ހުޅުމާލޭ ފޭސް އެކެއްގައި ހުންނަ އޮރެންޖު ހިޔާއަށް ތެލެސީމިއާ ސެންޓަރު ބަދަލުކުރުމުގެ އަމަލީ މަސައްކަތް ސިފައިން ފެށީ މިދިޔަ މަހުގެ 28 ގައެވެ.
އެތަނުގެ މަސައްކަތްްތައް ސިފައިންނާ ހަވާލުކުރީ މިހާރު ދަމަނަވެށީގައި ހިންގަމުންދާ ތެލެސީމިއާ ސެންޓަރުގެ ހިދުމަތްތައް ގޯސްވެ ތަނުގެ ފެންފަވަރު ދަށްވެގެން ތެލެސީމިއާ ކުދިންނާއި އާއިލާތަކުން ކަންބޮޑުވުން ފާޅުކޮށް މުޒާހަރާކުރުމުންނެވެ.
އޮރެންޖު ހިޔާގައި ސިފައިން ހަދާފައިވާ ތެލެސީމިއާ ސެންޓަރު
ގައުމީ ދިފާއި ބާރުން ބުނީ ރައީސުލްޖުމްހޫރިއްޔާ، ސިފައިންގެ އެންމެމަތީ ވެރިޔާ ޑރ. މުހައްމަދު މުއިއްޒު، ގައުމީ ހާއްސަ މަސައްކަތެއްގެ ގޮތުގައި ސިފައިންނާ ހަވާލުކޮށްގެން ތެލެސީމިއާ ސެންޓަރު ހުޅުމާލޭ އޮރެންޖް ހިޔާއަށް ބަދަލުކުރުމަށް ފެށި މަސައްކަތް ނިންމައި، މިއަދު މިނިސްޓްރީ އޮފް ހެލްތާ ހަވާލުކޮށްފައިވާކަމަށެވެ.
ތެލަސީމިއާ ސެންޓަރު އޮރެންޖު ހިޔާއަށް ބަދަލުކުރުމަށް ސިފައިންނާއި ހަވާލުކުރައްވަމުން ރައީސް މުއިއްޒު ވިދާޅުވީ ތެލެސީމިއާ ދުވަހު އެތަން ބޭނުން ކުރަން ފަށާނެކަމަށެވެ.
އޮރެންޖު ހިޔާގައި ސިފައިން ހަދާފައިވާ ތެލެސީމިއާ ސެންޓަރު
ތެލެސީމިއާ ސެންޓަރު ހުޅުމާލެއަށް ބަދަލުކުރުމުން ވަސީލަތުގެ ގޮތުން މިހާރަަށް ވުރެ ފުރިހަމަވެ މިހާރަށްވުރެވެސް ރަނގަޅު ހިދުމަތްތައް ލިބޭނެކަމަށް ރައީސް ވިދާޅުވިއެވެ. އެގޮތުން ގިނަ ވަސީލަތްތަކެއް ގާއިމުކުރަން އަންގަވާފައިވާނެކަމަށް ރައީސް ވިދާޅުވިއެވެ.
ތެލަސީމިއާ ކުދިންގެ ފަރުވާ އޮރެންޖު ހިޔާއަށް ބަދަލުކުރިއިރު އެތަނަށް ފަސޭހައިން ދެވޭނެ ގޮތް ހެދުމަށް ހާއްސަ ބަސް ރޫޓެއް އެމްޓީސީސީންވަނީ ތައާރަފުކޮށްފައެވެ.
