ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރާއި މަހާޒް އަލީ ޒާހިރު ފަނޑިޔާރުކަމުން ވަކި ކުރަން ފެންނަ ކަމަށް ބުނެ ޖުޑީޝަލް ސާވިސް ކޮމިޝަނުގެ ކުޑަ ކޮމިޓީއިން ނިންމި ރިޕޯޓު އެ ކޮމިޝަނުން ފާސްކުރީ އިއްޔެ މެންދުރު ފަހުއެވެ.
މިއަދު އެ މައްސަލަ މަޖިލިހަށް އެޖެންޑާކޮށް މައްސަލަ ދިރާސާކުރަން މަޖިލީހުގެ ޖުޑީސަރީ ކޮމެޓީއަށް ވަނީ ފޮނުވާފައެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އަޒްމިރަލްދާ މިއަދު ފޮނުއްވި ސިޓީއެއްގައި އެދިވަޑައިގެންފައިވަނީ ގާނޫނީ ވަކީލަކާއެކު ޖުޑިޝަރީ ކޮމިޓިއަށް ވަޑައިގެން، ޖޭއެސްސީގައި ފާހަގަ ކުރި ނުކުތާތައް ފާހަގަ ކުރުމުގެ ފުރުސަތަެއް ދެއްވުމަށެވެ.
ފަނޑިޔާރުކަމުން އަޒްމިރަލްދާ ވަކިކުރުމަށް، ޖޭއެސްސީން ނިންމި ނިންމުމާއެކު، މަޖިލީހުން ގޮތެއް ނިންމުމުގެ ކުރިން، ޖުޑިޝަރީ ކޮމިޓީން އެ މައްސަލަ ދިރާސާކުރާއިރު، ވަކީލާއެކު ކޮމިޓީއަށް ހާޒިރުވެ، އޭނާގެ ފަރާތުން ފާހަގަކުރަން ހުރި ކަންކަން ފާހަގަކުރުމުގެ ފުރުސަތަކަށް އަޒްމިރަލްދާ ވަނީ އެދިވަޑައިގެންފައެވެ.
އަޒްމިރަލްދާގެ ސިޓީގައި ވިދާޅުވީ، ސުޕްރީމް ކޯޓަކީ އަދުލު އިންސާފުގެ އެންމެ މަތީ ބާރު ކަމަށެވެ. އެހެންކަމުން އެ ކޯޓުގެ ފަނޑިޔާރެއް މަގާމުން ވަކިކުރުމާމެދު ގޮތެއް ނިންމާއިރު، އެ ފަނޑިޔާރެއްގެ ޝަކުވާތަކެއް ހުރިކަމަށް ފާހަގަކުރާއިރު، އެ ޝަކުވާތަކުގެ އަޑު އެހުމަކީ ކޮންމެހެން ވެސް ޖުޑިޝަރީ ކޮމިޓީން ކުރަންޖެހޭނެ ކަމެއް ކަމަށް ދެކިވަޑައިގަންނަވާކަމަށް ވެސް އަޒްމިރަލްދާގެ ސިޓީގައިވެއެވެ.
