މިއީ މެލޭޝިއާގެ އިސްލާމިކް ޔުނިވަސިޓީން ދިވެއްސަކަށް މި ޝަރަފު އެރުވި ފުރަތަމަ ފަހަރެވެ.
އެ ޔުނިވަސިޓީގައި މިއަދު ބޭއްވި ހާއްސަ ރަސްމިއްޔާތުގައި ރައީސަށް އަރުވާފައި ވަނީ ޑޮކްޓަރ އޮފް ފިލޯސޮފީ އިން އިސްލާމިކް ލީޑަޝިޕް އެންޑް މަދަނީ ޑިވެލޮޕްމަންޓްއެވެ. އެ ޝަރަފު ރައީސަށް އެރުވީ އެ ޔުނިވަސިޓީގެ ކޮންސްޓިޓިއުޝަނަލް ހެޑް، ޓެންކޫ އަޒީޒާ އައިމިނާ މައިމޫނާއެވެ. މިއީ އިސްލާމީ އުސޫލުތައް ހިފެހެއްޓުމާއި ގަވަނަންސްގެ ދާއިރާގައި އެމަނިކުފާނު ކުރެއްވި މަސައްކަތް ފާހަގަ ކުރެއްވުމުގެ ގޮތުން އެ ޔުނިވަސިޓީން އެރުވި ޝަރަފެކެވެ.
އެ ރަސްމިއްޔާތުގައި ވާހަކަ ދައްކަވަމުން ޔުނިވަސިޓީގެ ކޮންސްޓިޓިއުޝަނަލް ހެޑް ވިދާޅުވި ގޮތުގައި ރައީސް މުއިއްޒަށް މި ޝަރަފު އެރުވުމުގެ ފުރުސަތު ލިބުމަކީ ޔުނިވަސިޓީއަށް ލިބިގެންދިޔަ ޝަރަފެކެވެ. އެ ޔުނިވަސިޓީގައި 1990 ވަނަ އަހަރުން ފެށިގެން ދިވެހި ދަރިވަރުން ކިޔަވަމުން އަންނައިރު މިހާތަނަށް 380 އަށް ވުރެ ގިނަ ދިވެހި ދަރިވަރުން މި ޔުނިވަސިޓީން ދަސްވެނިވެފައިވެއެވެ. އޭގެ ތެރޭގައި ޑިގްރީ ކޯސްތަކާއި މާސްޓަސް އަދި ޑޮކްޓަރަލް ލެވެލްއަށް ކިޔަވާފައިވާ ދަރިވަރުން ހިމެނޭ ކަމަށް ޔުނިވަސިޓީން ބުންޏެވެ.
