ފިނޭންސް މިނިސްޓްރީން އިއްޔެ ހާމަކުރި ތަފާސްހިސާބުތަކުން ދައްކާގޮތުގައި މި އަހަރުގެ ފުރަތަމަ ހަތަރު މަހުގެ ތެރޭގައި ދައުލަތަށް ހިލޭ އެހީގެ ގޮތުގައި ލިބިފައިވަނީ 81.7 މިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތުގައި ލިބުނު 219.4 މިލިއަން ރުފިޔާއާ އަޅާބަލާއިރު 62.8 ޕަސަންޓުގެ ދަށްވުމެކެވެ.
މި އަހަރުގެ ބަޖެޓުގައި ހިލޭ އެހީގެ ގޮތުގައި 2.59 ބިލިއަން ރުފިޔާ ލިބޭނެ ކަމަށް ސަރުކާރުން ލަފާކޮށްފައިވާއިރު، މިހާތަނަށް ލިބިފައިވަނީ އޭގެ 3.16 ޕަސަންޓު އެކަނި ކަން ފާހަގަކުރެވެއެވެ. ނަމަވެސް ދައުލަތަށް ލިބޭ ޖުމުލަ އާމްދަނީ ވަނީ 3.47 ޕަސަންޓު އިތުރުވެފައެވެ. މިގޮތުން މިދިޔަ އަހަރުގެ މި މުއްދަތުގައި ލިބުނު 13.1 ބިލިއަން ރުފިޔާއާ އަޅާބަލާއިރު މި އަހަރު ލިބިފައިވަނީ 13.5 ބިލިއަން ރުފިޔާއެވެ.
ފިނޭންސް މިނިސްޓްރީން ހާމަކުރި މައުލޫމާތުގައިވާ ގޮތުން، ޓެކްސް އާމްދަނީ 1.03 ޕަސަންޓު ދަށްވެފައިވާއިރު، ޓެކްސް ނޫން އާމްދަނީ ވަނީ 32.3 ޕަސަންޓު އިތުރުވެފައެވެ. ޓެކްސް އާމްދަނީ ދަށްވި ނަމަވެސް، ފަތުރުވެރިކަމާ ގުޅުންހުރި ޓެކްސްތަކުން ލިބޭ އާމްދަނީ ވަނީ އިތުރުވެފައެވެ. އެގޮތުން ގްރީން ޓެކުހުގެ އާމްދަނީ 73.7 ޕަސަންޓު އަދި ޑިޕާޗާ ޓެކުހުގެ އާމްދަނީ 31.9 ޕަސަންޓު އިތުރުވެފައިވެއެވެ. އަދި ޓޫރިޒަމް ގުޑްސް އެންޑް ސާވިސަސް ޓެކްސް (ޓީޖީއެސްޓީ)ގެ ގޮތުގައި ލިބުނު އަދަދު ވެސް ވަނީ 5.3 ޕަސަންޓު އިތުރުވެފައެވެ.
