަބަބެެއްކަމަށް ވިދާޅުވީ ފުލުހުންގެ މުއައްސަސާއިން މިވަގުތު އެއްމެ އިސްކަންދީގެން ކުރިއަށްގެންދާ މަސައްކަތަކީ މިހާރު ހިނގަމުންދާ ތަހުގީގުގެ މަސައްކަތްކަމަށްވެފައި މިތަހުޤީގެކަންކަމާއި އެއްމެ އިސްކޮށް ހަވާލުވެ ހުންނެވީ ޑެޕިއުޓީ ކަމިޝަނަރު އިސްމާއިލް ނަވީންކަމަށް ވުންކަމަށެވެ. އެހެންކަމުން ކަމިޝަނަރު އޮފް ޕޮލިސް ކަމަށް ބޭފުޅަކު އައްޔަންކުރެވެންދެން އެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރު އިސްމާއިލް ނަވީން ކަނޑައަޅައިފިކަމަށް އިހްސާން ވިދާޅުވިއެވެ.
